Тулагы агро хайысхалаах оскуолатыгар ресурс киинэ арылынна

Өрөспүүбүлүкэ 16 агро хайысхалаах оскуолатыттан улахан кылаас үөрэнээччилэрэ муһуннулар. Идэлэрин сөпкө талалларыгар улахан тирэх буолар  киинигэр эбии үс кылаас арыллара былааннанна. Ол курдук химия, биология, физика кылаастарыгар оҕолор араас чинчийиилэри ыытан дойду уонна аан дойду таһымыгар күрэхтэһиэхтэрэ. Оттон АГАТУ устудьуоннара бэйэлэрэ оҥорбут ферма оонньууларын оҕолорго көрдөрдүлэр уонна аныгы теплицэни ыраахтан төлөпүөн нөҥүө сылааһын, сиигин, салгынын бэрибиэркэлиир бырайыактарын сырдаттылар.

Билими кытта тыа хаһаайыстабытын дьүөрэлии тутан, саҥа сайдыылаах, олоҕу чэпчэтэр чинчийиилэр олоххо киирэн эрэллэр. Оҕолору кыра саастарыттан тыа сирин үлэтигэр сыһыарар сыалтан ферма оонньуутун күрэх быһыытынан ыыттылар.

Павел Степанов, АГАТУ устудьуона: «Бырайыакпыт сүрүн санаата – ферма оптимизацията. Кыһын биһиэхэ туох да үүнээччитэ суоҕа, ол иһин фермабыт биһи климаппытыгар үөрүйэх, дьиэ иһигэр үүнэр гына оҥорбуппут. Билигин ону ыраахтан төлөпүөн нөҥүө салайыахха сөп. Төлөпүөн нөҥүө аанын, түннүгүн арыйыахха сөп, бэнтилээтэри холбуохха сөп, итигирдик климатынан салайыахха сөп».

АгроНТРИ диэн бүтүн арассыыйатааҕы агро оскуолалар күрэхтэригэр кытта барар бэлэмнэрин аастылар. Манна уопсайа 9 көрүҥүнэн кытталлар. Ыҥырыа иитититтэн саҕалаан куйаар эйгэтигэр тиийэ билиилэрин араас өрүттэринэн тургутан көрүөхтэрэ. Агророботтар хайысхаҕа АГАТУ устудьуоннара тэҥнээхтэрин булбаттар.

Уйгулаана Николаева: «АГАТУ устудьуоннара агро хайысхалаах оскуола үөрэнээччилэригэр ас хаачыстыбатын хайдах түргэнник бэрэбиэркэлиир арааһынай маастар-кылаастары ыыттылар. Олортон биирдэстэрэ бу Soeks диэн аска төһө нитрат уонна радиоактивность баарын бэрэбиэркэлиир тэрил буолар. Холобур бу дьаабылакаҕа көрөрбүтүнэн биһиэхэ туох да улахан кэһии суоҕун көрдөрөр».

Афанасий Чугунов аатынан өрөспүүбүлүкэтээҕи кииҥҥэ оҕолор устудьуоннар үлэлэрин кытта ыкса билсэн, биир интэриэстэрин тула викторинаҕа кытыннылар. Инникитин даҕаны бу үйэлээх ситим быстыбакка наукаҕа инники хардыылары арыйыа диэн эрэнэллэр.

Феодосия Габышева, Өрөспүүбүлүкэ агро хайысхалаах оскуолаларын түмсүүтүн салайааччыта: «Чугунов бу санааны өр сылларга илдьэ сылдьыбыта. Ресурснай сыантыр баар буолуохтаах диэн санаатын бу олоххо киллэрэр сыалтан, бу Тулагы оскуолатыгар арылынна. Бүгүн биһига араас хайысханнан манна бу аграрнай хайысхаҕа оҕолору хайдах үөрэтиэххэ сөбүн, устудьуоннары хайдах дьарыктыахха сөбүн уонна бу кинилэр оҥорбут үлэлэрин хайдах олоххо киллэриэххэ сөбүн диэн көрдүбүт».

Афанасий Чугунов өр сылларга баҕарбыт баҕа санаата туолан, кииҥҥэ кини аата иҥэриллэн, мэтириэтин оскуола истиэнэтигэр ыйаатылар.

Дмитрий Андросов, Тулагы агротехническай орто оскуолатын дириэктэрэ: «Афанасий Васильевич, акадьыамыкпыт агро үөрэхтээһини төрүттээбит улуу-сүдү киһибит, убайбыт тыыннааҕар өссө саас арыллыахтаах этэ дьиҥинэ. Кини хара бүтэһигэр дылы бэйэтэ арыйыан баҕата этэ. Бу көрүгэ - маннык үлэлиэхтээх, хамсыахтаах, уолаттарбын маннык үлэлэтиэхтээхпин диэн бүтэһигэр дылы бэйэтин баҕатын этэ сырыппыта. Ону кини кэриэһигэр диэн биһи куруук этэ сылдьыахпыт».

Улуу акадьыамык сырдык аатын Өрөспүүбүлүкэ агро оскуолаларын үөрэнээччилэрэ, АГАТУ устудьуоннара киэҥ сиргэ ааттатыахтара. Буолаары турар агроНТРИ күрэххэ үрдүк үөрэх кыһатын преподавателларыгар  үөрэнэн салгыы сайдар кыахтаныахтара.