Суһал көмө сулууспалара үөрэҕи аастылар
Бүлүү суолун кытыытыгар умайа турар массыына иһигэр биир киһилээх уонна аттыгар 4 киһилээх массыына харсыһыыта тахсыбыт. Итинник ис хоһоонноох үөрэтиигэ сүрүн сорук массыына саахалыгар суорума суолламмыт киһини тимир көлөттөн таһаарыы, эчэйбиттэри суһаллык быыһааһын буолла. 14 чааска 112 көмө сулууспа нүөмэригэр эрийэн, бары наадалаах сулууспа үлэһиттэрэ уоттарын холбообутунан быһылаан буолбут сиригэр кэллилэр.
Суолга куттал суох буолуу иниспиэксийэтэ кэлэн, тута суол икки өттүнэн массыыналар сырыыларыгар мэһэйи үөскэппэт гына турдулар. Оттон массыынаҕа төһө киһи баарын ааҕан, суол быһылаанын кыттыылаахтарыттан ааттарын-суолларын ыйытан, боротокуолу толорбутунан бараллар. Оттон катастрофа медициинэтин үлэһиттэрэ бэрт түргэнник кэлэ охсон тимир көлө олорсооччулара туох эчэйиини ылбыттарын тута быһааран, бастакы көмөнү оҥорбутунан бараллар. Ыарахан туруктаах дьону наһыылканан тиэйэн, суһал көмө үлэһиттэригэр тиэрдэллэр.
Үөрэххэ уопсайа 63 киһи уонна 10 тиэхиньикэ кыттынна. Киэҥ иэннээх Саха сиригэр суол быһылаана ханна баҕарар буолуон сөп диэн диэн, куораттан тэйиччи уонна сибээс хаппат сирин талан, дьарыгы ыыттылар.
Николай Андреев, Бүлүү бэдэрээлинэй суол салалтатын салайааччыта: "Маннык быһылаан таҕыстаҕына киһи күүппэтэх өттүттэн буолар. Холобура, хараҥа кэмҥэ, өрөбүл күҥҥэ эбэтэр сибээс хаппат сиригэр. Ол иһил суһал көмө сулууспалара маннык үөрэҕи бастакыбытын тэрийдибит".
Бастакы көмө сөпкө оҥоһулларыгар, хас биирдии массыынаҕа олорсо сылдьааччыларга түөстэригэр ким хас саастааҕа, тугун өлөрбүтэ сурулунна. Маннык гынан медициинэ катастрофатын уонна суһал көмө быраастарын тургутан көрдүлэр. Суолга куттал суох буолуутун хааччыйар иниспиэксийэтиттэн уопсайа 5 массынанан икки патруул кэллэ. Уонна харсыһыы туохтан тахсыбытын быһаарар үлэни ыыттылар.
Николай Жирков, суолга куттал суох буолуутун хааччыйар иниспиэксийэ техническэй хонтуруолга салаатын салайааччыта: “Бу үөрэх түмүгүнэн ким хайдах бэлэмнээҕин көрдүбүт. Маннык суол быһылааныгар төһө түргэнник кэлэллэрин уонна тугу гыныахтаахтарын үөрэттибит”.
Куттала суох национальнай бырайыак чэрчитинэн 3 региональнай бырайыак баар. Бастакынан, суол ситимэ, иккиһэн, суол хаһаайыстыбатын сайыннарыы, үсүһүнэн, суолга куттал суох буолуу. Бу үс бырайыак иһинэн ыытыллар тэрээһиннэр кыһыҥҥы кэмҥэ, хараҥаҕа, халтарааҥҥа тимир көлөнөн сылдьааччыларга анаан ыытыллар.
Анатолий Потапов, СӨ транспорт уонна суол хаһаайыстыбатын миниистирин солбуйааччы: "Үөрэх түмүгүнэн туох итэҕэстэр баалларын ырытан, сулууспаларга ону хайдах туоратары ыйан туран суруктары ыыталыахпыт. Федеральнай суолларга эрэ буолбакка олохтоох суолларга ким ханнык кэрчиккэ эппиэттиирин ыйыахпыт".
Бары сулууспалар тэҥҥэ сааһыламмын үлэни көрдөрдүлэр. Быһыллыбыт кэрчик иһигэр түргэн-тарҕан туттунууларынан эчэйбит дьону быһыы оҕустулар. Хас биирдии сөкүүндэ көмөҕө наадыйар киһиэхэ көмүстээҕэр күндү диэн бэлиэтээтилэр.
