Бөдөҥ учуонай Николай Тобуруокапка аналлаах ахтыы кинигэтэ таҕыста

Мээнэ киһи литературовед-учуонай буолбат, манна билиини таһынан киһи майгыта-сигилитэ үтүө, кэрэ буолуохтаах диэн Николай Николаевич ирдэбиллээҕэ диэн ахтыыттан кинигэ сүрэхтэниитэ саҕаланна. Бу этиини хас биирдии тыл эппит киһи бары мэктилээтилэр. Кинигэни оҥорууга кини кэргэнэ тыл наукатын кандидата Валентина Тобуруокаба уонна литературнай критик Варвара Окорокова үлэлээтилэр

Варвара Окорокова, М.К. Аммосов аатынан ХИФУ профессора, кинигэ ааптара: «Бу кинигэ тахсыбыта биһиги учууталбытыгар махталбыт буолар. Тоҕо диэтэххэ, бу кинигэҕэ үлэлээбит дьоннор элбэхтэр: институт учуонайдара, кафедра учуонайдара бары кыһаллан туран бу кинигэ тахсарыгар матырыйал хомуйан, сүбэ-ама буолан, син элбэхтик үлэлээтибит диэн махталбытын».

Суруйааччылар, литература кириитиктэрэ уонна саха айымньытын таптааччылар бэлиэ түгэҥҥэ түмүстүлэр. Кинилэр кинигэҕэ Николай Тобуруокап олоҕо уонна наукаҕа дириҥ үлэлэрэ тэҥҥэ наарданан киириилэрин сэргээтилэр, үлэтин араас хайысхата, учуонайдары кытта сыһыана арылхайдык сырдатыллыбытын бэлиэтээтилэр. Онтон Тобуруокаптар айар дьиэ кэргэн аатыттан күтүөттэрэ, суруйааччы Дмитрий Наумов истиҥ сыанабылы быста, махтанна.

Дмитрий Наумов, Саха норуодунай суруйааччыта: «Кини научнай үлэһит быһыытынан киэҥ хардыылааҕынан уонна патриот быһыытынан эмиэ атын көрүүлээҕинэн саха литературатыгар ону барытын көрдөрөр гына оҥоһуллубутутан ону мин астынным. Туруулаһан туран кинини саха киэн туттар дьоно диэн сиэрийэҕэ оҥорон таһаарбыттара наһаа үчүгэй».

Николай Николаевич институту саҥа таһымҥа таһаарбыта. Ол курдук үөрэх бырагыраамаларын оҥорбута, диссертация сэбиэтин салайбыта. Кини үлэлиир кэмигэр 30 тахса литературовед учуонай үүнэн тахсыбыта. Олортон биирдэстэрэ билиҥҥи кэм бөдөҥ кириитигэ Валентина Семенова.

Валентина Семёнова, М.К. Аммосов аатынан ХИФУ ХИНТуоКҮ саха литэрэтиирэтин хаапыдыратын сэбиэдиссэйэ: «Николай Николаевич мин научнай салайааччым этэ. Тиэмэбин таларбар да көмөлөспүтэ, кандидатскай диссертациябар научнай салайааччым этэ уонна докторскай диссертациябын көмүскүүрбэр кини миэхэ научнай консультант этэ уонна кэлин эдэр киһиэхэ наада буолуо диэн Варвара Борисовнаҕа миигин биэрбитэ. Онон кини мин олохпор наһаа улахан суолталаах, таптыыр ытыктыыр киһим».

Сибиир бөдөҥ учуонайын олоҕо, сытыы ырытыылара, наукаҕа арыйыылара норуокка үйэтитиллэн, дьоһун бэлэх буолла.