Алыптаах холбука. Өрөспүүбүлүкэтээҕи куукула оҥоруу күрэҕэ ыытылынна

Саха сирин кырыа кыһынын, самаан сайынын уруһуйугар түһэрбит, таҥаһыгар тилиннэрбит дизайнер, үбүлүөйдээх бастакытын ыытыллар "Алыптаах холбука" күрэҕэр өрөспүүбүлүкэ бары муннуктарыттан кытыннылар. Горнай улууһуттан сылдьар ИЗО уонна черчение учуутала будуарнай куукуланы оҥорон 1-кы истиэпэннээх диплом ылары ситистэ. Эрдэ атын истииллээх кыра куукуларлары оҥоро сылдьыбыт, оттон куонкуруска ураты бэйэтигэр саҥа истиили арыйбыт.

Галина Дьячковская, Горнай улууһун олохтооҕо: «Маҥнай быһыытын оҥорорбор, таҥаһын таларга элбэх бириэмэ барар. Көрдүүгүн ханнык таҥас түбэһэрин, кытыы быатын, дьүһүнүн».

Муҥутуур кыайыылааҕынан Мэҥэ Хаҥалас Төхтүр нэһиэлигиттэн сылдьар Дария Ноговицына буолла. Кини 6 хаски ыттаах Чысхаан оҕонньору оҥорон дьүүллүүр сүбэ уонна көрөөччүлэр үрдүк биһирэбиллэрин ылла. Куукуланы оҥоруунан 2014 сылтан интэриэһиргээн барбыта, оттон "Дьүкээбил анныгар" диэн дьүһүйүүтүн 2018 сыллаахха оҥорон саҕалаабытын иһитиннэрдэ.

Дария Ноговицына, "Алыптаах холбука" күрэх кыайыылааҕа: «Чысхааны 2018 сыллаахтан оҥорон саҕалаабытым. Миигин Августина Николаевна Чысхаана дуоһуппута ити үлэни оҥорорбор. Көрөн баран наһаа сөбүлээбитим. Сувенирнай Чысхаан оҥордохпо хайдах буолуой диэн санааммын оҥорбутум. Маҥнайгы куукулам диэхпин сэп, тоҕо диэтэргэ ити кэнниттэн мин номнуо оҥорон киирэн барбытым».

Августина Филиппова бэйэтин айар үлэтинэн элбэх киһиэхэ холобур буолар. Кыра сааһыттан айар-тутар буолан, улаатар сааһыгар бэйэтэ туспа ураты буочарданан барар. Сахатын сирин мааны айылҕа кэрэтин сөҕөн, үрдүктүк сүгүрүйэрин бэлиэтиир.

Августина Филиппова, СӨ култууратын үтүөлээх үлэһитэ: «Иэйиим айылҕаттан буоллаҕа. Айылҕаны сөбүлээн, таптаан. Сибэкки буоллун, мас буоллун, уу буоллун, үөн-көйүүр буоллун, дьиктиргээн, ол онтон тахсар буоллаҕа. Куонкуруһу ыччат сайдарыгар, ыччат үлэтэ өрө күүрэн, өссө сайдан, аан дойдуну кэрийэн Саха сирин ааттата турдун диэн».

Куонкурус саамай эдэр кыттааччыта 14 саастаах, оттон саамай аҕа саастааҕа 64-тээх. Манан талаан сааһынан кээмэйдэммэтин, барыларыгар биир тэҥник олох хайа баҕарар кэмигэр тылларын туоһулаатылар. Бастакы сырыыга маннык элбэх кыттааччыны күүппэтэхпит диэн тэрийэр бөлөх бэлиэтээтэ.

Анна Еремеева, "Алыптаах холбука" күрэх тэрийээччитэ: «44 сайаапкаттан бу быыстапка5а 12 куукула кэлиэхтээх, онтон 2 үлэ кэлбэккэ турар. Биир кыттааччы композициятыгар 2-3 куукулалаах».

Ахсынньыга, сыл бүтүүтэ Августина Николаевна кэнники 5 сыллаах айар үлэтин түмүгүнэн  тэрээһин оҥорон дьонугар-сэргэтигэр көрдөрүөҕэ. Муода устуоруйатыгар кыһыл көмүһүнэн суруллар сүдү талааннаах худуоһунньук айар үлэтэ бу курдук салҕанар.