Саахалга түбэспиттэргэ көмө киинэ сыл устата тыһыынчанан киһи олоҕун быыһыыр

Бүгүҥҥү халлаанынан суһал айаҥҥа быраас уонна фельдшер көттүлэр. Көтүү этэҥҥэ ааһан, ыйыллыбыт бириэмэҕэ Бүлүү улууһун киинигэр, Бүлүү куорат аэропуордугар көтөр аал балаһаны булар. Тута санитарнай авиация үлэһиттэрин олохтоох суһал көмө массыыната көрсөн, көтөн кэлбит эмчиттэри Бүлүү киин балыыһатыгар тириэрдэллэр. Оттон манна даҕатан,эттэххэ, бүгүҥҥү рейс улахан эчэйиини ылбыт эдэр киһини быыһааһыҥҥа туһуламмыт.

Алексей Григорьев, Бүлүү улууһун киин балыыһатын хирург-бырааһа: "Суол оҥорооччу улахан эчэйиини ылбытын туһунан туһунан иһитиннэрии киирбитэ. Ону биһиги суһал биригээдэбит тута  хирургия салаатыгар аҕалбыта. Эмсэҕэлээччи түүн эпэрээссийэлэммитэ, билигин туруга ыарахан".

Чахчы, баара суоҕа 24 эрэ саастаах эдэр киһи улахан эчээйиини ылбыт. Кэлбит эмчиттэр уол туругун көрөн, сыаналаан баран, эчэйээччи үгүс хааны сүтэрбит буолан,  манна Бүлүү балыыһатын реанимационнай салаатыгар хаан куттулар. Оттон салгыы ыраах айаҥҥа бэлэмнэнии буолла.Манна доруобуйа харыстабылын үлэһиттэрэ бары биир сомоҕо буоланнар, кыһаллан-мүһэллэн, ыарахан туруктаах ыарыһаҕы көтүүгэ олус үчүгэйдик бэлэмнээтилэр.

Маны тэҥэ бу күн санитарнай авиацияны кытары өссө биир, сүрэҕинэн ыалдьар Бүлүү улууһун олохтооҕо, кэрэ аҥар барыста. Онон көтөр аал пуордугар 2 суһал массыына ыарыһахтары илдьэ барда. Сып-сап айаннаан сөмөлүөккэ тиийэн, ыарыһахтары сэрэнэн анал миэстэҕэ сытыардылар

Үөһээ халааҥҥа тахсан иһэн, эчэйээччи уол хаанын баттааһына эмискэ тахсан, эмчит уолаттар туох баар үөрүйэхтэрин туһанан, эдэр киһини оннугар түһэрэллэр.  Ол да буоллар көтүү кэмигэр быраас уонна фельдшер ыарыһахтан ырааппаттар.

Виктор Потапов, СӨ саахалга түбэспиттэргэ көмө киинин реаниматолог – бырааһа: "Бүлүү куораттан санитарнай авиацияҕа сайаапка киирбитэ. Улахан эчэйиини ылбыт 24 саастаах эдэр уолу Өрөспүүбүлүкэтээҕи 2№-дээх балыыһаҕа илдьэн иһэбит".

Үрүҥ халааттаах аанньаллар биирэ Чурапчы, иккиһэ Мэҥэ Хаҥалас уолаттара. Үлэлиирбит тухары араас ыарыһахтар, үгүс түбэлтэлэр буолбуттара диэн көтүү кэмигэр кэпсииллэр. Бу үлэҕэ киһи тоҥ мэйиилээх, ыгылыйбат, түргэнник толкуйдуур буолуон наада диэн тоһоголоон этэллэр. Суһал көтүү кэмигэр элбэх медицинскэй оборуудабанньа ылыллар, ону хайдах туһанары үлэһит хайаан да билиэхтээх.

Владислав Григорьев, СӨ саахалга түбэспиттэргэ көмө киинин фельдшерэ: "Барыта аппараакка холбонон турар. Ыарыһаҕы балыыһаттан ылыахпытыттан атын балыыһаҕа туттарыахпытыгар диэри бу анал тэриллэр көмөлөрүнэн туругун хонтуруоллуубут".

Үрүҥ халааттаах аанньаллар ымпыктаах көрүүлэринэн 1 чаас 40 мүн этэҥҥэ ааһан, көтөр аал Дьокуускай куорат аэропуордун булар. Манна эмиэ икки массыына көрсөн, ыарыһахтар балыыһаларынан илдьиллэллэр. Оттон манна даҕатан эттэххэ, Өрөспүүбүлүкэтээҕи саахалга түбэспиттэргэ киин уопсайа  сыл саҕаланыаҕыттан 1209 көтүүнү оҥорон, саамай элбэх сүрэх-хаан ыарыылаахтары, эчэйии ылааччыларга үгүс көмөнү оҥордо. Оттон тустаах тэрилтэ 5 сыл иһигэр 14-тан тыыһынчаттан тахса киһи олоҕун быыһаата.