Саҥа дьыллааҕы тыыннаах харыйа атыыта саҕаланна
Кеша Алексеев аатынан уулусса 9/1 киһи дьон-сэргэ быыстала суох кэлэр. Оттон бу манна "Якутлесресурс" тэрилтэ дьиэтин таһыгар үгэскэ кубулуйбут тыыннаах харыйалары, бэстэри атыылыр кэм тосхойбут. Манна чахчы саҥа дьыллааҕы сүпсүлгэн биллэ быһыытыйбыт. Дьокуускай куорат олохтоохторо уонна ыалдьыттара саҥа дьыл бэлиэтин - тыыннаах маһы атыылаһаллар
Александр Афонин, "Якутлесресурс" тэрилтэ үлэһитэ: «Биһи бэспит арааһа барыта баар. Дьон дьиэтин иэнэ, үрүтэ төһө улаханыттан, кэлбит киһиэхэ сүбэлээн-амалаан биэрэбит. Дьон барыта арааһы баҕарар. Ким көп бэһи, ким лоп-бааччы. Ону бастаан ыйытабыт хайдах наадатын көрөн талан биэрэбит. Билигин арааһа барыта баар, хаачыстыбата үчүгэй. Эбиһээт ууга туруоруохха наада, ууга турдаҕына хаппат, өссө быһа көҕөрүө уонна айылҕа сытын таһааран киирэн барар. Ол иһин дьон бэһи үчүгэйдик ылар. Дьоннор харыйаны көрдүүллэр эрээри, харыйа сыты таһаарбат. Билигин дьоннор ковид кэннэ оҥоһуу харыйаларга аллергиялаан эрэбит дииллэр. Ол иһин тыыннаах Сахабыт сирин бэһин ылыахпыт этэ диэн кэлэн ылар буоллулар».
Чахчы, сылын аайы үгэс быһыытынан Дьокуускай куорат ойуурун хаһаайыстыбата Саҥа дьыл маанылаах маһын атыытын саҕалаата. Манна сыана киһи хармаанын харгыстаабат. 1,5 тыһ. са5алаан, 2,5 тыһ. диэри сыанаҕа дьон-сэргэ тыыннаах, дьиэни ыраастыыр, ураты сыттаах хара тыа мааныылаах кыыһын атыылаһыан сеп.
Дьокуускай куорат олохтооҕо Анна оҕолорун кытары тыыннаах бэс атыылаһа кэлбит. Ойуур хаһаайыстыбатын үлэһитин сүбэтин-аматын истэн, кэлбит дьон 2 миэтирэ кэриҥнээх маһы таллылар.
Анна, Дьокуускай куорат олохтооҕо: «Биһи быйыл тыыннаах харыйа атыыластыбыт. Уонна Саха сирин дьоннорун саҥа дьылынан эҕэрдэлиибит».
Оттон ким тыаҕа айаннаан тиийэн, бэйэтэ харыйаны, бэһи кэрдиэн баҕалаах дьон, Курашов аатынан уулусса 46 дьиэтигэр пааспардаах тиийэн дуогабар баттаһыаххытын сеп. Маныаха манна даҕатан эттэххэ, бу бээтиниссэҕэ тыыннаах харыйалар Нам улууһуттан аҕыйах ахсаанынан кэлэллэрэ күүтүллэр. Оттон бэстэр ахсынньы 30 кунугэр диэри атыыланыахтара. Онтон төһө да араас дьэрэкээн, уоттаах-күөстээх оҥоһуу мастар атыыга турдаллар, үйэ саас тухары мутукча дыргыл сытынан дьиэни толорор тыыннаах бэстэр-харыйалар киһи өйүгэр иҥэн хааллаллар.
