Өрөспүүбүлүкэтээҕи №2 балыыһаҕа 40-тан тахса киһи эмтэниини ааһар

Киһи көрдө эрэ этэ салаһар, куйахата күүрэр ыар хартыыната. Үлүйүү содула киһи этигэр-сиинигэр оспот баас буолан хаалан дьалаҕай сыһыан, сэрэҕэ суох туттуу үйэлээх өйдөбүнньүгэ буолар. Онтон дириҥ үлүйүү, улахан тоҥоруу киһи илиитин-атаҕын быһыытыгар тиэрдэн, дьон инбэлиит буолаллар.

Олоҕун иһэлийии ыарыытын эмтээһинигэр анаабыт Семен Николаевич күннэтэ үлүйүүнү эмтиир. Сыллата 200-түү киһи араас таһымнаах эчэйиини ыланнар эмтэниини ааһаллар. Хомолтолоох статистика хас да уонунан сыллар тухары аччаабат, төптөрүтүн кыралаан да буоллар эбиллэр курдук диэн дириҥ уопуттаах быраас иһитиннэрэр.

Семён Алексеев, Өрөспүүбүлүкэтээҕи 2 №-дээх балыыһа суһал көмөнү оҥорор киинин иһэлийиини эмтиир киин ординатор-бырааһа: «Биһи тымныы дойдулаах буоламмыт үлүйүү сыл аайы киирэр. Сүрүннээтэххэ кэм буолла да эдэр дьоннор түбэһэллэр. Сүрүн түбэлтэлэрэ диэн маҥнайгытынан – чөл олоҕу тутуспаттар, иккиһинэн – чараас таҥаһынан сылдьан үлүйэллэр. Аны буоллаҕына мантыкабыт сыл аайы кыччаабат, биир кэм курдук».

Аны бүтэһик сылларга оҕолор үлүйүүлэрэ элбээн, сытыы кыһалҕа нэһилиэнньэ бары араҥатын хапта. Сахабыт сирин тымныы кыһына, аан даам тымныылара кыра да алҕаһы бырастыы кыммат.

Степан Иванов, Өрөспүүбүлүкэтээҕи 2 №-дээх балыыһа суһал көмөнү оҥорор киинин иһэлийиини эмтиир киин травматолог-ортопед бырааһа: «Хомойуох иһин оҕолор эмиэ бааллар. Кэнники бириэмэҕэ оҕо үлүйүүтэ элбээтэ, сыл аайы элбээн иһэр. Ол төрөппүттэриттэн тутулуктаах. Төрөппүттэр оҕолоргутун көрө сылдьын. Бачча тымныыга сэрэхтээх буолун. Сүрүннээн сырайдарын, илиилэрин, тарбахтарын чараас үтүлүктээх сылдьан үлүтэллэр».

Өскөтүн киһи этин-сиинин үлүтэр түгэнигэр биир сүдү суолталаах ирдэбили өйдүөхтээх. Тымныйбыт, үлүйбүт сиргитин тыытыман. Имэринэ, массажтыы сатааман. Итии ууну, чэйи иһэн киһи ис-иһиттэн сылыйан, аргыый аҕай дьиэ температуратыгар үөрэнэн аа-дьуо ирэн барыахтаах. Онтон атын киһини мээнэ хамсаппакка, сэрэнэн-сэрбэнэн сылаас сиргэ киллэрэн тымныы таҥаһын устан халыҥ, сылаас таҥаһынан бүрүйэн, быраас кэлэрин күүтэҕит.

Семён Алексеев, Өрөспүүбүлүкэтээҕи 2 №-дээх балыыһа суһал көмөнү оҥорор киинин иһэлийиини эмтиир киинин ординатор-бырааһа: «Урукку курдук итии ууга угар, тымныы хаарынан массажтыыр ити сыыһа. Манна сүрүн төрүөтэ периферическай сосудтара адьаналлар, олор бары тоҥон хаалаллар уонна онно эритроцит мууһуран хаалар. Ол иһин массажтаатаххытына онтукаҕыт алдьанан хаалар оччоҕуна өссө быһа дириҥээн хаалар. Ол иһин саамай маҥнайгы көмөтө диэн – итии таҥаһынан сабаҕыт, массажтаабаккыт уонна итии чэй биэрэҕит».

Тоһуттар тымныылар кэмнэригэр ханнык баҕарар киһи араас таһымнаах үлүйүүнү, тоҥорууну ылан илиитэ-атаҕа суох хаалан, олоҕун устата инбэлиит буолуон сөп. Кыһыҥҥы бириэмэҕэ халыҥ таҥас, сөптөөх дьаһал, бэйэ-бэйэҕэ болҕомтолоох сыһыан хаһааҥҥытааҕар да күүстээхтик ирдэнэр.