Туртаһы аһатыы былааннаахтык барар

Туртастар анал аһыыр сиргэ киирэн аһыы туралларын иниспиэктэрдэр камера устуутун нөҥүө көрөллөр. Сахабыт сирин тыйыс тымныы кыһынын кыра туйахтаах кыыллар тулуйбаттар, халыҥ хаары хаһан аһаабаттар. Онуоха кэбирэх оҥоһуулаах айылҕа оҕолоругар аһыыр сирдэри оҥорон кыһыны этэҥҥэ туоруулларыгар табыгастаах услуобуйа олохтонор.

Георгий Георгиевич сарсыардаттан саҕалаан аар тайҕа маанылаах кыылын аһатыы түбүгэр сылдьар. "Кэнкэмэ" кыылы-сүөлү сөргүтэр, элбэтэр учаастагар сыллата туртаһы аһатыыга күүстээх үлэ ыытыллар. Сүрүн аһылык эбиэс.

Георгий Говоров,  "Кэнкэмэ" булт баайын элбэтэр учаастагын егерэ: «Эбиэспитин эрдэттэн хаһаанабыт. Кутуйах сиэбэтин диэн үрдүк атахтаах харайар сиргэ тутабыт. Онтон билигин туртастар аһыыр сирдэригэр илдьиэхпит».  

Егердэри кытары тэҥҥэ Айылҕа баайын дирекциятын иниспиэктэрдэрэ үлэлииллэр. Туртас күннээҕи аһылыгар от, эбиэс, туус, хатыҥ сэбирдэҕэ итиэннэ минеральнай таастар киирэллэр.

Суугунуу сылдьар күөхтүү хаппыт сэбирдэхтэри туртас сөбүлээн сиир. Бу мээнэ хатарыллыбыт лабаалар буолбатахтар. Тууһанан, күлүккэ угуллан хатарыллар. Оччоҕо амтана, иҥэмтиэтэ сүппэт.

Иниспиэктэрдэр туртастары кэтиир, ааҕар биир сүрүн ньымалара фотоловушкалар буолаллар. Хас биирдии аһатар сир ахсын тураллар. Ойуур кыыла хамсаата да видеоҕа, хаартыскаҕа түһэрэр.

Георгий Говоров, "Кэнкэмэ" булт баайын элбэтэр учаастагын егерэ: «Хас биирдии бултуур сири туһанааччы бэйэтэ көрөр-истэр учаастактаах буолуохтаах сокуон быһыытынан уонна кыылын-сүөлүн ахсаанын ааҕа сылдьыахтаах. Аһары имири эһэр гына быултаабакка. Онтон кыыл ахсаанын ааҕарга бу курдук фотоловушкалар саамай табыгастаахтар».

Маннык аһатыы булт хаһаайыстыбатын ахсаанын элбэтиигэ, ойуурга кыыл ахсаана аччаабатыгар туһуланар. Итиэннэ адьырҕа кыыл сылгылары тардыыта суох буолар. Бөрөлөр ойуур иһиттэн бултаһан сиир астаналлар.

Иннокентий Слепцов, Айылҕа баайын харыстыыр дирекция булт салаатын салайааччыта: «Тымныы кэмҥэ туртас маассаба охтор кэмгэр маннык көрүллэр учаастактарга өлүү диэн суох. Бу биотехнисечкэй үлэ түмүгэ буолар. Туртас ахсаана үчүгэй. Сыллата судаарыстыбаннай мониторинг диэни оҥоробут».

Хас ойуур, учаастак ахсын хаһаайыттар тыа кыылын аһаталлара буоллар булт ахсаана элбиэ этэ. Холобур, былырыыҥҥы кэтээн көрүү түмүгэр Кэнкэмэ учаастагар 76 туртаһы аахпыттар.