Хомсомуол болуоссатыгар бэйэ оҕуруотун аһын атыыта салҕанар
Главное
-
6 июля в 14:59Глава Якутии обсудил взаимодействие региона с Южным военным округом
-
6 июля в 13:49График отключения электроэнергии и водоснабжения в Якутске на 7 июля
-
6 июля в 11:51Национальный художественный музей Якутии приглашает на "Ювелирный сезон Даши Намдакова"
-
6 июля в 11:25Молодожёны из Якутии примут участие на Всероссийском свадебном фестивале в Москве
Сыл ахсын Хомсомуол болуоссатыгар күһүн хойукка диэри балааккаларынан олохтоох оҕуруот аһын атыыта тэриллэр. Манна биирдиилээн хаһаайыстыбалар, чааһынай эргиэмсиктэр, атыыһыттар кэлэн сүрүннээн улуустартан уонна куорат таһынааҕы бөһүөлэктэртэн кэлэн хортуоппуй, хаппыыста, сүбүөкүлэ, моркуоп, биэрэс атыылыыр кыахтаахтар.
Татьяна Николаева: «Хаппыыстанан кыстаммыт массыыналар, куулунан хортуоппуй, моркуоп, сүбүөкүлэ, луук тэлгэммит. Бу барыта олохтоох бэйэ дьон кылгас сайын устата көрөн, харайан, бүөбэйдээн үүннэрэн таһаарбыт бородууксуйата. Төһө даҕаны үлэ күнэ буолбутун үрдүнэн, бэйэ оҕуруотун аһын амсайар инниттэн дьон кэлиитэ көхтөөх. Ким кыһыҥҥытыгар куулунан атыылаһар, ким амсайарыгар киилэнэн ылар».
Тамара Саввинова дьиэ кэргэнинэн оҕуруот олордуутунан дьарыктаналлар. Күтүөтэ Николай Аммосов Хатаска бэйэтэ бааһынай хаһаайыстыбалаах. Быйыл үүнүү үчүгэй буолан уонунан туонна хаппыыста, кыралаан хортуоппуй көхтөөхтүк атыылаатылар. Бородууксуйалара барыта кэриэтэ атыыга хамаҕатык баран, билигин аҕыйах хаалбыт хаппыысталарын батараллар.
Тамара Саввинова, атыыһыт: «Хаппыыстам туһунан этэр буоллахпына, быйыл биһиэнэ үчүгэй баҕайытык үүннэ. Ортотунан холоон эттэхэ 60-70 туоннаны ыллыбыт. Хортуоппуй наһаа элбэҕи олордубаппыт 30 игин туонна буолуо. Сүбүөкүлэ, моркуоп төһөнү атыылрбытынан үүннэрэбит. Быйыл хаппыыста сыаната үрдүк да буолбутун иһин, атыыга син биир барда. Туох барыта сыаната үрдүүр, бензин игин, ол иһин күһэллэн үрдэтэбит».
Хортуоппуй, хаппыыста, моркуоп сүрүннээн Хатаһы тэҥэ, Хаҥалас, Нам, Уус-Алдан улуустарыттан кэлбит. Хаппыыста киилэтин 60 солкуобай диэн быспыттар, хортуоппуй 70 солкуобайга турар, онтон моркуоп, сүбүөкүлэ киилэтэ 80 солкуобайга тэҥнэһэр. Бэлиэтээн эттэххэ, былырыын моркуоп, сүбүөкүлэ 65-70 солкуобайга атыыламмыта.
Василий Апросимов, Дьокуускай олохтооҕо: «Хаппыыстаттан ураты моркуоп көрүөхпүтүн, моркуоптарбыт барыта улахан баҕайы. Биһи кыраны көрдүүбүт».
Билигин халлаан кэм сылаас турар, онон хаппыыстаны тууһуурга арыый эрдэ дииллэр. Ол эрээри улаханнык тоҥоро илигинэ атыылаһар табыгастаах диэн хаһаайкалар кэпсииллэр.
Ирина Чиряева, Дьокуускай олохтооҕо: «Киилэнэн көдүүбүн. Билигин тууһуурга эрдэ, тоҥо илик. Онуоха диэри харайыахха наада. Ол саҕана кэллэххэ хаппыысталара тоҥон хаалар. Хаппыыстаҕа сыана уларыйбатах быһыылаах, онтон атыттарга ыараабыт».
Сайсары ырыынагар таһырдьа өттүгэр олохтоох сибиэһэй эт кыралаан атыыга тахсан эрэр. Ынах этэ, киилэтэ 650 солкуобайтан, убаһа киэнэ 800 солкуобайтан са5аланар. Собо киилэтэ 4 мөһөөххө тэҥнэспит, отону уон лиитэрэтин икки тыһыынчаҕа атыылаһыахха сөп. Онон манна кэлэн амсайарга, тууһуурга, хаһаанарга олохтоох оҕуруот, сир аһын хото атыылаһыаха сөп. Хомсомуол болуоссатыгар атыы-тутуу халлаан туругуттан көрөн сэтинньи маҥнайгы күнүгэр диэри турара күүтүллэр. Онон хаалбыт нэдиэлэ курдук кэмҥэ ким наадыйарын ылынан, кыстыкка толору хаһаастаах үктэниэҕэ.