Судаарыстабаннай бырагырааммалары олоххо киллэрии көхтөөхтүк барар

Тыа сирин кыра нэһилиэктэригэр бүдьүөт харчыта тиийбэтэ баар көстүү, онон муниципалитеттар балаһыанньаттан араас бырагыраммаларга хапсан, нэһилиэктэрин тупсараллар. Биьиги устар бөлехпүт Үөһээ Бүлүү улууһун биир кыра, ол эрэн сайдыытынан ырааппыт нэһилиэгэр  - Быракааҥҥа сылдьан, бырагыраммалары хайдах олоххо киллэрбиттэрин илэ харахпытынан көрдүбүт.

Быракаан нэһилиэгэ үс Дьоруой ийэлэринэн киэн туттар, кинилэргэ сүгүрүйэн бүтүн уулусса ааттаммыта, маныаха нэһилиэк килбэйэр киинигэр "Ийэҕэ махтал" сквер. Бу бэлиэ сир тыа сирин киллэһиктээх сайдыыта судаарыстыбыннай бырагыраама чэрчитинэн олоххо киирбит.

Альбина Алексеева, Быракаан нэһилиэгин олохтооҕо: «Быракаан нэһилиэгэр үс Дьоруой ийэ үрдүк аатын ылбыт Алексеева Мария Степановна, Николаева Мария Тарасовна уонна Алексеева Ульяна Игнатьевна. Элбэх оҕолоох чулуу ийэлэрбитинэн киэн туттабыт. Ыраахтан чугастан биир дойдулаахтарбыт үлэлии-хамсыы сылдьар эдэр идэлээх үлэһиттэрбит биир сырдык санааннан салайтаран ийэ үрдүк аатыгар сүгүрүйэн “Ийэҕэ махтал” үтүө санаа аахсыйаҕа кыттыһан 350 тыһ. сууммаҕа оҕону көтөҕөн олорор ийэ пааматынньыгын Николай Чоччасовка оҥотторбуппут».

Сквер ортотугар ийэ киһи оҕотун көтөҕөн олорор мэҥэ тааһын, Өрөспүүбүлүкэҕэ биллэр скульптор Николай Чоччасов айан-тутан таһаарбыт. Нэһилиэк эдэр ыччата, дьоно-сэргэтэ субуотунньукка тахсан, сквер силигин сиппит.

Алексей Оконосов, "Быракаан" МТ баһылыга: «ППМИ бырагырааматынан ыһыахтыыр сирбин оҥорбутум, учууталлар олорор уопсайдарын өрөмүөннэттим, трактор кэлбитэ уонна бу кыбартаалынай хочуолунай оҥорбут сылбар, оскуолаҕа барар уулусса ититиитин ылбытым. Ааспыт сылга икки ППМИ ылбытым онно Быракааҥҥа кэлэр суолум икки муостатын оҥоттордум уонна бу биир тутулла турар КСК күрүөтүн ол бырагырааманан ситистим».

Маны кытары олохтоох көҕүлээһиннэри өйөөһүн бырагырааманан, нэһилиэк бочуоттаах олохтоохторун мэҥэ тааһа турбута. Уонна сүрүн болҕомто Аҕа дойдуну көмүскээччилэргэ паамытынньыктарыгар.

Алексей Оконосов, "Быракаан" МТ баһылыга: «Студотряд бырагырааматыгар киирэммит бу Аҕа дойду Улуу сэриитгэр Быракаан нэһилиэгиттэн бырбыт бэтэрээннэрбитигэр анаммыт паамытынньыкпытын сөргүппүппүт. 1980 сыллардаахха мас оҥоһуута тутуллан турбута, ону студотряд бырагырааматынан биһиги күрүөтүн оҥордубут, тротуарнай плитка тэлгээбиппит уонна Умуллубат уот туруордубут».

Бу курдук судаарыстыбаннай бырагырааммалары сөптөөхтүк туттан, наадалаах сиригэр туһанан, нэһилиэк үүнэр-сайдар.