Бөрөлөр Саха сирин хаһаайыстыбаларыгар улахан хоромньу таһаардылар

Бу көстөр каадырдарга адьырҕа кыыл тарпыт сылгылара сыталлар. Орто Халыма улууһугар быйыл кыһын бөрөлөр мэнээктээннэр хаһаайыстыбалаах дьоҥҥо улахан хорумньу таҕыста. Аҥардас бу күһүҥҥүттэн Орто Халымаҕа 10 убаһаны тартылар. Бааһырбыт 3 сылгыны эмтээтилэр. Бөһүөлэк таһыгар 4 бөрө баара биллэр.

Мария Шарина, Орто Халыма улууһун дьаһалтатын тыатын хаһаайыстыбатын салалтатын салайааччытын солбуйаччы: «Бөрөнү кыайан бултуур кыахпыт суох. Бөрө быйыл ситтэрбэт, быйыл хаарбыт 50см. – 1м. дылы тиийэ түстэ. Ол иһин бу боппуруос элбэхтэ бэриллибитэ. Дьоннор мустан муньахтаан туһахтаан, хапкааннаан көрөллөр ону билиҥҥэ дылы хомойуох иһин биир даҕаны бөрөнү бултуу иликтэр. Хорумньулаахтарга билигин көмөлөһөр кыахпыт суох. Бөрөнү сырсарга бензиннара да бүттэ».

Улуус эр дьоно түмсэн ардай аһыылааҕы сонордоһо сатыыллар да суол-иис, тиэхиникэ суоҕуттан биир да бөрө бултана илик.

Онтон бу видеоҕа Мэҥэ Хаҥалас улууһун Чыамайыкытыгар бааһырбыт убаһаны устан ыыппыттара социальнай ситимнэринэн тэлийэ көттө. Былырыын бу нэһилиэккэ эмиэ адьырҕа кыыл аһыытыттан хаһааҥҥытааҕар да элбэх сылгы өлбүтэ.

Адьырҕа кыыл мэнээктээһинэ саҥа үөскээбит кыһалҕа буолбатах. Хас сылын ахсын хатыланар хомолтолоох түбэлтэ. Сыллата хаһаайыстыбалар уонна чааһынайдар мөлүйүөнүнэн сууммаҕа ороскуоттаналлар.

Ол курдук сыл саҥатыттан тыа хаһаайыстыбатыгар бу курдук хорумньу таҕыста. 4909 дьиэ табата ардай аһыылаах аһа буолла. Харчыга таһаардахха 122 мөлүйүөн. Онтон сыспай сиэллээҕи аахтахха сыл саҥатыттан 76 сылгы өлбүт, харчытынан аахтахха 6 мөлүйүөн сууммалаах хоромньу буолла.  Уопсай сууммабыт 126 мөлүйүөнтэн таҕыста. 

Сотору кэминэн хас биирдии улууска биригээдэлэри тэрийэн үлэлэтиэхтэрэ. Ону таһынан ордук уустук балаһыанньалаахтарга мобильнай биригээдэлэри көмөҕө ыытыахтара. 

Иннокентий Семёнов, айылҕа баайын дирекциятын дириэктэрин солбуйааччы: «Бүдьүөттэн харчы көрүллэр, онон аукцион быһыытынан анал биригээдэ үлэтин тэрийэбитэ. Билигин аукциоммут ааста. Билигин дьэ улуус аайы анал биригээдэ диэн тэрийээри гынабыт. Сүрүннээһин болдьоҕо 3 эрэ күннээх көҥүл биэрэр. Өрөспүүбүлүкэ булт Департамена ол өттүн үлэлэһэ сылдьар Москвалары кытта. Бу күннэргэ быһаарыы тахсыахтаах».

Уопсайа Саха сиригэр сыл саҕаланыаҕыттан 385 бөрө бултанна. Ол курдук бөрө ахсаанын бэрээдэктээһиҥҥэ 171, ураты харыстанар сирдэргэ 32 уонна чааһынай бултуур сирдэргэ 65 ардай аһыылааҕы ыллылар. Мантан кыһын балаһыанньа өссө хайдах буолуо биллибэт.