Дьокуускайга "Вкус Якутии" ас бэстибээлэ саҕаланна

Быйылгы тэрээһиҥҥэ бастакытын кыттар бэстибээл саамай эдэр кыттааччыта Харысхан Васильев саха кухнятын аатыттан кыттыыны ылла. Ас эйгэтигэр кыра эрдэҕиттэн эбэтиттэн үөрэнэн сыстыбыт, оттон анал үөрэхтэнэн идэтин баһылаабыта 3-с сылын ааста. Тэрээһиҥээ бастакынан кытта таҕыста. Сүүһүнэн мустан олорор дьон иннигэр Чурапчы арыытыттан уонна өлүөхүмэ эриэхэтиттэн сахалыы саламаат астаата. Астыырга төһө да судургу курдук буолбутун иһин, Харысхан саламаата хайа да атын салааматтардааҕар минньигэс буолан биэрдэ.

Харысхан Васильев, "Вкус Якутии" бэстибээл кыттыылааҕа: «Дьиҥинэ сахалыы аһын оҕо сааспыттан астыыр буоламмын эбэм үөрэппитинэн сөбүлээн хааламмын номнуо үрдүкү асчыппын. Астыыр аһым ис миинэ буоллаҕа».

Бэстибээлгэ Саха сиригэр оҥоһуллан тахсар араас бородууксуйа көрдөрүүгэ турда. Мүөттээх ыҥырыа иитиитинэн 8-с сылын дьарыктанар Сэмэн Попов бэйэ мүөтүн ыалдьыттарга амсата аҕалла. Быйыл сайын айылҕа быйаҥнаан туран, элбэх мүөтү ылбытын кэпсээтэ.

Семён Попов, мүөттээх ыҥырыаны иитээччи: «Быйылгы дьылы олох үчүгэй сыл курдук сыаналыыбын, былырыыҥытааҕар олус үчүгэй, иллэрээ сыллаҕыга кыралаан тиийбэтэ. Быйыл үүнэйи үчүгэйдик үүннэ, ыҥырыалар үчүгэйдик үлэлээтилэр. Мүөт хомуура балай да баар».

Араас регионнартан кэлбит ыалдьыттарга саха сиэрин-туомун билиһиннэрдилэр, хас биирдии киһи сүһүөҕэр туран, саха кухнятын амтанынан эрэ буолбакка, алгыһын иҥэринэн, сытын-сымарын ылан барда.

Саха шеф-повара бу иннинээҕи сылларга бэйэтэ кыттааччы буола сылдьыбыт эбит буоллаҕына, быйыл кини дьүүллүүр сүбэ хамыыһыйатыгар киирдэ. Дьон сэргэ иннигэр балыгы хайдах кыһалларын көрдөрдө.

Николай Атласов, "Вкус Якутии" бэстибээл дьүүллүүр сүбэтин салайааччыта: «Бастаан саҕалааһын кэмигэр барыта таҥнары этэ. Ким остуола төһөнөн улахан, ол оччонон кыайар диэн өйдөбүл баар этэ. Билигин барыта буолуохтааҕын курдук өлүүтүнэн, философиялаах, өйдөбүллээх барар».

Маннааҕы оҥорон таһаарыы бородууксуйата үрдүктүк сыаналанар буолла. Ол иһин саха аһа тас дойду күрэхтэригэр эмиэ таһыма үрдээн, куруук үрдүк ситиһиилэнэр. Эдэр асчыттар аска сыһыаннарыгар бэйэлэрин ураты көрүүлэрин эбэн, ас эгэлгэтин дэлэтэллэр.

Игорь Глухарёв, "Вкус Якутии" бэстибээл кыттыылааҕа: «Бу соторутааҕыта шеф-повар буоллум. Сөбүлээн астыыр астарым – боростуой дьиэ аһа. Сморреброд диэн сокууска буолар миэнэ, бэйэбит лэппиэскэбитинэн, барыта бэйэбит киэммитинэн диэн оҥоробун».

Уон икки рестораннары нэдиэлэ иһигэр кэрийиэхтэрэ. Ыалдьыттары хайдах көрсөллөрүн, ас көрдөрүүтүгэр бары сүрүн көрүҥ киирбитин, ханнык бородууксуйалары туһаналларын көрүөхтэрэ. Маннык бэстибээллэр саха аһа бренд буолан тахсарыгар үрдүк үктэл буолаллар.