Халтыраантан сылтаан араас суол быһылааннара тахсаллар

Ленскэй, Өлүөхүмэ оройуоннарыгар күн бэҕэһээ ардахпыт сайыҥҥылыы кэлэн курулута турарын көрөҕүт. Сэтинньи ыйга - бу дьикти көстүү. Уруккута эбитэ буоллар аан-даам тымныылар түһэннэр -40 кыраадыска диэри тымныйан, киин куорат олохтоохторо туман быыһыгар, тыа сирин олохтоохторо тыгар сулус анныгар кырыа кыһын тымныы тыынын билбиттэрэ ырааппыт буолуо этэ.

Күн-түүн халтыраантан сылтаан өрөспүүбүлүкэ үрдүнэн суол саахалларын туһунан араас иһитиннэриилэр киирэ тураллар. Аҥардас ааспыт нэдиэлэҕэ киин куоракка 87 араас эчэйиилээх тимир көлөлөр харсыһыылара буолла.

Сымнаҕас кыһын саҕаланна диэн дьон-сэргэ үөрэр эрэ. Ол эрэн ичигэс халлаан мөкү өрүтэ - халтыраан. Сатыы дьон эчэйиитэ эмиэ улаатта. Холобур, бу куораттааҕы травматологическэй пуун бүгүҥҥү хартыыната. Быраастарга халыҥ уочарат.  Аҥардас ааспыт нэдиэлэҕэ халтыраантан сылтаан 143 киһи эчэйиилэри ылан суһал көмөҕө наадыйан балыыһаҕа көрдөрбүт.

Геннадий Семёнов, Өрөспүүбүлүкэтээҕи 2№-дээх балыыһа суһал көмө киинин травматология пуунун травматолог-бырааһа: «Халтыраан саҕаланыаҕыттан биһиэхэ 774 киһи халтырыйааһынтан оһоллонон көрдөрбүт. Уопсайа улууссаҕа ылыллыбыт эчэйииннэн 2125 киһи көрдөрбүт. Сүрүннээн бүлгүрүтээһин уонна илии тостооһуна буолааччы».

Бүтэһик сылларга кыһыммыт хойутуур буолбутун, халлааммыт сылыйбытын нэһилэнньэ эмиэ бэлиэтии көрбүт. Маннык күн-дьыл туруга үчүгэй дииллэр.

Былырыын баччаларга, сэтинньи 16-17 күннэригэр 30 кыраадыска тиийэ тымныйбыт, онтон 24 чыыһылаттан күүстээх тымныылар түспүттэр. Быйылгы бастакы күүстээх тымныылар сэтинньи ый бүтүүтэ күүтүллэллэр диэн күнү-дьылы кэтээн көрөөччүлэр иһитиннэрэллэр.

Саргылаана Никитина, Дьокуускайдааҕы күнү-дьылы кэтээн көрөр сулууспа күн-дьыл туругун сылыктыыр салаа салайааччы: «Өрөспүүбүлүкэ үгүс улуустарыгар сэрэдэттэн тымныйан барыаҕа. Нэдиэлэ бүтүүтэ туманнаах тымныылар түһүөхтэрэ. Температура түүнүн -32, -37, хотугулуу-арҕаа -37, -41, күнүһүн -28, -33,  арҕаа -22, -27 кыраадыс тымныы буолара күүтүллэр»

Хас да сыллаах өр кэмнээх кэтээн көрүүлэри кытары тэҥнээтэххэ быйылгы дьыл уратытын тустаах исписэлиистэр бэлиэтииллэр. Бу барыта арҕаа Сибииртэн киирбит циклон дьайыыта буолар. Дьиҥэ 2023 сыл 2021 сылы кытары араа-бараа буолуохтаах этэ, ол эрэн быйылгы дьылбыт элбэх дьиктини аҕалла.