"Билиминэн биирбит" бэстибээл учуонайдары уонна оҕолору түмтэ
Бэстибээл ыытыллар күнүгэр кэлбит дьоҥҥо ааҕааччы билиэтин буор босхо оҥорон бэлэхтээтилэр. Онон оскуола оҕолоро босхо билиэтинэн кинигэ ааҕыытынан муҥурдаммакка, өрөспүүбүлүкэҕэ бастакы кэккэҕэ иһэр бастыҥ билими чинчийээччилэри кытта илэ көрүстүлэр. Бэйэлэрэ 11 араас хайысханан кэрийэ сылдьан билиилэригэр билии эбиннилэр. Саха гимназиятыттан уопсайа 50-чэ оҕо кэлэн смарт библиотекаҕа ыалдьыттаата.
Екатерина Сивцева, Саха гимназиятын учуутала: "Биһиги оскуолабыт оҕолоро наукаҕа интэриэстэрэ улахан. Холобур, бу сайын “Научное лето” диэн бырайыакка 30 оҕо кыттыбыта. Кинилэртэн 18 үөрэнээччи бастаабыттара".
Маннык тэрээһиннэр оҕо инники идэтин сөпкө талан тайанарыгар тирэх буолаллар. Үөрэнээччи билим хайа көрүҥэр интэриэһэ сытарын чинчийэн эрэ көрөн билэр кыахтаах.
Надя Ефимова, Саха гимназия 8 кылааһын үөрэнээччитэ: "Мин медик буолар былааннаахпын. Манна тиис бырааһыгар эбэтэр атын куоракка нейрохирург идэтигэр үөрэниэхпин баҕарабын. Маннык бэстибээллэр инники идэни таларга олус көмөлөһөллөр".
11 хайысхаттан биирдэстэрэ Владимир Михайлавич Ларионов үлэтин-хамнаһын, аан дойду билимэр өҥөтүн туһунан ыйытыылар буоллулар. Быйыл үбүлүөйдээх сылыгар үөлээннээхтэрэ, аймах дьоно кини аатын үйэтитиигэ элбэх тэрээһиннэри анаан ыыттылар.
Наталья Апросимова, РНА СС салаатын Саха сиринээҕи чинчийэр киинин үлэһитэ: "Викторинаны М.М. Черосов оҥордо. Онно биһиги оҕолору кытта кыттыһа кэллибит. Мин санаабар, Владимир Петрович туһунан ыччаттар элбэҕи билиэхтээхтэр. Кинини үгүс киһи учуонай эрэ быһыытынан билэллэр. Онтон кини общественнай деятель, бөдөҥ политик этэ".
Бэлиэ тэрээһин сүрүн сыалынан билим дьоҕус академията уонна куорат библиотекалара салгыы үлэлэһэр туһунан утарыта илии баттаһыылара буолар. Уһун сылларга хардарыта үлэлиир былааннарын номнуо оҥостон, кэлэр ыйдааҕы дьоҕус акадьыамыйа тэрээһиннэрэ "Смарт" библиотека уораҕайыгар буолуохтара.
Василий Павлов, Саха билим дьоҕус акадьыамыйатын дириэктэрэ: "Кэлэр ыйга хас да лекциялары уонна научнай өттүгэр көрсүһүүлэри ыытыахпыт. Онуоха учуонайдары уонна оҕолору кытта араас хабааннаах тэрээһиннэр барыахтара".
Быйыл Үүнэр көлүөнэ пуондата 30 сылын бэлиэтээтэ. Ол туһунан кэлбит оҕолорго, ыалдьыттарга пуонда тугунан дьарыктанарын, туох сыаллаах үлэлиирин сиһилии кэпсээтилэр.
Иван Сивцев, Үүнэр көлүөнэ пуондатын кээпэрэтиибин коммуникацияҕа салайааччыта: "Сотору кэминэн Нерюнгри уонна Алдан куораттарга үөрэх экпедициятын тэрийиэхтээхпит".
Смарт библиотеҕа оҕолор массыына мутуора хайдах үлэлиирин, киһи уоргана туохтан турарын уонна саха сиригэр хостонор минераллары харахтарынан эрэ буолбакка, илиилэринэн тутан-хабан чинчийэн, үөрэтэн бардылар. Билимҥэ бастакы хардыы оҕоҕо кыра сааһыттан саҕаланар.
