Дмитрий Садовников Дьокуускайга улахан тутуулары көрдө

Аан бастаан үлэ бөлөҕө онкология диспансерын тутуутун кытары билистэ. Манна билигин дьиэ ис бараанын, араас медицинскэй тэрили туруоруу үлэлэрэ ыытылла тураллар. Өрөспүүбүлүкэ Бырабыыталыстыбатын бэрэссэдээтэлин бастакы солбуйааччы Дмитрий Садовников бу тутууну күүстээх хонтуруолга ылла. Бу сылга онкология киинэ арыллан, үлэтин саҕалыахтаах. Онон үлэ өссө күүскэ тэтимирэр.

Дмитрий Иванов, судаарыстыбаннай сакаасчыт сулууспатын генеральнай дириэктэрин солбуйааччы: «Онкология киинин тутуута 91% тиийэн турар. Ол курдук тас үлэ барыта түмүктэнэн билигин ис бараанын оҥоруу бүтэн эрэр. Үрдүкү технологиялаах тэриллэри туруордуур хостору бүтэрэн эрэбит. Оборудованиелар кэллилэр».

Баараҕай эбийиэк 2023 сыл бүтүүтэ киириэхтээх диэн Ил Дархан дьаһала ылыллан турар. Ол эрэн тутуу хаамыыта эмиэ бытааран болдьохтон хаалыылар бааллара бэлиэтэннэ. Үгүс медицинскэй тэрил кэлэн турар, билигин туруохтаах сирэ бэлэмнэнэн бүтэрин күүтэллэр. Оччоҕуна саҥа тэриллэри таҥан саҕалыахтара. Онтон сорох оборудование өссө да кэлэ илик.

Дмитрий Садовников, СӨ Бырабыыталыстыбатын бэрэссэдээтэлин бастакы солбуйааччы: «Хомойуох иһин, онкология киинин аһыллыыта хаста да көһөн турар. Маныаха кэккэ биричиинэлэр бааллар. Олортон биирдэстэрэ медициинэ оборудованиелара хааччахха түбэһэннэр тардыллыы таҕыста. Бэдэрээччиккэ да сакаасчыкка да ыйытыы баар, онон хонтуруолга тута эрэ сырыттахпытына түмүктүүбүт».

Салгыы үлэ бөлөҕө «Звёзднай» квартал тутуутун көрдө. Манна сүрүн болҕомто быйыл киириэхтээх дьиэлэргэ ититии ситимин тардыы боппуруоһа буолла. Сорох дьиэлэргэ сылаас суох буолан дьиэ ис бараанын оҥорууга бытаарыыллар бааллара билиннэ. Онон сэтинньи 20 чыыһылатыгар диэри сылааһы холбуурга сорудахтаатылар. Сорох тутуу матырыйаала Аллараа Бэстээххэ кэлэн хаайтаран турарын эттилэр. 

Дмитрий Садовников, СӨ Бырабыыталыстыбатын бэрэссэдээтэлин бастакы солбуйааччы: «Быйыл сэттэ дьиэни үлэҕэ киллэриэхтээхпит. Манна эмиэ хонтуруоллаан үлэни тэтимирдибэтэхпитинэ бытаары тахсар куттала баар».

Бу икки улахан баараҕай тутуулары болдьоҕу баттаһа сөпкө бириэмэтигэр киллэрэр сорук турар. Онон мантан ыла хонтуруол күннэтэ ыытыллыаҕа диэн бэлиэтээтилэр. Федеральнай үбүлээһиннээх национальнай барыллары туруоруллубут болдьоххо үлэтигэр киллэрбэтэхтэринэ инники сылларга үбү ылыыга ыарахаттардаах буолуон сөп.