Итэҕэс оҕолору өйүүр аһымал аахсыйа ыытыллар

37-с кэрдиис иннинэ төрөөбүт оҕолор болдьох иннинэ төрөөбүттэр ахсааннарыгар киирсэллэр. Саҥа олох күн аайы олох иһин охсуһуута бастаан өрөспүүбүлүкэтээҕи төрүүр киин реанимация салаатыгар саҕаланар. Баара-суоҕа киилэ аҥаара ыйааһыннаах оҕолор хаһан бэйэлэрэ тыынар буолуохтарыгар диэри тыҥалара аппарат көмөтүнэн үлэлиир. Сайдыы барбытын кэннэ, патология салаатыгар көһөллөр. Оҕо манна ийэтин үүтүн иһэр, аһыыр кыаҕын ситэр. Ол кэннэ 3 сааһыгар диэри катАмнез отделениетыгар көрдөрүнэр. Гуляевтар дьиэ кэргэн кэтэһиилээх уол оҕолоро Тимофей 32-с нэдиэлэтигэр күн сирин көрбүт. Билигин катамнез салаатыгар наадалаах исписэлиистэргэ сылдьан, номнуо саастыылаахтарын кытта ыйааһына тэҥнэһэн, ис туруга ситэн сылдьар.

Оксана Гуляева, Дьокуускай куорат олохтооҕо: «Катамнезка түөрт ыйыттан сылдьабыт. Биһиэхэ массаж, физиотерапия уонна эт-хаан эччийиитин оҥороллор. Ол түмүгэр биһиги оҕобут сыыллар, бэйэтэ турар буолла».

Итэҕэс төрөөбүт оҕо төбөтүн өндөппөт, илиитэ-атаҕа үчүгэйдик хамсаабат буолар. Оттон балыыһаҕа кэмигэр сөптөөх көмөнү ыллаҕына, нуорматын кэмигэр ситэ охсор. Оҕо туругуттан көрөн араас исписэлиистэр үлэлэһэллэр.

Илиитин-атаҕын, сиһин ийэ киһи куруук имэрийэ-томоруйа, мускуйа сылдьыахтаах, оччоҕуна оҕо төрүт рефлексэ хаачыстыбалаах буолар диэн сиэстэрэ бэлиэтиир.

Татьяна Сосина, Өрөспүүбүлүкэтээҕи клиническэй балыыһа катамнез салаатын сиэстэрэтэ: «Оҕо араас буолар, төһө эрдэ төрөөбүтүттэн, билиҥҥи сайдыытын көрөн массаж оҥоһуллар».

Өскөтүн оҕо атын кииҥҥэ төрөөбүт да буоллаҕына, быраас анаабыт суругунан буор босхо кэлэн 1 сааһыгар диэри 4-тэ көрдөнүнэн барыан сөп. Оттон 2-3 сааһыгар сылга 2-лиитэ кэлэрэ ирдэнэр.

Татьяна Габышева, Өрөспүүбүлүкэтээҕи клиническэй балыыһа катамнез салаатын бырааһа: «Невролог, харах, сүрэх быраастара, ол эбэтэр итэҕэс төрөөбүт оҕону көрүүгэ сүрүн исписэлиистэр бааллар. Маны таһынан физиолечение, массаж ааһаллар оҕолор».

Болдьоҕуттан эрдэ төрөөбүт оҕолор кэнники кэмҥэ инбэлииккэ тахсыылара аччаата. Медицинэ сайдан уонна туһааннаах исписэлиистэр элбээн билигин оҕолор этэҥҥэ хаамар, сүүрэр буолаллар, оннооҕор успуордунан дьарыктаналлар. "Эрдэ төрөөбүттэр" ийэлэр түмсүүлэрэ 2022 сыллаахтан тэриллэн үлэлиир. Манна биир кыһалҕалаах ыал бэйэлэрин икки ардыгар сүбэлэрин-амаларын үллэстэллэр.

Майя Павлова, "Эрдэ төрөөбүттэр" ийэлэр түмсүүлэрин салайааччыта: «Перинатальнай киин быраастарын кытары сибээспитин быспаппыт. Кинилэр биһигини наар өйүүллэр, туох тиийбэтин, туох наада буоларын ыйан-кэрдэн биэрэллэр. Кинилэр сүбэлэринэн бу маннык аахсыйаны оҥорорго сананныбыт».

Соҕотох төрөппүт көрүүтэ суох сытар итэҕэс оҕолорго уонна улуустан кэлэн сытар ийэлэргэ анаан бу көмө ыытылынна. Наадыйар малы-салы эбэтэр харчынан көмөнү «Харысхал» аһымал киинигэр бу нэдиэлэ устата аҕалан туттараллар.