Чурапчы улууһун Сылаҥ нэһилиэгэр Тыа хаһаайыстыбатын күнэ ыытылынна

Сылаҥ нэһилиэгэр Тыа хаһаайыстыбатын күнэ ыытылынна. Нэһилиэк 5 түөлбэлээх уонна 3 учаастактаах. Хас тэрээһин аайы олохтоохтор кулууптарыгар түмсэн, дэриэбинэ көхтөөх олоҕор кытталлар. Биэс бэһиэлэй кыргыттар диэн бастакытын ыытыллар тэрээһиҥҥэ хамаанда аайы 5-тии кэрэ аҥаар күөн көрүстүлэр. Хамаандалар түөлбэнэн арахсан бэйэни билиһиннэрии түһүмэҕэр талааннарын көрдөрдүлэр.

Түһүмэхтэрэ бэрт интэриэһинэй буолан биэрдилэр. Ааспыт үйэ оҕолоро сэппэрээтэр хомуйуутугар түргэн туттунууларын, булугас өйдөрүн тургутан көрдүлэр. Ыһыылаах-хаһыылаах ыалдьааччылардаах тэрээһин кыттааччылары өссө долгутан биэрдэ.

Оҕо сааспытын ахта-саныы таарыйа маннык тыа сирин олоҕун күннээҕи дьыалатын күрэх оҥорон ыыппыттара олус кэрэхсэннэ диэн кыттааччылар бэлиэтииллэр. Үгэскэ кубулуйбут саха таптыыр дьарыга аны ыччат дьоҥҥо тиийэн тыа сирин кэскилин кэҥэтиэ. Бу киэһэ Чурапчы улууһа бэйэтэ оҥорон таһаарар үрүҥ аһыттан ас эгэлгэтэ астанна.

Валентина Сивцева, Сылаҥ нэһилиэгин олохтооҕо: «5 түһүмэх буолла: бэрээдэк, балык хатырыктааһына, күөрчэх оҥоруута, баттах өрүүтэ, сымыыт бэрсээһинэ уонна саамай долгутуулаах кэммитин лотореябыт сүрүн бирииһэ 30 тыһ. солкуобай. Ким сүүйэрин кэтэһэн долгуйа сылдьабыт».

5 түһүмэх түмүгүнэн Улахан күөл учаастак тэҥнээҕин булбакка, инники күөҥҥэ күөрэйэн тахсан, бастакы миэстэни сурунна. Кыайыылаахтарга нэһилиэк аатыттан туоһу сурук уонна өйдөбүнньүк бириис туттарылынна. Кыргыттар хамаандаларын бэрт интэриэһинэйдик сүүмэрдээн талбыттарын туһунан кэпсээтилэр.

Эльза Макарова, "Улахан күөл" учаастак олохтооҕо: «Биһиги Улахан күөлтэн сылдьабыт, биэс ыал кийииттэрэ буолабыт. Иннэ диэн ааппытын толкуйдаммыт кийииттэр буолан кэллибит. Тэрээһин наһаа үчүгэй, бэһиэлэй дии санаатыбыт».

Саһарҕа түөлбэ кыргыттара бочуоттаах үһүс миэстэни ылан үөрүүлэрэ муҥура суох. Хас биирдии түһүмэҕи үчүгэйдик ырытан, тугун ханныгын билэн, кэлэр сыл өссө үчүгэйдик бэлэмнэнэн кэлиэхпит диэн үллэстэллэр.

Парасковья Собакина, Сылаҥ нэһилиэгин олохтооҕо: «Олус тэрээһиннээхтик, өрө күүрүүлээхтик ааста. Сорох кэмҥэ кыра мөккүһүүлээх да буоллар, оттон күрэх диэн күрэх буоллаҕа дии. Тыҥааһыннаах сүрдээх үчүгэй күрэх буолан ааста. Бүгүҥҥү тыа хаһаайыстыбатын күнүнэн биһиги Сылаҥ нэһилиэгин туруу үлэһиттэрин итиитик-истиҥник Саһарҕа түөлбэ аатыттан эҕэрдэлиибит».

Олохтоохтор бэйэлэрин этиилэрин нэһилиэк салалтатыгар этэн, тута олоххо киллэрэн иһэллэр. Аны кэлэр сылтан сыл аайы ыытыллан, үтүө үгэскэ кубулуйуо диэн эрэннэрдилэр.

Алексей Собакин, А.А. Сивцев аатынан сынньалаҥ киинин дириэктэрэ: «Уопсайынан бүгүн тэрээһиммит олус көхтөөхтүк ааста. Элбэх көрөөччү, кыттааччы баар. Дэриэбинэбит бүгүн киэһээ сэргэхсийдэ».

Чурапчы улууһун биир улахан нэһилиэгиттэн биирдэстэрэ - Сылаҥ, тыа хаһаайыстыбатын олоҕор куруук көхтөөх кыттыылааҕын көрдөрдө. Сылгы, сүөһү иитиитин оройуттан туппут нэһилиэк кэлэр сылтан тэрээһинин өссө кэҥэтэн, тэрийэн ыытарын былаанныыр.