Саха сиригэр бу нэдиэлэ олус тымныы буолла

Хойуу туман Дьокуускайы бүрүйэр. Ити да, бу да турара көстүбэт. Температура -45 тахсыбатаҕа номнуо нэдиэлэ кэриҥэ буолла. Билигин бары улууска маннык халлаан турар. Бытархан тымныыны чэпчэкитик ылынар Саха сирин дьоно киһини сөхтөрөр устуулара куйаар ситимигэр киэҥник тарҕанар. Холобура, бу каадырга сахалыы үҥкүүгэ Тиксии сытыы силлиэтэ да мэһэй буолбатын көрөбүт.

Онтон Амма олохтоохторо тоһуттар тымныы кэмигэр чыычаахтары аһатыҥ диэн ыҥырыылара үтүө холобур быһыытынан куйаар ситимин тилийэ көтөн, амарах сүрэхтээхтэр көтөрдөрү аһатарга ылыстылар. Оттон ойбоҥҥо сөтүөлээччилэр видеолара сыл аайы сойбот сонун. Кинилэр тулуурдарын, күүстээх санааларын Өрөсбүүлүкэ бүттүүнэ сөҕө, биһирии эрэ көрөр. Кырдьык да тымныы биһигини күүстээх оҥорор, бу этиини арчыһыт Петр Кычкин бигэргэтэр.   

Петр Кычкин, Арчы дьиэтин фольклорга салаатын исписэлииһэ, алгысчыт: «Оттон биһиги сахалар тымныыттан куттаныа суохтаахпыт. Тымныы диэн биһи харысхалбыт буолар. Ханна даҕаны маннык тымныылаах кыһыннаах сир суох. Оттон биһиги тымныыбыт баар буолан сахалар биһи туспа бэйэбит уратыбыт диэн буолар. Тымныынан биһи күүһүрэбит, сөпкө туттабыт, харысхалбыт буолар».

Петр Кычкин күн-дьыл туругун өбүгэ үгэһинэн сылыктыыр. Холобура, ахсынньы 12 күнүгэр буурҕа түстэҕинэ нэдиэлэ устата күүстээх силлиэ салҕанар. Маны тэҥэ сиэр-туом үөрэхтээхтэрэ, тымныы кэмигэр ыраастаныыга тоҕоостоох кэм диэн этэллэр. Маныаха, таһырдьа кэтэр, утуйар таҥаһы таһырдьа салгылатары сүбэлииллэр. Онтон бу аастан биэрбэт хойуу туманы күнү дьылы кэтээн көрөөччүлэр салгын баттааһына үрдүү турарын кытта сибээстииллэр.

Дьокуускай куоракка уонна бу эргин муҥутаан -52 кыраадыска диэри тымныйыа диэн сылыктыыллар.  Хойуу туман ордук суолга-иискэ кутталы үөскэтэр. Массыыналар уоттара нэһиилэ кылайан көстөр, онтон сатыы дьон тымныыта бэрдиттэн сүүрэр быластаан хаамаллар.

Саргылаана Никитина, Дьокуускайдааҕы гидрометеорологическай сулууспа күнү-дьылы кэтээн көрөр салаатын салайааччы: «Өрөрбүл күннэргэ Халыма, Индигиир диэки Охотскай муораттан циклоннар киирэннэр салгыны сылытыахтара -13, -18 кыраадыска дылы. Хаардыаҕа, тыалырыаҕа. Тыал күүһэ 9-14 м/с тиийиэҕэ. Ол кэмҥэ Киин улуустарга тымныыбыт арыый сымнаан, температура нуормаҕа туруоҕа. Ол гынан баран чысхааннаах буолан сылыйбытын улаханнык биллэриэ суоҕа».

Ол курдук өрөбүл күннэргэ түүҥҥү температура 37 диэри тахсыаҕа, онтон күнүскү өттүгэр 32 тиийэ сылыйыа. Онтон Саха халандаарынан ахсынньы 25 күнүттэн Испирдиэнэп күнүттэн саамай күүстээх тымныы уонна тыал түһэр.