Өрөспүүбүлүкэҕэ үөрэх тэрилтэлэригэр куттал суох буолуутун хааччыйар үлэ тэриллэр
Главное
-
8 сентября в 05:25В Якутске пройдет Всероссийский форум молодых финансистов
-
8 сентября в 04:42В Якутии работают 186 избирательных участков в Единый день голосования
-
8 сентября в 04:20Поздравление главы Якутии Айсена Николаева с Днём города Якутска
-
8 сентября в 02:458 сентября. День в истории - даты, события
Үөрэх тэрилтэлэригэр куттал суох буолуутун хааччыйыы ирдэбиллэригэр анаммыт төгүрүк остуолу ис дьыла министиэристибэтин, Росгвардия, прокуратура үлэһиттэрэ иилээн-саҕалаан ыыттылар. Тэрээһиҥҥэ улуустартан оскуолалар, оҕо саадын, үөрэх кииннэрин салайааччылара кытыннылар. Мунньахха чуолаан куттал суох буолуутун хааччыйыы үлэтин былаанын, суол хаартатын, саҥа киирэр ирдэбиллэр, ону тэҥэ бүгүҥҥү күҥҥэ баар итэҕэстэри туоратыыга үлэ күүһүрүөхтээҕин тула кэпсэтии барда.
Захар Протопопов, Нам улууһунааҕы үөрэҕирии салалтатын исписэлииһэ: «Антитеррористическай комитеттар, росгвардия, прокуратура представительарын кытта тэрээһиннэр буолаллара олус үчүгэй. Кинилэргэ биһи эмиэ тустаах ыйытыылардаахпыт. Күн аайы маннык көрсүбэппит, маннык атах тэпсэн олорон олорон кэпсэппэпит. Сүрдээх үчүгэйдик арылыччы быһааран биэдилэр. Туох саҥа сүүрээн киирбитин, хайа өттүтүгэр бэлэмнээх буолуохтаахыпытын. Барытын аһаҕастык кэпсээн биэрдилэр. Бу тэрээһин олус туһалаах буолла. Үлэбитигэр итини туһанабыт буоллаҕа».
Аҕыйах сыллааҕыта дойду кэккэ куораттарыгар университекка, колледжка, ону тэҥэ уһуйааҥҥа тахсыбыт быһылааннар кэннэ үөрэх уонна социальнай эбийиэктэр көмүскэллээх буолууларыгар бэрэбиэркэ үлэтэ, ирдэбил кыттааппыта. Маныаха өрөспүүбүлүкэ үрдүнэн уһуйааннарга, эбии үөрэхтээһин кииннэригэр харабыл, видеонанан кэтээн көрүү оборудованиета суоҕун, биитэр эргэрбитин быһаарбыттара. Хас биирдии эбийиэккэ периметрдарынан видеокамералар тураллара ирдэнэр. Мунньахха ирдээһинэн эрэ муҥурдаммакка, куттал суох буолуу үлэтигэр өйдөммөт түгэннэри быһаарыы наадатын бэлиэтээтилэр.
Елена Старкова, Муома улууһун оҕо айар дьиэтин медиакиинин салайааччы: «Билиҥҥи ыарахан кэмҥэ хайаан ди билиэхтээхпит буоллаҕа. Мин сөбүлээбит ыйытыым – Нам улууһуттан сылдьар киһи ыйытта: үөһээттэн араас суруктар кэлэллэр, ону ол туох туһунан буоларын, ону хайдах туһаныахтаатхпытын. Ол алгоритмын биһиэхэ быһаарыахха наада сороҕор».
Сылын ахсын антитеррор утары араас тэрээһиннэр ыытыллаллар. Быйыл балаҕан ыйын 26 күнүттэн куттал суох буолуутун ыйа биллэриллэн бара турар. Бу чэрчитинэн үөрэх тэрилтэлэрин үлэһиттэригэр идэ таһымын үрдэтэр куурустар буола тураллар. Көмүскэллээх буолуу үөрүйэхтэрин киин сир бөдөҥ куораттарын оскуолаларыгар эрэ буолбакка, ыраах тыа сирин үөрэҕин кыһаларыгар биллэн турар эмиэ сыһыаннаах.
Василена Тихонова, Муома орто оскуолатын дириэктэрэ: «Хоту олоробут диэбэккэбит, олус суолталаах ыйытыы буолар. Оҕо уонна үлэһит куттал суох буолуута сытыытык отой туруон наада. Биһи куттанан саҥарбаппыт ол туһунан. Биһи ыраах олоробут, оннук суох дии саныыбыт. Ол гынан баран оҕолору үөрэтиэххэ наада, син биир улахан куораттарга, ханна эмит сылдьан оннука түбэстэхтэринэ хайдах буолалларын, тугу гыныахтаахтарын билиэхтэрин наада».
Онон аныгы дьалхааннаах кэм ирдэбилинэн, хас биирдии тэрилтэҕэ куттал суоһаабатын туһугар тустаах үлэ ыытыллара тоҕоостоох.