Горнай улууһугар “Уокка буспут амтан” ас буһарыыга күрэс ааста

Бу күн иһирдьэнэн таһырдьанан күрэс тыына оргуйан олордо,  эр дьон аймах астыыр сатабылларын  дьон дьүүлүгэр таһааран көрдөрдүлэр. холобур Бэрдьигэстээх  баһаарынай чааһыттан  Алексей Колесов уонна Илья Григорьев убаһа этиттэн узбек куухунатын пловун астаатылар.

Алексей Колесов, «Уокка буспут амтан» күрэс кыттааччыта: «Биһиги буоллаҕына узбекскай кухняттан «ферганский плов» диэн буһара сылдьабыт: моркуоп, луук, эт уонна приправалара - зира, куркума, барбарис, изюм, горох, нут иҥин кутаҕын».

Ыал буолан олорбуттара 45 сыл буолбут Наталья Андрей Баһылыйаптар бу кун тымныыны аахсыбакка кэлэннэр сибиинньэ этиттэн соркуой буьардылар. Ас буһуутун сиргэ сылдьа үөрүйэх ыал аҕата эһэтэ бэйэтэ иилээтэ.

Наталья Васильева, «Уокка буспут амтан» күрэс кыттааччыта: «Андрей уруккуттан ас астыыр. Асчыт бөҕө. Ыал буоларбытыгар олох бэлэм киһи кэлбитэ. Читаҕа спортивный клуб армии үлэлээбитэ, инньэ гынан онно бэйэтэ соҕотоҕун олорбут иҥин буолан ас астыы үөрүйэх. Мин шеф-поварым диэн ааттыбын дьиэҕэ».

Бырайыак толкуйтан дьиҥ олоххо этэҥҥэ үбүлэнэн киирбититтэн  бырайаык ааптара Майаана Моруот үрдүкү  айыыларыгар иччилэригэр махтанна, бу курдук үп даҕаны ас даҕаны дэлэйэ турарыгар көрдөстө.

Майаана Моруот, бырайыак ааптара: «Маннык бырайыактар олоххо киирэ турдуннар диэн этэбит уонна аскыт минньигэс буоллун, куруук уоккут умуллубатын, астаах буолун».

Таһырдьа астааһыҥҥа Савва Гуляев уолунаан Саввалыын кэлэн  хортуоппуйдаах убаһа этин астаатылар, кинилэр буһарыыга ньымалара арыый да ураты эбит, бастаан хортуоскатын арыыга буһардылар.

Савва Гуляев, «Уокка буспут амтан» күрэс кыттааччыта: Хортуоскатын эрдэ арыыга буһарабыт онтон арыытын көҕүрэтэн баран этин буһарабыт. Эппит бэйэбит киэнэ, бэйэбит да сылгылаахпыт, Аһымаҕа аймахтарбытыгар да сылгылаахпыт. Бэйэбит эппит уонна бэйэбит олордубут хортуоскабыт».

Таһырдьа ас буһар кэмигэр эйэ павильонугар тоҥ убаһа этин быһыыга күрэс тэҥинэн буолла, манна эмиэ барыта үс хамаанда кытынна, ол курдук баһаарынай чаастан Егор Павлов, ыччаттар Наталья Никитина, Алмаз Захаров, уонна эдэр ыал Борис, Светлана Сидоровтар.

Егор Павлов , «Убаһа этэ»  күрэс кыттааччыта: «Бу убаһа этэ Кировскай. Аймахтарым биэрбиттэрэ ону кэлэммин бу конкурска кыттарбар туһана сылдьабын».

Натальялаах  Алмаз  отон уга уонна кытыан лабаата кыбытыктаах муустан оҥоһук иһиттэрэ сэҥээрини ылла бу иһиккэ бысталаммыт эти  туруордахха  түргэнник ньалҕайан ирэ охсубат эбит, ону таһынан убаһа этиттэн тар-тар диэн отонноох аныгыылыы аһы көрдөрдүлэр уонна Алмаз бэйэтэ биэрэстэн уонна гранаттан хатаран оҥорбут туматын уурбуттар.

Күрэстэр түмүгүнэн буһарыыга, Гуляевтар бастааннар 20 тыһ. солк., иккискэ миэстэҕэ  Баһаарынайдар Илья Григорьев, уонна Алексей Колесов  15 тыһ. солкуобай, оттон үһүскэ Баһылайаптар 10 тыһ. солк. онтон тоҥ эти быһыыга Алмаз Захаров, Наталья Никитина бастакы миэстэҕэ 10 тыһ. солк, иккискэ Егор Павлов 8 тыһ. солкуобайы үһүскэ Сидоровтар эдэр ыал 5 тыһ. солк. уу харчынан туттулар.

Тэрээһин “Кыһын Саха сириттэн саҕаланар” бэстэбээл чэрчитинэн барда бу күн нэһилиэк киин харыйата уотун уматан оҕо аймаҕы үөртэ, тымныы оҕонньор кэлэн иһэр саҥа сылынан эҕэрдэлээтэ, остуоруйа дойдутун олохтоохторо үөрүүнү тэҥҥэ үллэстэн үҥкүүлээтилэр, харыйа тула эргийдилэр.