Н.Д. Неустроев мэтириэтэ - Саха сирин рекорда
“Смарт” бибилитиэкэ Николай Неустроев аатын 2022 сылга ылыммыта, онтон ыла кини аатын уонна айымньыларын үйэтитэр сыалтан элбэх тэрээһин, өрөспүүбүлүкэ таһымнаах күрэхтэр ыытыллан кэллилэр. Билиҥҥи үйэҕэ аһаҕас интирниэт ситимигэр 1-2 эрэ хаартыската баар эбит буоллаҕына, худуоһунньук Күннэй Борисова бэйэтэ аныгылыы таҥан саҥа мэтириэтин уруһуйдаата. Уруһуй поп-арт аныгы хайысхаҕа киирсэр. Уопсайа 30 тахса акрил кырааска дьүһүнүн бэйэлэрэ таһааран хартыынаҕа туһаннылар.
Күннэй Борисова, уруһуй ааптара: «Араас дьүһүнү дьүөрэлээн улахан мэтириэт оҥорон таһаардыбыт. Итиэннэ 110 чааска үллэрэн улахан холустаҕа түһэрдибит».
Хартыынаны 110 тэҥ чааска үллэрэн, биир идэлээхтэр үлэлэрин түмтүлэр. Быйыл “Смарт” бибилитиэкэҕэ классик суруйааччы муннугун оҥорон саҕалаатылар, онно бу уруһуй сүрүн миэстэни ылыаҕа. Бу муннукка суруйааччы олоҕун туһунан туоһу хаартыскалар, кинигэлэрэ көрдөрүүгэ туруохтара.
Ньургуйаана Решетникова, Дьокуускайдааҕы библиотекалар ситимнэрин дириэктэрэ: «Николай Денисович үрдүк аатын дьон-сэргэ киэҥник биллин диэн бу курдук хабааннаах үлэлэри ыытабыт. Бибилитиэкэбитигэр киниэхэ аналлаах муннук оҥоруохтаахпыт. Онно бу олус үчүгэй түгэн түбэспитинэн мэтириэтин уруһуйдаттыбыт. Маны сэргэ өссө рекордка киириэхпит».
Холустаҕа ханнык чаас хайа дьүһүнүнэн уруһуйданыахтааҕа сыыппаранан бэлиэтэннэ. Ону көрөн барыларыгар барсар дьүһүнү наардаан түргэнник хартыыналарын түмтүлэр.
Уһун сылларга өйдөбүл буолан хаалар хартыына ааптардара устуоруйаны эрэ буолбакка, Саха сирин рекордун иккис сирэйин суруйдулар.
Андрей Шилов, СӨ өрөкүөрдүн кинигэтин бэрэссэдээтэлэ: «Тоҕо биһиги бэйэбит Сахабыт сирин рекордунан дьарыктаммаппытый диэн толкуйга кэлбиппит. Итиэннэ бастакы рекордпутун балаҕан ыйыгар Хаҥалас улууһун Булгунньахтааҕар оҥорбуппут. Ол кэннэ “Смарт” бибилитиэкэ биһиэхэ кыттыан баҕарарын биллэрбитэ».
Уһулуччу бастыҥ тиэрээһин кэккэтигэр киирэн үлэһиттэр үөрүүлэрэ муҥура суох. Хас биирдии кинигэ аанньала бэйэтин кылаатын Неустроев нэһилиэстибэтигэр ууран, үйэтитии үлэтигэр кыттыстыбыт диэн бэлиэтииллэр.
Мария Беленкова, "Смарт» бибилитиэкэ үлэһитэ: «Биһиги бибилитиэкэбит Н.Д. Неустроев аатын сүгэрин быһыытынан хайаан да кини улахан мэтириэтэ баар буолуохтаах диэн санааттан бу тэрээһини оҥордубут».
Дьэрэкээн дьүһүнүнэн киэркэйбит хартыына үйэлэргэ “Смарт” бибилитиэкэ истиэнэтин киэргэтиэҕэ. Оттон Николай Денисович Неустроев сырдык аата үйэлэргэ хаалыаҕа.
