Саха сирин тимир ууһа аан дойдутааҕы быстаапкаҕа ситистэ

Дабайар уус тимири таптайар лыҥкынас тыаһа мастарскыай иһин толорор. Николай Потапов бу күннэргэ Москва куоракка бүтүн аан дойдутааҕы быыстаапкаҕа ситиһиилэхтик кыттан кэллэ. Сахабыт сирин быһаҕын өссө биирдэ аан дойду таһымыгар ааттатан, 300-чэкэ араас таһымнаах хампаанньалар, кыттааччылар истэриттэн Николай Ильич аата дорҕоонноохтук ааттанна, кини оҥоһуктара дьон-сэргэ биһирэбилин ылла.

Николай Потапов, "Металл Экспо" аан дойдутааҕы быыстапка дипломана, "Кыһыл көмүс боккуоп" бэлиэ хаһаайына: «Наҕараадалааһыҥҥа ити үлүгэр элбэх кытааччылартан миэхэ диплом биэрдилэр. Тимир уустар түмсүүлэрин аатыттан кытынным, Саха-Арктика диэн быһах».

Николай Потапов быһах араас көрүҥүн барытын оҥорор. Өрөспүүбүлүкэҕэ биллэр-көстөр тимир ууһа. Хас биирдии уус ураты ньымалаах, туспа кимиэхэ да хатыламмат сатабыллаах буолар диир.

Николай Потапов, "Метал Экспо" аан дойдутааҕы быыстапка дипломана, "Кыһыл көмүс боккуоп" бэлиэ хаһаайына: «Тууратын тардыахха наада, тардан баран кэлин уһунунан көрөн быһыахха наада. Ол быһан баран төбөтүн уонна биитин тардаллар».

Хас биирдии тимир састааба, хаачыстыбата ураты. Хас улуус, үрэх, өрүс ахсын араастаһар. Ону уус бэйэтигэр сөп түбэһэри, табыгастааҕы талар.

Саха төрүт үгэһин утумнаан илдьэ сылдьаачыларга анаан бүтэһик сылларга күүстээх көмө, өйөбүл баар буолла. Сертификат ылыытыгар, быыстапкаларга, бэстибээллэргэ кытталларыгар үбүлээһин оҥоһуллар. Хас сылын ахсын Ил Дархан анал стипендиятын олохтонор буолла. Быйыл сэтинньи 23 күнүгэр 6 бастыҥ тимир ууһа ааттаныаҕа.

Афанасий Ноев, СӨ култуура уонна духуобунай сайдыы миниистирэ: «Саха сиригэр норуот маастардарын, тимир уустарын уонна оһуохайдьыттары, олоҥхоһуттары өйөөһүн сүрдээх ситимнээхтик уонна кэскиллээхтик ыытыллар диэн этиэххэ наада. Ол курдук Саха өрөспүүбүлүкэтин Ил Дарханын анал стипендиялара олохтонон тураллар».

Ол эрэн тимир уустара биир улахан баҕа санаалара күн-бүгүнүгэр диэри туолбакка сылдьар. Түмсүү дьиэтин туруорсубуттара ыраатта, Сахабыт сирин уустара биир сиргэ мустан санаа үллэстэр, уопут атастаһар түһүлгэни тэринэнэн, ситимнээх үлэни ыытарга дьулуһаллар.

Александр Терентьев, тимир ууһа, Саха сирин тимир уустарын түмсүүтүн толорооччу дириэктэрэ: «Тимир уустар түмсэр сирбит суох, онтукайбыт тутуллуннар бэрт буолуо этэ. Ил Дарханныын кэпсэтиигэ өйүөм диэн барбыта, онон кэтэһэбит».

Саха төрүт дьарыгын сөргүтүү, былыр былыргаттан илдьэ кэлбит төрүт үгэспитин киэҥ араҥаҕа тиэрдии, эдэр кэнчээри ыччаты уһуйуу - билиҥҥи кэм уустарын сүрүн соруга, тутаах суолтата буолар.