Өрөспүүбүлүкэ үрдүнэн Саҥа дьылга бэлэмнэнии тэтимирдэ

81

Айталина Флегонтова идэтинэн уруһуй уонна технология учуутала, ол иһин айар эйгэҕэ кыра сааһыттан сыстыбыт. Оттон ааспыт үйэ оонньуура - баата Дед Моруоһу оҥоруунан дьарыктаммыта ыраатта. Урут биир даҕаны Саҥа дьыл маннык оонньуура суох ааспат этэ, оттон билигин Дойду үрдүнэн маннык оонньууру булар ыарахан. Айталина Саха сиригэр бастакынан маннык оонньууру сөргүтэн саҕалаабыта. Ол саҕалыаҕыттан үөрэниэн баҕалаах дьон Өрөспүүбүлүкэ араас муннуктарыттан мусталлар. Хас биирдии дьиэҕэ оҕо саас киэргэлэ, саҥа дьыл хаһаайына баар буолуохтаах диэн Айталина бэлиэтиир.

Айталина Флегонтова, Мэҥэ Хаҥалас улууһун олохтооҕо: «Билигин оннук оонньуурдар маҕаһыыҥҥа атыыга суохтар, олох сүттүлэр. Биһиэхэ үксүн Санта Клауһу им бэлиэ оҥостон кэллилэр баччааҥҥа дылы. Ол иһин мин бэйэм даҕаны дьиҥнээх биһи оҕо сааспыт Моруос оҕонньору сөргүтүөх санаам кэлэн дьарыктаммытым ыраатта».

Урут куруук Дед Моруоһу оҥорор эбит буоллахтарына, элбэх киһи этиитин ылынан билигин сиэн кыыһын Снегурочканы эмиэ оҥороллор. Оҥоро үөрэнэр бэрт боростуой диэн маастар бэлиэтиир. Хас биирдии дьиэҕэ баар эмтиэкэ баатата уонна килиэй эрэ көмөтүнэн көмүс тарбахтаах Айталина Флегонтова хас эмэ сылы быһа чочуйан, тиэхиникэтин айан таһаарбыт. Чурапчы улууһун олохтооҕо бэйэтигэр истиҥ бэлэх оҥоро кэлбитин үллэстэр.

Мария Седалищева, Чурапчы улууһун олохтооҕо: «Бүгүҥҥү маастар-кылааска кэлэммин бу саҥа оҥордум баата матырыйаалынан. Эрдэттэн маннык оҥоруохпун баҕарар этим, ону бу кэлэн син сатаатым дии саныыбын. Тымныы оҕонньору оҥорорго улахан сатабыл наада эбит. Киһи илиитэ сымнаҕас буолуон наада, баата бэйэтэ сымнаҕас матырыйаал».

Хас биирдии кыттыылаах бэйэтин баҕатынан Моруос Оҕонньорун киэргэттэ. 4 чаас устата иһин, төбөтүн, оттон салгыы бэргэһэтин, сонун оҥордулар. Сыыйа сатанан истэҕин аайы сүргэлэрэ көтөҕүллэн, Саҥа дьыллааҕы санаалара киирэн истэ.

Фрося Григорьева, Дьокуускай куорат олохтооҕо: «Биһи кыра эрдэхпитинэ баар этэ маннык урукку Дед Моруос, харыйа анныгар уурааччыбыт. Билигин Моруос Оҕонньорум суох, ол иһин манна оҥоро кэллим, харыйабар илдьэн ууруом. Син балачча үлэлээх эбит. Хайдах оҥорорун, тиэхиникэтин билиэххэ наада эбит уонна матырыйааллара наада эбит».

Айталина хас биирдии киһи сатаабатын көрдөрөр, көмөлөһөр. Кини боростуойдук да туппута-хаппыта ураты кэрэ буолан иһэр диэн кэлбит ыалдьыттар бэлиэтииллэр.

Бэлэм буолбут оонньууру билигин араас улуустарга илдьэ барыахтара. Хас эмэ үйэни уҥуордуур, бастыҥ хаачыстыбалаах оҕо саас Тымныы Оҕонньоро чугас дьоҥҥо бастыҥ бэлэх, дьиэҕэ Саҥа дьыл иһэрин сибикитиэ.