Саха сиригэр түөкүттэргэ түбэһэн биэрии күнтэн күн аччаабат

Албыннатыы, түөкүн хара тылыгар итэҕэйии тохтообот. Хастыы эмэ мөлүйүөнүнэн суумманы, хомойуох иһин, ытыска ууран биэрэбит. Маннык хомолтолоох түбэлтэҕэ түбэспит Дьокуускай куорат олохтооҕо биһиэхэ туох баарынан  кэпсээтэ. Биллэрии ситимигэр фотоаппарат атыылаары таһаарбытын, түөкүттэр Покровскайга баарбыт диэн албыннаан, курьеры туһанарга сүбэлээбиттэр уонна сигэ ыыппыттар.

Күн аайы түөкүттэри утары үлэлиир салааҕа уонунан сурук, сайыбылыанньа киирэр. Дьоҥҥо-сэргэҕэ төһө да сэрэтии үлэтэ нэдиэлэ аайы ыытылыннар, син биир киирэн биэрии алҕастара аҕыраабат. Биллэрии эйгэтигэр уонунан тыыһынчалары уорар эбит буоллахтарына, эрийэн тиийэн сорох ардыгар хастыы эмэ мөлүйүөнү олордон ылаллар.

Валентин Удинов, СӨ Ис дьыала министиэристибэтин пресс-сулууспатын референэ: «Куйаар ситимигэр эҥин-араас биллэрии, атыы-эргиэн сайтарыгар, ону таһынан хаччы үбүлээһиҥҥэ уган барыыстанан, спортка туруорсан хаччыта сүүй диэн албыннаан сымыйа түөкүттэр оҥорбут рекламаларыгар итэҕэйэн дьон киирэн биэрэр».

Тас регионнартан салайан олорор түөкүттэр, куйаар ситимигэр үрдүк хамнастаах үлэҕэ курьерга наадыйабыт диэн биллэриини тарҕаталлар. Дьэ ол онно харчыга ыктарбыт киһи аадырыстан аадырыска дьон малын таһабын дии санаан, ким эрэ бүтэһик харчытын түөкүттэр илиилэригэр илдьэн биэрэр.

Түөкүттэр туһунан тэринэн олорор биир тиһик буолаллар. Үлэлэригэр курдук күн аайы бэйэлэригэр, чопчу суумманы туруоран, дьонтон уоран ылаллар. Уоран ылар албастара араастаах. Төлөпүөн нүөмэригэр эрийэн кэлэн, бааҥҥа баар харчыларын түөкүттэртэн куоттарабыт диэн албыннаан, дьону ыксаллаах быһыыга киллэрэн, итэҕэтэн, төттөрүтүн бэйэлэригэр көһөртөрөллөр. Кэники бириэмэҕэ биллибэт нүөмэрдэртэн, эбэтэр олох даҕаны маннааҕы нүөмэртэн эрийэн кэлиилэрэ элбээтэ.

Түөкүттэр урут уруккуттан бааллара, оттон бу бүтэһик биэс сыл иһигэр уоруулара өссө тэтимирэн, саҥа таһымҥа таҕыстылар. Үс мүнүүтэ иһигэр хайа баҕарар киһини тылларыгар киллэрэн, эбэтэр маннааҕы тэрилтэ үлэһитинэн кубулунан, сиэптэрин тэбээн ылаллар. Биир даҕаны баан, сокуон үлэһитэ төлөпүөҥҥэ кэлбит куоду, хаарта нүөмэрин дьонтон көрдөөбөт. Бу сыл көрдөрүүтүнэн түөкүттэргэ түбэһии өрөспүүбүлүкэбитигэр 1800-тэн тахса, оттон баан хаартатыттан харчы уоруу 500-ттэн тахса түбэлтэҕэ бэлиэтэннэ.

Иннокентий Тимофеев, СӨ ИДьМ силиэстийэлиир салалтатын сүрүн дьыалаларга: «Биир да полиция, баан, ФСБ, суут үлэһиттэрэ хаһан даҕаны эрийэннэр СМС куод көрдөөбөттөр, харчы ыытыҥ диэбэттэр. Баан, паспорт көрдөрүүлэрин олох хаһан да көрдөөбөттөр, ону биирдэ өйдүөххэ наада».

Ститистика көрдөрөрүнэн, саха сирин олохтоохторо бу сыл устата 270 мөлүйүөнтэн тахса сууммаҕа харчыларын уордардылар. Киһи өйүгэр баппат элбэх харчыны уоран, түөкүттэр дьон олоҕун огдолуталлар.