Көҥүлэ суох сиринэн өрүһү туораан хас да массыына ууга түстүлэр

Хатас аннынан Өлүөнэ эбэни туоруур аартыкка эппиэтинэстээх тэрилтэ суолу бүөлүү анал хааччахтары туруортуур. Өрүс суола сабыылаах кэмигэр биир да массыына манан ааһыа суохтаах. Аллараа Бэстээх Дьокуускай хайысхатыгар тахсыбыт быһылаан кэннэ хонтуруол өссө кытаатар.

Көҥүлэ суох суолунан туораан испит массыыналар ууга түстүлэр. Дьолго биир да киһи эмсэҕэлээбэтэ. Суоппардар уонна олорсон испит дьон  көлөттөн тута тахсан быыһаннылар. Бу быһылааннар кэннэ Саха сирин прокуратурата куораттар уонна улуустар прокуратуралар көҥүлэ суох муус суолларыгар тахсыыларын хонтуруоллуулларын модьуйда.

Онтон Хатас Павловскай туорааһыныгар  ыйааһын хонтуруола  суол арыллыан иннинэ көҥүлэ суох туорааччылары маныыр.

Семен Кононов, СӨ суол салалтатын сүрүннүүр инженерэ: «Манна икки инженер олороллор, ыйааһын хонтуруолун киэннэрэ. Олор түүннэри-күнүстэри үлэлииллэр. Хонтуруоллууллар кими да киллэрбэт гына. Билигин муус чараас турар. Бэҕэһээҥҥи туругунан 3 массыына түстэ Аллараа Бэстээхтэн куоракка киириигэ. Ол иһин манна биһи өттүбүтүттэн биир да массыынаны киллэримиэххэ наада, дьон доруобуйатын туһугар».

Хатаһынан муус суолун 4 сылын оҥорор «Мехдорстрой” тэрилтэ 4.5 км. бөһүөлэктэн кытылга диэри суолу оҥордбут, суол бэлиэлэрин туруорбут. Быйыл дьыл хойутаан өрүс тоҥуута  бытаарда. Инники сылларга кыра уйуктаах массыыналарга көҥүл баччаларга бэриллэр эбит буоллаҕына, быйыл суолу оҥорооччулар саҥардыы уунан кутан халыҥатыыга киирбиттэрэ эрээри аны күүстээх силлиэ түһэн тардылыннылар.

Еремей Скрябин: "Мехдорстрой" тэрилтэ маастара: «Хаар түһэр кэмигэр ыарахаттар үөскүүллэр. Халыҥатыы оҥорорго эрэйдээх соҕус. Аннараа хайдыһыыга 4 балаһа барыахтаах, 2 сүрүн, 2 саппаас. Онтукабытын бэҕэһээ араардыбыт».

Эбэҕэ туох да көстүбэт, барыта өрө ытыллан олорор. Онон өрүскэ үлэ бу кэмҥэ тохтуур. Бу иннинээҥи күн куппут уулара оол хараарар көстөр диэн маастар ыйар. Билигин бу бэтэрээ өттүгэр хас балаһа оҥоһуллара быһаарыллар, биир кэтит эбэтэр урукку дьыллар курдук икки.  

Күн-дьыл туруга мэһэйдиир диэн суол оҥорооччулар олорон биэрбэттэр. Айан дьоно тохтоон ааһар сирдэрин оҥоруу, харабыл олоруохтаах болуогун туруоруу курдук бытархай үлэлэри үмүрүтэллэр. Суол арыллар болдьоҕо ыгар, онон халлаан көннө эрэ үлэ күөстүү оргуйуохтаах.  Хатаһынан сырыы 3 туоннаҕа барыллаан ахсынньы 11 күнүгэр арыллыаҕа.

Онтон быыһык кэмҥэ Һатай - Төхтүр хайысханан мууһу солуур аал арыаллаах баржалар сырыылара салҕанар. Айылҕа күүһүн кыайар кыахтаах баараҕай аал ахсынньы саҥатыгар диэри сылдьыаҕа.