Норуот үйэлээх махтала

"Доҕоттор көрсүһүүлэрэ" диэн ааттаммыт киэһэҕэ өрөспүүбүлүкэ бастакы президенин, улуу салайааччыбыт чугас доҕотторо, бииргэ үлэлээбит, алтыспыт дьоно муһуннулар. Тэрээһин Михаил Ефимович төрөөбүт күнүгэр ыытылынна. Мустубут дьон истэригэр кинини кытта саҥа сайдыылаах өрөспүүбүлүкэбитин төрүттэспит үөлээннээхтэрэ бааллар. Олортон биирдэстэрэ Климент Егорович Иванов, кини Михаил Ефимович Николаев президент дуоһунаһыгар киирэригэр Саха сирин үрдүкү сэбиэтин бэрэссэдээтэлэ этэ. Бииргэ атах тэпсэн олорон үлэлэспит, алтыспыт киһи быһыытынан бастакы президеммит үйэтитии үлэтигэр улахан болҕомтотун уурар этэ диэн үллэстэр.

Климент Иванов, СӨ бочуоттаах гражданина, судаарыстыбаннай сулууспа бэтэрээнэ: «Саха сиригэр көлүөнэлэр ситимнэһиилэрэ олус наада. Михил Ефимович ити боппуруоһу бэйэтинэн олус күүскэ туруорар этэ. Анал укааһы таһааттарбыта, Б.Н. Ельцин укааһын. Ол кэннэ бэйэтэ ыйан-кэрдэн биһиги чулуу уолаттарбыт М.К. Аммосов, П.А. Ойуунускай, И.Н. Барахов, С.М. Аржаков сүрдээх элбэх үлэни ыытарбыта».

Оттон бу күннэргэ Ил Дархан Айсен Николаев Михаил Ефимович аатын үйэтитэр туһунан ыйааҕы таһаарда. Тустаах докумуонунан бастакы президент аатынан "Во славу и пользу республики" диэн бочуоттаах бэлиэ олохтонно. Дьокуускай киин уокуругар Михаил Ефимовичка пааматынньык туруоруллуоҕа. Оттон төрөөбүт дойдутугар Хаҥалас Өктөмүгэр мемориальнай комплексы тутуохтара. Үйэтитии үлэлэрэ номнуо саҕаланнылар.

Юрий Семёнов, "Николаев - киин" СӨ бастакы президенин архыып-библиотекатын салайааччыта: «Аҥаардас ыйааҕынан эрэ буолбакка атын үлэ эмиэ барар турар диэн этиэххэ наада. Өрөспүүбүлүкэ салалтата, улуустар уонна общественность бэйэ баҕа өттүнэн сүрдээх улахан үлэ ыыта сылдьаллар. Бу Биһиги Аан Дархаммытын убаастыырбытын, сыаналыырбытын, билинэрбитин көрдөрөр».

Маныаха бу күннэргэ кини аатынан национальнай медициинэ киинигэр мемориальнай кабинеты арыйдылар. Оттон Өктөмҥө Николаев кииҥҥэ Михаил Ефимович 2002 сыллаахха Ил Түмэн дьиэтигэр турбут кабинетын хомуйан, оҥорон туруордулар.

Улуу салайааччыбыт "Норуотун, бар дьонун туһугар олоруу, үлэлээһин - киһи үрдүк анала" диэн бэйэтэ эппитин курдук, кэлэр кэнэҕэски ыччат бу үрдүк аналы эмиэ сүгүөхтээх. Онон кини аатын үйэтитиигэ бары ылсарбыт бу кини үлэтин сыаналыырбытын уонна салгыырбытын көрдөрүөҕэ диэн саарбаҕа суох.