Арассыыйа Үлэ дьоруойа Владимир Михайлов 70 сааһын туолла
Дьоруойу - дьоруойдуу көрсүү. Тыа хаһаайыстыбатын миниистирэ Артем Александров Үлэ дьоруйоун Владимир Африканович Михайловы бырабыытылыстыба иккис нүөмэрдээх дьиэтин киирэр ааныгар истиҥник көрүстэ. Оттон бүгүҥҥү көрсүһүү - ураты көрсүһүү. Күн бүгүн дьоруойбут, Саха сирин туруу улэһит, Сунтаар чулуу уолун үбүлүөйдээх бэлиэ күнэ. Владимир Михайлов 70 сааһын томточчу туолла.
Бүгүҥҥү үөрүүлээх куҥҥэ Владимир Африканович чугас, аймах-билэ дьоно, кэллиэгэлэрэ, тыа хаһаайыстыбатын өрө туппут, өрө көтөхпүт, урукку сылларга миинистирдии сылдьыбыт дьон, биир үөлэннээхтэрэ, билигин да улэлэһэ сылдьар дьоно эҕэрдэ-алгыс тылларын этэ кэллилэр.
Артём Александров, СӨ ТХМ миниистирэ: «Күн бүгүҥҥэ дылы үлэлии хамныы сылдьар биһиэхэ эдэр ыччаппытыгар уонна тыа хааһаайыстыбатын эйгэтигэр, ыанньыксыт салаатыгар холобур эрэ буолар. Уонна оттон түгэни туһанан биһиги тыа хаһаайыстыбатыгар үлэлии сылдьар дьон сэргэ аатыттан, министиэристибэ уонна тус бэйэм ааппыттан кытаанах доруобуйаны баҕарабын киниэхэ, барыта этэҥҥэ буоллун, санаатын, баҕатын хоту буоллун диэн тириэрдэбин».
Владимир Михайлов номнуо уйэ аҥарын төрөөбүт Кириэстээҕин хаһаайыстыбатыгар үтүө суобастаахтык улэлии-хамсыы сылдьар. Киһи кэрэмэһэ, улэһит бэрдэ киһи бэйэтин бириэмэтигэр, эстии-сатарыйыы кэмигэр ыһыктыбакка, бүгүн кини үлэлиир хаһаайыстыбата Өрөспүүбүлүкэҕэ саамай үчүгэй көрдөрүүлээх. Күн бүгүн кыстыкка 1400 төбө хороҕор муостаах кыстыкка этэҥҥэ киирдэ.
Владимир Егоров, "Кириэстээх" тыа хаһаайыстыбатын потребительскай кээпирэтиибин бэрэссэдээтэлэ: «Кириэстээх кээпирэтиибин махтала олус улахан. Тоҕо диэтэххэ саамай ыарахан кэмнэргэ, холобур мин 2012 сылга от ыйын онуһугар 5-ис дириэктэринэн киирбитим, онно 1,5 сыл кэриҥэ хамнаһа суох олорбуттар этэ. Киирэн баран сэтинньи ыйга былырыыҥҥы атырдьах ыйын хамнастарын уонна 1,5 сыллааҕы хамнастарын холбоон биэрбиппит. Ол оннук ыарахан кэмҥэ Болуодьа бэйэтин хамаандатын тутан, оҥорон таһаарыыны тохтоппокко ньиргиччи үлэлии олорбут».
Санатар эбит буоллахха, 2022 сыл бэс ыйын 12 кунугэр Москва Кириэмилин Георгиевскай саалатыгар Арассыыйа президенэ Владимир Путин Сунтаар улууһун Кириэстээх кээпирээтип бастыҥ ыанньыкыстыгар Владимир Михайловка Үлэ дьоруойун кыһыл көмүс сулуһун туттарбыта. Оттон бу сулуһу регионнартан аан бастакынан кини тутар чиэскэ тиксибитэ. Төһө да улахан наҕарааданы туттар, Владимир Африканович билигин да үлэтин барылын кубулуппакка үлэлиир
Владимир Михайлов, Үлэ дьоруойа: «Кыстыкка этэҥҥэ үчүгэйдик киирдибит. Оппут-маспыт барыта 100% туолла. Эппит-үүппүт эмиэ 100% туолла. Онон санаабыт үчүгэй. Билигин ынахпыт 10 кг оту, 25 кг сиилэс, 3-5 кг комбикорм сииллэр онон үүт ас дэлэгэй. Билигин 4 ынаҕым төрөөн турар. Бастыҥ ынаҕым 30 кг биэрэр, 45 ынахтаахпын, бииртэн 10-ча кг ыыбын. Саха сирин олохтоохторо мин санаабар ынаҕы, сылгыны, табаны отой күүстээхтик эспэккэ барытын иитэн үрүҥ аһынан, этинэн Саха сирин олохтоохторун хааччыйыаххайын, бары күргүөмүнэн үлэлиххэйин».
Үлэ киһини киэргэтэр. Оттон Саха сирин биир туруу улэһит, киэҥ туттар киһитигэр Владимир Михайловка өссө да уһун олоҕу, кытаанах доруобуйаны баҕарабыт. Кини үлэтэ кэнэҕэски эдэр ыччакка холобур эрэ буоллун.
