Нам улууһугар кырдьаҕастар дьиэлэрин тутуута түмүктэннэ

Саҥа тутуллубут дьиэҕэ киирэ түстүн да кэрэ көстүү тоһуйа көрсөр. Кырдьаҕастар уонна инбэлииттэр интэринээт-дьиэлэрэ бу курдук быһыыланан-таһааланан сотору кэминэн олохтоохторун көрсүөҕэ. 2021 сыллаахтан саҕалаан 65 куойка-миэстэлээх баараҕай дьиэ тутуута силигин ситэн, түмүктэнэн эрэр. Билигин улахан үлэлэр номнуо үмүрүйэннэр, ыраастаныы, сууйуу үлэлэрэ бара тураллар. Саҥа социальнай эбийиэк былаан быһыытынан бу ыйга киириэхтээх.

Анастасия Заболоцкая, Нам улууһун кырдьаҕастар уонна инбэлииттэр дьиэлэрин дириэктэрэ: «Бу хосторго санитарнай хосторо бэйэлэригэр баар уонна хоско иккилии киһи олоруохтара, хосторо үчүгэй хааччыллыылаах. Холобура: телевизордаах, үлэһит ыҥырар кунуопкалаах, медицинскэй персоналы суунар сиргэ да ыҥырыахха сөп, хас биирдии орон төбөтүгэр баар».

Хас этээс ахсын аһыыр хостор, араас үүнээйилээх сынньанар сирдэр баар буолбуттар. Ону таһынан спордунан, эмтиир физкультуранан дьарыктанар саалалар. Эр дьон, дьахтар уһаналларыгар, иистэнэллэригэр эмиэ туһунан хостору анаабыттар. Аныгы үйэ ирдэбилининэн көмпүүтэр хоһугар Госуслуга нөҥүө араас өҥөлөрү туһаналларыгар аналлаах дьарыктар ыытыллыахтара.

Пётр Владимиров, Ленскэй нэһилиэгин баһылыгын солбуйааччы: «Биһиэхэ хаалан турар хомунааһын, араас тэрил холбооһуна хаалла. Сүрүн үлэтэ барыта бүттэ, түмүгэр кэлэн ДП үөрүүлээх түгэнэ чугаһаата».

Кырдьаҕастар дьиэлэригэр сүрүн болҕомтону сынньалаҥҥа ууруохтара. Интэринээт тэлгэһэтигэр чэбдигирдэр физкультуранан дьарыктанарга былаһаакка, хаамарга анал ыллыктар баар буолбуттар.

Анастасия Заболоцкая, Нам улууһун кырдьаҕастар уонна инбэлииттэр дьиэлэрин дириэктэрэ: «65 миэстэҕэ Өрөспүүбүлүкэ бары муннугуттан кэлэллэр. Холобура 30 миэстэлээх эрдэхпитинэ 10 киһи Намтан сылдьаллар этэ уонна 20-тэ араас улуустан. Билигин аныгылыы ирдэбилгэ толору эппиэттиир үчүгэй хааччыллыылаах дьиэ биһиэхэ сүрдээх улахан бэлэх буолар. Кырдьаҕастарга, эдэр саастарыгар ыарахан үлэҕэ үлэлээбит, олох ыарахаттарын көрсүбүт, ыалдьар дьоннор маннык үчүгэй дьиэҕэ киирэллэр сүрдээҕин кэтэһэллэр, махтаналлар».

Кырдьаҕастар дьиэлэрэ "Демография" национальнай оҥкулунан тутулунна. Уопсай сууммата 450 мөлүйүөн солкуобайга тэҥнэстэ. Намнааҕы кырдьаҕастар дьиэлэрэ аны эһиил 2024 сылга 30 сыллаах үбүлүөйдэрин бэлиэтиэхтэрэ. Бу сыллар тухары Нам улууһун кырдьаҕастар дьиэлэригэр 300-чэкэ киһи олорон ааста.

Айтал Павлов: «Нам сэлиэнньэтигэр тутулла турар кырдьаҕастар дьиэлэригэр нэһилиэнньэ бары аҥатыгар бары туох баар усулуобуйа олохтоммут. Ол курдук, бу дьиэ икки мэндиэмэннээх, 65 миэстэлээх. Аны бу сэтинньи ыйга үөрүүлээх арыллыыта буолуоҕа».