"Россия” быыстапкаҕа Саха сирэ үгүс сэҥээриини ылла
Главное
"Россия" быыстапка-форумҥа үлэ-хамнас, олох-дьаһах ситиһиилэрин көрдөрөр биһиги өрөспүүбүлүкэбит "Саха сирэ - Олоҥхо дойдута" диэн аатынан бэрт сэргэхтик кытынна.
Норуот ситиһиитин норуот тылынан уус-уран айымньытын муҥутуур чыпчаала буолбут олоҥхону кытта кэккэ тутан, духуобунай баайы кытта үлэ-хамнас ситиһиитин дьүөрэлээн биир түһүлгэҕэ түмүллүбүтэ ураты тыыны үөскэттэ, көрөөччүнү кэрэхсэттэ.
Мария Турантаева, Олоҥхо тыйаатырын дириэктэрэ: "Маннык быыстапка тэриллибитэ олус үчүгэй. Дьон-сэргэ олус диэн сэҥээрэн көрөр эбит. 89 регион бары бииргэ хомуллан, маннык киэҥник көрдөрүллүбүтэ хаһан да буола илик этэ. Россия бары олохтоохторугар култуураны билиигэ, дойдуга бэриниилээх буолууга олус туһалаах тэрээһин".
Саха сирин павильона кэлбити эрэ барытын сөхтөрдө. Материальнай уонна духуобунай баайбыт аныгы технологиялары кытта дьүөрэлии тутуллан быыстапкаҕа ситэри-хотору арыллан сатабыллаахтык түмүлүннэ.
Владимир Мишуков, Дьааҥы улууһун култуура салалтатын салайааччыта: "Быыстапка арыллыаҕыттан олус элбэх киһи сырытта. Күҥҥэ 15 тыһыынчаҕа тиийэ киһи сырытта. Сарсыарда кэллэххэ номнуо манна кэтэһэн турар буоллаллар, киирээрилэр. Биһиги кыһыллыбыт балыкпытын олус диэн сөҕөллөр. Дьокуускай куораты сэҥээрэн ыйыталаһаллар".
Ситиһиилэри ыллахха, кэнники 5 сылга өрөспүүбүлүкэ баалабай бородууксуйата иккиттэн ордук төгүл улаатан, 2 триллион солкуобайга тэҥнэспит. Дойду илин иэнигэр экономика балысханнык сайдыытыгар алмаастаах тыйыс дойду Саха сирэ быһаччы кылааттааҕын Ил Дархан бэлиэтээтэ. Ол курдук хостонор көмүс, ниэп, гаас, чох кээмэйэ историчесай чахчылары куоһарбыта этилиннэ. Ай-Ти технологияны сайыннарыыга Саха сирэ бүтүн дойдуга инники күөҥҥэ турарын, оҥорон таһаарыыта Уһук Илиҥҥэ 90% ыларын - быыстапкаҕа кэлбит эрэ илэ итэҕэйдэ. Бу барыта Саха сирин дьонун-сэргэтин утумнаах үлэтин түмүгэ, ситиһиитэ.
Айсен Николаев, СӨ Ил Дархана: "Уһук Илин сайдыытын ситиһиэхпит диэн бигэ эрэллээхпит. Ол эбэтэр Уһук Илиҥҥи уокурук дойдубут сайдар киинэ буолуоҕа – олох бары хайысхаларыгар сайдыы барыаҕа. Россия үгүс олохтооҕо ыалдьыттыан баҕарыаҕа, онуоха быыстапка кэннэ Саха сирин кытары билсиһии өссө күүскэ салҕаныа".
Быыстапкаҕа "Азия оҕолоро" оонньууларга бэлэмнэнии иитинэн тус соруктаах көрсүһүү ыытылынна. Эһиил сайын Дьокуускайга ыытыллыахтаах VIII оонньууларга аатырбыт спортсменнар Вячеслав Фетисов уонна Маргарита Мамун посол буолаллара бигэргэннэ.
Демографияны сайыннарыыга ыытыллар үлэ туоһута - Саха сирин нэһилиэнньэтин ахсаана биир мөлүйүөҥҥэ тэҥнэспитэ буолар. Оҕо төрөөһүнүн, ыал буолуу көрдөрүүтэ сыллата тупсар. Быыстапка биир сүрүн ураты көстүүтэ - уруу сиэрэ буолла. Ол иитинэн сүктэр кыыһы симиир сиэри көрдөрдүлэр. Бу күн бар дьон иннигэр Олоҥхо театрын артыыһа Жанна Ксенофонтова, Саха телевидениетын режиссера Владислав Федоров ыал буоллулар.
Дьон олоҕо тупсуутугар, бэйэтин миэстэтин буларыгар, төрөөбүт дойдутугар бэриниилээх ыччаты иитиигэ - күн бүгүн сүрүн болҕомто ууруллар. Саха сирэ анал байыаннай дьайыыга хорсуннук кыттар. Россия түөрт дьоруойун аата чиэстээхтик ааттанар.
Тэрээһин түмүк чааһыгар 8 тиэхиньикэни утары хоодуоттук кыргыһан хотуулаах тахсыбыт "Алеша" тааҥка туһунан ырыаны Приднестровье народнай артыыһа, бойобуой дьайыылар бэтэрээннэрэ Юрий Кононов долгутуулаахтык толордо, дьоруойдуу кыргыспыт буойуттарынан киэн туттарбытын туоһулаата.
Вера Свешникова, быыстапка-форум кыттыылааҕа: "Кыайыыбытынан улаханнык киэн туттабыт. Саха уолаттарын хорсун быһыытын ырыа нөҥүө дьон өйүгэр-санаатыгар тиийиэн баҕарабыт. Бу ырыа үрдүк сыанаттан ылланар кэмигэр көрөөччүлэр бука бары ылластылар".
Үөрүүлээх тэрээһин оһуокайынан түмүктэннэ, кэлбит эрэ барыта күн үҥкүүтүгэр кыттан сүргэтэ көтөҕүлүннэ.
Дойдубут тэбэр сүрэҕэр норуот сомоҕолоһуутун күнүгэр арыллыбыт регионнар ситиһиилэрин кэрэһилиир "Россия" быыстапка-форум кэлэр сыл муус устар 12-с күнүгэр диэри туруоҕа.