Өрөспүүбүлүкэ үрдүнэн дьаҥ, тумуу ыарыытын көрдөрүүтэ 20,5% үрдээбит.

Саха сирин үрдүнэн күһүҥҥүттэн, ыарыы көбөр кэмнэрин саҕатыттан ол эбэтэр 46 нэдиэлэ түмүгүнэн 9364 дьаҥ, тумуу сытыытык киирэн ыарыытыннарбыт түбэлтэлэрэ тахсыбыт. Ыарыы ордук оҕолор уонна аҕа саастаах дьон истэригэр баара бэлиэтэнэр. Лабараторнай чинчийии түмүгүнэн Өрөспүүбүлүкэҕэ грипп А\Н3N2 ыарыыта элбээбит, итиэннэ парагрипп, аденовирус, РС-вирус уонна короновирус.

Күн бүгүн Өрөспүүбүлүкэ үрдүнэн грипп утары дьон иммунитетын күүһүрдэргэ үлэ барар. Ол курдук, уопсайа 447 тыһ. тахса киһи быһыы ылла, онтон 131 650 оҕо, 316 тыһ кэриҥэ улахан дьон.

Оттон күн-дьыл уларыйар кэмигэр ыалдьан баран, ыарыыларын улаханнатан кэбиспит, эбэтэр хамсык, атын этиологиялаах вируска хаптарбыт дьон билигин тыынар уорганнар салааларыгар сыталлар. Манна чопчулаан эттэххэ, бу салаа 2004 сыллааха  туспа отделение быһыытынан арыллан улэлээбитэ номнуо 19 сыла, эһиил төгүрүк даатата. Күн бүгүн манна үксэ ыарыыларын улаатыннаран кэбиспит дьон сыталлар.

Екатерина Татаринова, Өрөспүүбүлүкэтээҕи клиническэй балыыһа тыынар уорганнары эмтиир салаатын пульмонолог-бырааһа: «Отделениябыт толору. Ордук пневмониялаах, астмалаах, хроническай обструктивнай тыҥа ыарыылаах дьоннор сыталлар. Ыарыһахтар саастара 18-тан 90-ҥа дылы сыталлар. Тыҥаларын ыарыылара бэргээн киирэллэр, эбэтэр суһал буоллаҕына пневмониялабыт дьоннор киирэллэр. Эмпит барыта баар. Үчүгэй антибиотиктарынан, саҥа ингалятордарынан туттабыт, ыарахан туруктаах дьоннор кислородунан тыыналлар».

Маныаха хамсык бэйэтин биллэрэр. Билигин бу СО-19 вирус салгыҥҥа баар. Онон тустаах салаа реанимациялары кытары ыкса үлэлэһэ олорор.

Елена Павлова, Өрөспүүбүлүкэтээҕи клиническэй балыыһа анестизиология уонна реанимация салаатын сэбиэдиссэйэ: «Ыарыһахтар сыл аайы элбээн иһэллэр. Коронавируснай инфекция ыарахан баҕайытык киирдэ биһиэхэ. Билигин кэминэн кэлэр ыарыылар элбииллэр, барыларын эмтиибит».

Доруобуйа харыстабылын министиэристибэтэ нэһилиэнньэ дьаҥҥа ылларбатыгар туһулаан, үгүс дьон тоҕуоруһар сиригэр, мааскалаах, илиигитин сууна сылдьаргытыгар ыҥырар. Итиэннэ доруобуйаны көрүнэ сылдьары сүбэлиир.

Татьяна Барашкова, пульмонолог-быраас, Өрөспүүбүлүкэтээҕи клиническэй балыыһа тыынар уорганнары эмтиир салаатын сэбиэдиссэйэ: «Эти-хааны эрчийии оҥороон, сөптөөхтүк аһаан. Витамин курсун ылыахха сөп. Пневмония утары билигин пневмококковай инфекция диэн оҥоһуллар. Элбэх сыл буолла оннук оҥоһуллубута. Пневмо23 диэн быһыы баар, ону таһынан Превенар диэн быһыы баар. Бу сыл аайы оҥоһуллар быһыы буолбатах. Холобура Пневмо23 5 сылга биирдэ оҥоруохха сөп, Превенары биирдэ эрэ оҥоһуллар».

Маны тэҥэ доруобуйа харыстабылын министиэристибэтэ грипп дьаҥ утары быһыы ылары тоһоҕолоон этэр.