Үөһээ Бүлүү олохтоох уолаттара вездеходтары бэйэлэрэ таҥан оҥороллор

Хаары хаар, дулҕаны дулҕа диэбэт техника иннин хоту барар. Оттон бу Быракаан булугас өйдөөх уолаттара, тарбахтарыгар талааннаах эр бэртэрэ бэйэлэрэ таҥан оҥорбут туохтан да иҥнэн турбат,  вездеход техниканы айан таһаарбыттар. Бу дьарыгынан уолаттар номнуо 5-ис сылларын дьарыгыраллар эбит. Техника бу сыллар устата бэйэтин үчүгэйдик көрдөрбүт.

Анастасия Добрянцева: «Бэйэм ыытан көрөрго холоннум. Билигин бу Быракаан киин ууллуссатын устан айаннаан иһэбин. Олохтоох уолаттар оҥорбут вездеходтарынан. Вездеход 2л. объемнаах 4s двигатель турар уонна УАЗ мосталара. Айанныырга олус үчүгэй эбит».

Холобура, бу тимир көлө  устатынан, кэтититинэн улахан баҕайы. 3-4 киһи биирдэ батан айанныыр. Келөһөлөрө бадарааны, кутаны туох да эҥкилэ суох аһардаллар. Манна Тойота Виста мааркалаах массыына сүрэҕэ турар. Онон уматыгы сиирэ кэмчи диэн маастар кэпсиир. Уолаттар хас биирдии ымпыгар-чымпыгар болҕомтолорун уурбуттара тута харахха быраҕыллар. Уота-күөһэ, салайар уоттара барыта баар. 

Александр Саввинов, маастар: «Биһи дэриэбинэбитигэр манныгы оҥостор саамай наадалаах дии саныыбын. Холобур, урут дьоннор эрэйдэнэн, 2 хонугунан тиийэр сирдэригэр биһиги 1 чааһынан тиийэбит. Саха сиригэр билиҥҥи бириэмэҕэ киһи барыта дьарыктанар, интернет нөҥүө көрөн дьоннор оҥостоллор, биһи эмиэ хаалсыбаппыт онтон. Бэйэм бу 4-үс оҥоһугум буолар. Икки ый курдук оҥоробун, босхо бириэмэлээх буоллахпына, үлэлээх киһи буоллаҕым».

Александр бастаан утаа соҕотох саҕалаан баран, билигин быраатын Иннокентийы кытары бииргэ улэлииллэр. Сүбэ-ама бэрсэллэр. Иннокентий Саввинов бу иккис вездехода буолар.

Иннокентий Саввинов, маастар: «Бэйэм билигин Үөһээ бүлүү Намыгар олоробун. Кыра эрдэхпиттэн техникаҕа сыстыгаспын, аҕабытын, убайдарбытын көрөөччүм, кинилэр эмиэ манныгынан дьарыгыраллар. Ол иһин буолуохтааҕын курдук мин эмиэ. Бастакы “Сокол” курдук этэ, цельнорамнай. Иннигинэн дьарыктаммыппыт ыраатта, аймаҕынан бары. Бу биһи сирбитигэр сөптөөх техникалар. Материалбытын, тэриллэрбитин куораттан аҕалабыт, ыраах да буоллар. Бу убайым гарааһа, маннык курдук бэйэбэр гараастаахпын, барыта баар: плазморез, полуавтомат, туттарга сөптөөх».

Төһө да уолаттар иккиэн дьиэ кэргэннээх, улэлээх буолаллар, быыс-арыт булан, себүлүүр дьарыктарын олоххо киллэрэн хамсана-имсэнэ сылдьаллар. Александрдаах, Иннокентий номнуо бу техникаларын интириэһиргээччилэр кэлэн атыылаһан барбыттара. Чахчы тыа сиригэр бэртээхэй тэрили быраттыы Саввиновтар уурбут-туппут курдук, бэйэлэрин дууһалара тугу эрэйэринэн оҥостон, туохтан да иҥнэн турбаттар.