Генетиктэр чинчийэр кыахтара кэҥиир

Саха сиригэр кэнники сылларга доруобуйа харыстабылын эйгэтигэр саҥа сүүрээннэр,  анал бырагыраамалар, оборудованиелар киирэ тураллар. Соторутааҕыта Саха сиринээҕи генетиктэр кииннэригэр саҥа анал бырагыраама кэллэ. Бу бырагыраама удьуорунан бэриллэр ыарыылары өссө дириҥник чинчийэн үөрэтэргэ, саҥа арыйыылары оҥорорго көмөлөһүө диэн быраастар бигэ эрэллээхтэр. Анал бырагыраама доруобуйа сайдыытын чэрчитинэн ылыллыбыт.

Айталина Сухомясова, М.Е. Николаев аатынан медицинскэй киин генетика салаатын сэбиэдиссэйэ: «Биллэр ыарыылар каталогтара баар, онно киирэр ыарыыга барытыгар диагноз туруорабыт. Онтон дьиэ кэргэҥҥэ генетикэ ыарыыта бэриллэр улахан куттала баар буоллаҕына эмиэ бу бырагыраама көмөлөһүөн сөп. Медицинэ киинигэр киирэн эмтэнэр оҕолору отучча араас ыарыыга бэрэбиэркэлиибит».

Архип Слепцов доруобуйа харыстабылын эйгэтигэр үлэлээбитэ, удьуорунан бэриллэр ыарыылары чинчийэн үөрэппитэ ыраатта. Бу саҥа бырагыраама киирэн генетикэ өттүнэн саҥа таһымна тахсар кыахтанныбыт диэн этэр. Бырагыраама сүрүн уратыта ыарыы хас да өрүттэрин түмэн, сөптөөх диагнаһы таһаарар кыахтаах.  

Архип Слепцов, М.Е. Николаев аатынан медицинскэй киин генетик-бырааһа: «Ыарыы хас да өрүттээх сибикилээх буолар. Ону бу саҥа бырагыраамабыт барытын түмэн диагноз таһаарар. Өссө биир үчүгэй өрүтүнэн ыарыһаҕы көрүү түмүгүн Госуслуги порталга ыытар кыахтанныбыт».

Маны таһынан киин лабораториятыгар саҥа оборудованиелар кэллилэр. Бу иннинэ генетик быраастар сорох сүрүн анализтары атын куоракка түмэн ыытан, түмүгүн күүтэр буоллахтарына, билигин саҥа оборудование ылан бэйэлэригэр оҥорор кыахтаннылар. Аныгы тэрил 30-тан тахса удьуорунан бэриллэр ыарыыны көрдөрөр.

Айталина Сухомясова, М.Е. Николаев аатынан медицинскэй киин генетика салаатын сэбиэдиссэйэ: «Гаас хромотограба диэн Уһук Илиҥҥэ суох тэрили ыллыбыт. Бу эмиэ судаарыстыбаннай быгаргыраама үбүлээһининэн кэлбит оборудование. Онон ыарыһаҕы тиһэҕэр диэри толору бэйэбит чинчийэр кыахтанныбыт. Маны сэргэ үрдүкү кылаастаах эдэр исписэлиистэрдэннибит».

Күн бүгүн удьуорунан бэриллэр ыарыылары чинчийэн үөрэтэр кииҥҥэ 70-тан тахса киһи үлэлиир. Киин эһиил үбүлүөйдээх 35 сылын бэлиэтиир. Онон инникитин киин өссө сайдан, кэҥиир былааннаах.