Өрөспүүбүлүкэ хаһаайыстыбаларыгар кыстык салҕанар

Үөһээ Бүлүү Быракаана тыа нэһилиэктэрин тэҥинэн тыа хаһаайыстыбатын эмиэ өрө тутар. Манна дэриэбинэҕэ биир тарбахха баттаннар, улэһит уол Григорий Миронов хаһаайыстыбата күн бүгүн биир бөдөҥ. Оттон эдэр киһи сүөһү иитиинэн дьарыктаммыта 5 сылыгар барбыт. Төһө да ыарахаттары керүстэр, үлэтин ыһыктыбака улэлии сылдьар

Григорий Миронов, бааһынай хаһаайыстыба салайааччыта: «2018 сыллаахха грааҥҥа кыттамын сүөһү иитэр буолбутум. Хотон туттубутум, сүөһү атыыласпытым, трактор ылыммытым. 5 сыл буолла номнуо сүөһү тутан турарым. Элбээбитэ 70 төбө буола сылдьыбыта, билигин 50 төбө баар. Үүппүтүн туттара сылдьыбыппыт эрдэ, икки сыл буолла тутан бүппүттэрэ. Сүрүн харчы киллэрэр үүт этэ».

Чахчы, бу сытыы ыйытыы үгүс тэрээһиннээх хаһаайыстыбалаахтары хаарыйда. Ону ол диэбэккэ тыа дьоно үлэлии хамсыы сылдьаллар.

Былырыын хаһаайыстыба оттуур сирэ ууга баран, салайааччы Григорий Миронов отун тыа хаһаайыстыбатын министиэристибэтин өйөбүлүнэн атыыласпыта. Быйыл ол сиригэр от үүммэккэ, онон-манан илиинэн оттоон, олохтоох уолаттары көмөлөһүннэрэн, онно хамнас төлөөн, кыстык отун былаанын толордо.

Никифор Николаев, "Быракаан нэһилиэгэ" МТ дьаһалтатын сүрүннүүр исписэлииһэ: «Быракаан нэһилиэгэ 2023-24 кыстыкка этэҥҥэ киирэн эрэр. Билиҥҥи күрдүрүүлэринэн сүөһүбүт 160, ыанар ынах 37, сылгыбыт 256. Быйылга от хаамыытынан 380 туонна оттомута».

Григорий Миронов төһө да үгүс кыһалҕаны көрүстэр эдэр киһи иннин хоту эрэллээхтик баран, Быракааныгар тыа хаһаайыстыбатын сайыннарар. Тохтоон хаалбат соруктаах, онуоха улахан баҕа санаата, оттуур сир кыһалҕатын быһаарыыга сытар.

Григорий Миронов, бааһынай хаһаайыстыба салайааччыта: «Чугас ходуһам суох, барыта манна үрэх баһа буолан оттуур сир ыарахан, ыал аайы ыарахан, миэхэ эрэ буолбатах. Манна иитэргэ - улахан алааспыт, ходуһабыт суох».

Оттон быйылгы кыстыкка Өрөспүүбүлүкэ үрдунэн 206 тыһ. тахса ынах-сүөһү этэҥҥэ киирдэ. Быйылгы төрөөһүн былырыыҥыны кытары тэҥнээтэххэ 9,3% аччаан, билигин 58 470 төбө төрүөх биэрибит. 2023-24 сыллааҕы кыстыкка 502 туонна эбии аһылык көрүлүннэ диэн тыа хаһаайысытыбатын министиэристибэтэ иһитиннэрэр.