Хатаска "Саха сирин кыһынын дьэрэкээн суһума" диэн күрэх тэрилиннэ

121

"Күбэйэ" ансаамбыл улахан сыанаҕа тахсан, Өрөспүүбүлүкэ таһымнаах күрэххэ кыттаары бэлэмнэнэ сылдьар. Бүлүү улууһун Сыдыбыл сэлиэнньэтиттэн 6 киһилээх ансаамбыл кэлэн маҥнайгы хаар туһунан ылбаҕай ырыаларынан нэһилиэктэрин чиэһин көмүскээри тураллар.

 

Ия Чиларова, Бүлүү улууһун Чочу нэһилиэгин "Үрүҥ уолан" култуура киинин уус-уран салайааччыта: «Долгуйуубут үгүс буоллаҕа дии. Маннык куонкуруска хаһыспытын да кыттабыт онон арыый уопуттаахпыт, арыый холкубут. Үтүө суобастаахтык толорон, үчүгэй баҕайытык сынньанан, уопут атастаһан, дьону көрөн, бэйэбитин көрдөрөн диэн. Нэһилиэкпит аатын үрдүк таһымнаахтык көмүскүөхпүт диэн эрэллээхпит».

 

Ырыа күрэҕин "Кыһын Саха сириттэн саҕаланар" бэстибээл өрөгөй ырыатынан астылар. Өрөспүүбүлүкэ араас муннугуттан биирдиилээн толорооччулар, ансаамбыллар кэлэннэр, Саха сирин кыһынын туһунан ырыалары ыллаатылар. Уопсайа кыттааччылар 5 бөлөххө арахсан күрэстэстилэр. Дьүүллүүр сүбэ бастыҥы талла.

 

Алексей Калининскай, дьүүллүүр сүбэ чилиэнэ: «Кыһыны уруйдуур, көрдөрөр тиэмэҕэ ырыаларга. Коллективтар, биирдиилээн толорооччулар бэйэлэрин сатабылларын, көрүүлэрин, таҥастарын-саптарын оннук көрөммүт сыаналыыбыт».

 

Кыттааччылар сааһыттан тутулуга суох 4 араас көрүҥ күрэххэ кытыннылар. Үксүн нэһилиэнньэ кэтэхтэн үлэлэрин ыытан, Сахабыт сирин кыһынын араастан хоһуйдулар.

 

Онтон үҥкүү күрэҕэр кыттааччылар сыанаҕа тахсан уонна кэтэхтэн,  күрэхтэстилэр,  видео устан ыыттылар. Бэстибээлгэ, маны сэргэ, кыһын тиэмэтигэр араас оҥоһуктары эмиэ сыаналаатылар.  Ирдэбил быһыытынан кыттааччы кыһын араас көстүүтүн хаартыскаҕа туһэрэн ыытта.  Уопсайа тэрээһиҥҥэ 500 тахса кыттааччы көхтөөх кыттыыны ылла.

 

Татьяна Окорокова, "Саха сирин дьэрэкээн суһума" бэстибээл тэрийээччитэ: «“Саха сирин кыһынын дьэрэкээн суһума” диэн оҕолорго уонна улахан дьоннорго аналлаах бэстэбээл-куонкурус ыытыллар. Быйыл бу куонкуруспут 4-с төгүлүн ыытыллар. Быйыл “Кыһын Саха сириттэн саҕаланар” бэстибээл бырагыраматыгар киирэн Дьокуускай куорат култуураҕа уонна духуобунаска управлениятын өйөөһүнүнэн ыытыллар».

 

Күрэхтэһии 4-с сылын "Кыһын Саха сириттэн саҕаланар" бэстибээл чэрчитинэн ыытыллар. Сыллата кыттааччылар таһымнара үрдээн, ахсааннара элбээн иһэр.