Саха сиригэр "Олохтоох каадыры бырамыыссыланнаска" баараҕай бырайыак үлэлиир

Хаҥалас улууһуттан сылдьар Афанасий Дьячковскай бырамыыссыланнас эйгэтигэр үлэлээбитэ сыл буолан эрэр. Кини бу саас Айхал бөһүөлэккэ АЛРОСА хампаанньатыгар ананан үлэлии кэлбитэ. Хампаанньа сүрүн соруга саҥа үлэҕэ киирээччилэргэ олорор дьиэнэн хааччыйыы буолар.  Үлэһиттэр хосторо икки миэстэлээх, олорор сирбит, үлэбит-хамнаспыт туох баар уссулуобуйаҕа эппиэттиир диэн кэпсиир.

Афанасий Дьячковскай, "АЛРОСА" хампаанньа үлэһитэ: «Усулуобуйата олус үчүгэй, туох баар социальнай бакыат, уоппуска, санаторийдар. Алта күн нэдиэлэҕэ үлэлиибит, биир күн өрөбүлгэр тугу баҕар гыныаххын сөп – спортзал, бассейн баар».

Фома Платонов бу хампаанньаҕа саас үлэлии киирбитэ, уопуттаах буолан улахан массыынаҕа анаммыта. Ол иннинэ үлэҕэ киирэригэр хампаанньа туһааннаах үөрэххэ таһымын өссө урдэтэригэр уерэттэрбитэ. Маны сэргэ аан маҥнайгытын бөдөҥ  бырамыыссыланнай тэрилтэҕэ киирбит киһини уопуттаах исписэлиискэ сыһыаран,  өйөбүлү хааччыйаллар. Онон хампаанньаҕа үлэҕэ хаалыы көрдөрүүтэ үрдүк.

Фома Платонов, "АЛРОСА" хампаанньа үлэһитэ: «100 туоннаттан элбэх таһаҕаһы тиэйэр карьернай самосвалга суоппарынан үлэҕэ киирбитим. Олус үчүгэй, бастатан туран дьоҥҥо сыһыаннара, хамнаспыт, үлэ харабылын тутуһаллар, ирдэбиллэрэ сүрдээх. Уонна эдэр ыччаты ыҥырыам этэ горнай үөрэҕи бүтэрэн баран биһи хампаанньабытыгар АЛРОСАҕа үлэлии кэлиҥ диэн ыҥырабын. Биһиэхэ үлэҕэ киирдэххитинэ отой кэмсиниэ суоххут».

“Олохтоох каадыры бырамыыссыланнаска” бырайыак биһиги Өрөспүүбүлүкэбитигэр 2017 сылтан үлэлиир. Бу кэм устата бырайыак чэрчитинэн 50 тыһ. тахса киһи үлэнэн хааччылынна. Онтон АЛРОСА хампаанньа олохтоохтору улэнэн хааччыйар бастыҥ тэрилтэ буолар. 

Мария Слепцова, Нэһилиэнньэ дьарыктаах буолуутун хааччыйар судаарыстыбаннай кэмитиэт тэрилтэлэри кытары үлэҕэ салаатын салайааччыта: «9 ый түмүгүнэн уопсайа Өрөспүүбүлүкэ үрдүнэн 8575 киһи үлэ булбута, ол иһигэр эдэр ыччат 35 саастарыгар дылы – 5060. Ити иһигэр саамай элбэх киһи АЛРОСА хампаанньа. Ол курдук АЛРОСА хампаанньаҕа бу 9 ый иһигэр 2561 киһи үлэҕэ киирдэ, ол иһигэр 430 эдэр ыччат».

Алмаас хостооһунугар олохтоох дьону үлэлэтии - АЛРОСА  биир сүрүн соруга. Хампаанньа бу сылга 3 тыһ. кэринэ Саха сирин олохтооҕун үлэнэн хааччыйда, маны сэргэ туһааннаах идэлэргэ үөрэттэ.