Россельхознадзор уунан кэлбит маһы бэрэбиэркэлээн бүтэрдэ
Главное
-
8 сентября в 02:458 сентября. День в истории - даты, события
-
8 сентября в 00:30Прогноз погоды в Якутии на 8 сентября
-
7 сентября в 11:48В Якутске обсудили улучшение городской среды и качества жизни людей на форуме "Якутск 4.0.0"
-
7 сентября в 11:16Айсен Николаев встретился с командиром добровольческого батальона "Боотур"
Россельхознадзор иниспиэктэрдэрэ сайын ыыппыт бэрэбиэркэлэрин түмүгүн туһааннаах тэрилтэлэргэ туттараллар. Иниспиэктэр Сергей Свинобоев тутуу матырыйаалын чинчийиини билиһиннэрэр. Ол курдук уунан кэлбит мас өрүс пуордугар тиксэн баран анал чинчийии эрэ кэнниттэн салгыы туһаныыга барар. Түмүк үчүгэй, мастар тутууга туһаныллыахтарын сөптөөхтөр диэн быһаарыы тахсыбыт. Ол эрэн уопсай бэрэбиэркэ түмүгүнэн харантыыннаах сирдэргэ кэрдиллибит маһы анал сертификата суох тиэйии түгэннэрэ бэлиэтэммит.
Сергей Свинобоев, Россельхознадзор Саха сиринээҕи салалтатын үүнээйи харантыынын уонна сиэмэ хаачыстыбатын салаатын судаарыстыбаннай иниспиэктэрэ: "Сайыҥҥы навигация кэмигэр 47 тыһыынча куб мас хонтуруолу ааста. Маня сэргэ анал бырагыраамаларынан бэрэбиэркэ оҥордубут. Ол түмүгэр 4 тыһыынча куб мас сертификата суох кэлбитэ билиннэ".
Туһааннаах тэрилтэ өттүттэн бэрэбиэркэ хас да түһүмэхтээн ыытыллар. Ол курдук мас кэрдиллэр сирдэригэр бастакы боруобалар ылыллаллар. Бу үлэ хаптаһын эбэтэр буруус тыырыллыан иннинэ, ирдэбил быһыытынан, оҥоһуллар. Аналиһы эрбээн эбэтэр маһы хайытан ылыллар уонна лабораторияҕа салгыы чинчийиигэ барар. Саха сиригэр маннык чинчийиини оҥорор лаборатория суоҕунан сибээстээн Иркутскай куоракка ыытыллар.
Ирина Степанова, Россельхознадзор Саха сиринээҕи салалтатын үүнээйи харантыынын уонна сиэмэ хаачыстыбатын салаатын судаарыстыбаннай иниспиэктэрэ: "Быйыл 17 тыһыынча куб мас хонтуруолу ааста. 36 боруоба ылыллан Иркутскайдааҕы лабораторияҕа анализка барбыта, туох да кэһии суох буолан 6 сертификат бэрилиннэ".
Өрөспүүбүлүкэ иһигэр тутуу матырыйаала сүрүннээн Ленскэй оройуонугар Витим бөһүөлэгэр кэрдиллэр. Манна черный еловый усач диэн харантыыннанар үөннээх сир олохтонон турар. Холобура, маҥан үөн баар буоллаҕына мас ыарыылаах итиэннэ тутуу матырыйаалыгар барбат. Онон мантан маһы таһаарыыга харантыын сертификаата булгуччу ирдэнэр. Быйыл бу докумуону биэриигэ биир аккаас баар. Иниспиэктэрдэр этэллэринэн, кэрдиллибит мас туох да үөнэ, ыарыыта суоҕун туоһулуур дөкүмүөнэ итэҕэһиттэн.
Онтон чааһынай дьиэ тутуутун ылан көрөр эбит буоллахха, ааспыт сылга 336 тыһыынча кыбадыраат миэтэрэ чааһынай дьиэ тутуллубута. Статистика көрдөрөрүнэн кэтэх дьиэни туттуу сыллата улаатар. Онтон өрөспүүбүлүкэҕэ быйылгы тутуу уопсай былаана 650 тыһыынча кыбадыраат миэтэрэ. Мантан аҥаара чааһынай дьиэ.