Дьокуускайга "НеоОлоҥхо" бэстибээл ыытылынна

Хатыҥ удьурҕайыттан оноһуктар.  7-с сылын Валерий Дьячковскай бу курдук ураты оҥоһуктарынан  дьарыктанар.   Олоҥхо бэстибээлигэр аҕалан дьон үрдүк биһирэбилин ылла. Валерий 30-тан тахса сыл суоппарынан үлэлээбит киһи буолар, оттон кэлин сааһырыы сынньалаҥар баран, 62 сааһыттан уһанан барбыта. Билигин кини үлэтигэр хас эмэ сүүһүнэн оҥоһуктары ааҕыахха сөп. Киһи талаана хайа баҕарар сааһыгар үтэн кэлиэн сөп эбит диэн Уус үллэстэр. Удьурҕайы соломмут ыллыкка түөрүллэн тахсыбыт сирдэриттэн хомуйан ылар. Ол ылан силиһэ туохха маарынныырын таба көрөн, сыыйа чочуйбутунан барар.

Валерий Дьячковскай, мас ууһа: «Мунньунабын уонна кыһын бириэмэ буллахпына оҥоробун. Мин силимниири сатаабаппын. Холобур - илиилэрин, атахтарын биир силистэн, мутуктан көрөн таһаара сатыыбын».

Маһы ыллатар уус хас биирдии оҥоһугун ураты суолталыыр. Уонна Ньургун Боотур олоҥхону олус үчүгэйдик билэр буолан, хас биирдии дьоруой хайдах майгылааҕын, тоҕо маннык таҥастаммытын кэлбит дьоҥҥо кэпсээтэ.

Тэрээһин өссө биир чаҕылхай көстүүтүнэн олоҥхо дьоруойдарын илэ үтүктүү буолла. Ньурба улууһа Оҕо Дьулаах Бухатыыр олоҥхону үтүгүннэ. Таҥастарын-саптарын улуус көмүс тарбахтаах иистэнньэҥнэрэ оҥорон таһаарбыттар.

Розалия Тихонова, Ньурба улууһун култууратын салайааччы: «Аан Алахчын Хотун таҥаһа. Кыбытык тигии диэни тоҥ саха барыта билэр. Илииннэн тигии, онон бу сыанаҕа кэтэргэ субу курдук тигээһин саамай үлэлээх».

Дизайнер уонна худуоһунньук уонча киһи таҥаһын уус-уран айымньыга барсардыы дьүһүйэн таһаарбыттар. Хас биирдии уобараска тимэҕэр, сабыгар тиийэ ураты көрүү болҕомтото уурулунна диэн кэпсииллэр.

Марина Андреева, дизайнер: «Уопут ылынным, олоҥхо хайысхатыгар миэхэ бастакы хардыы буолар. Ону тэҥэ маннык стилизованнай көстүүмнэри оҥорооһуҥҥа».

Өссө биир ураты косплейынан Чурапчы улууһун култууратын көрдөрүүтэ буолла. "Айылгы" норуот айымньытын дьиэтэ бары олоҥхоҕо баар Аан Алахчын хотун уобараһын  Чурапчы хатыҥыгар тэҥнээн оҥордо.

Розалия Игнатьева, Чурапчытааҕы "Айылгы" норуот айымньытын дьиэтин дириэктэрэ: «Бу Аан Алахчыммыт буоллаҕына күрэххэ биллэриллибит. Эскизтар күрэхтэригэр кыайбыта. «Айылгы» норуот айымньытын дьиэтин көстүүм тигээччитэ Лидия Захарова тикпитэ. Чурапчы хатыҥ чараҥынан биллэр быһыытынан, барыта туостан уонна хатыҥ чараҥ уобараһынан Аан Алахчын курдук ойуулаан таһаарда».

Тэрээһин Мэҥэ Хаҥалас улууһун Гаврил Колесов аатынан Олоҥхо дьиэтин күүһүнэн тэрилиннэ. Быйыл кинилэр  10 сылларын  бэлиэтииллэр. Бу бэлиэ даата чэрчитинэн Саха өрөспүүбүлүкэтин култуура уонна духуобунай сайдыы министиэристибэтигэр сурук суруйан, сөбүлэҥ ылан  маннык бастыҥ, киэҥ далааһыннаах тэрээһин буолан ааста.

Айта Васильева, Мэҥэ Хаҥаластааҕы Г.Г. Колесов аатынан  Олоҥхо дьиэтин уус-уран салайааччыта: «Бастакы улахан научно-практическай форуммут буолан ааста. Манна олоҥхону үйэтитии, тарҕатыы тула сүрдээх элбэх дьоннор кэлэн кыттыыны ыллылар. Ыҥырыылаах ыалдьыттар буолаллар: Башкортостан, Казахстан, Алтай Өрөспүүбүлүкэтиттэн ааттаах суоллаах учуонай дьоннорбут».

Үс түһүлгэнэн оллоонноон олорон олоҥхону толоруу буолла. Биир төрүттээх уруулуу норуоттарбыт бэйэлэрин үнүстүрүмүөннэригэр оонньоотулар.

Башкирдар - кубаирдарын, алтаайдар - кай чөрчөктөрүн уонна кыргызтар манастарын - саха дьонугар сэргэтигэр иһитиннэрдилэр. Түүрдэр уус-уран айымньыбыт маарыннаһар, биир ис хоһоонноох эбит диэн сөҕөн бардылар.