Дьокуускайга суолу-ииһи ыраастыыр үлэлэр ыытыллаллар

Алтынньы ый 15 күнүттэн кыһыҥҥы үлэ болдьоҕор киирэн Якутдорстрой куорат уулуссарын хаартан ыраастыыр. Уопсайа бу дьылга 50 тахса тиэхиньикэ бэлэми ааһан, үлэ үөһүгэр сылдьар. Урукку кэмҥэ халтыраантан сэрэтэргэ үлтүркэй таас кыырпаҕын туһанар эбит буоллахтарына, бу сылтан оптуобус тохтобулларыгар, суолу туоруур сирдэргэ кумаҕы кутар буоллулар. Урукку ньымаҕа төннүү суол туругун, тиэхиникэни харыстааһынтан төрүөттэнэр. Үлтүркэй таас кыырпаҕын арай эргийии суолларга туттуохтара.

Владислав Слепцов, Дьокуускай территорияларын кытта үлэҕэ департамент салайааччыта: «Бүгүн күҥҥэ биһиэхэ бэдэрээтчиттэр үлэлии сылдьаллар. Урут тротуары Якутдорстрой хомуйар буоллаҕына, быйылыгыттан бэдэрээтчиттэр хомуйаллар. Куорат улаата турар. Хас уокурук аайы бэйэтэ бэдэрээтчиттээх. Бүгүҥҥү күҥҥэ эттэхэ 40-ча бэдэрээтчит үлэһитэ үлэлии сылдьар, онтон ураты 56 муниципальнай үлэһит көмөлөһөр».

Куорат үрдүнэн суол үлэтигэр нэдиэлэҕэ 260 тахса тиэхиньикэ үлэлии тахсар. Маны таһынан тимир көлө кыайан тиийбэт сирдэрин үлэһиттэр илиинэн ыраастыыллар. Бастаан күрдьэҕинэн кыра-кыра чөмөхтөрү муспуттарын кэннэ,  кыра тараахтыр кэлэн хомуйар.

Светлана Чусовская, Дьокуускай куорат хаһаайыстыбатын салалтатын салайааччытын тупсаран оҥорууга солбуйааччы: «Уборка снега тоже началась. У нас разделены потоки по грейдированию по прибордюрной части, по срезке осевой, также накаты мы все равно видим и это конечно необходимо убирать. Работает предприятие в две смены: с 8 утра до 8 вечера, потом пересмена с 8 вечера до 8 утра».

Якутдорстрой тэрилтэҕэ 5-с сылын үлэлиир Прокопий Кычкин сарсыардаттан хараҥарыар диэри суол хаарын ыраастыыр. Кинилэр биригээдэлэригэр 5-6 күрдьээччи уонна 2 тиэйээччи үлэлиир. Быйыл хаар чараас буолан, ноҕорууска кыра диэн улэһит бэлиэтиир.

Прокопий Кычкин, "Якутдорстрой" үлэһитэ: «Сарсыарда 8-тан киэһээ 5-кэ дылы маннык уулуссаны, тротуардары хомуйабыт, ыраастыыбыт. Туох сорудах биэрбиттэринэн үлэлиибит. Быйыл хаар түһүүтэ аҕыйах быһылаах, уруку сылы холоотоххо».

Суол үлэһиттэригэр биир улахан сигэлэринэн халлаан туруга буолар. Күнү-дьылы кэтээн көрөөччүлэри кытта быһаччы сибээстээх улэлииллэр. Кинилэр сабаҕалааһыннарынан эмискэ хаардыыр түгэнигэр тиэхиньикэ ахсаанын элбэтэллэр.

Уйгулаана Николаева: «Хаары бастаан элбэх массыына сылдьар уулуссаларын ыраастыыллар, онтон куорат атын уулуссаларыгар ыйдааҕы былаан тутуһан үлэ барар. Күҥҥэ биир биригээдэ Лермонтов уулуссатыттан Киров уулуссатыгар диэри хаар ыраастаата».

Күн-дьыл уларыйыыта суол хаачыстыбатыгар уонна айаҥҥа саахал тахсарыгар сүрүн төрүөт буолар. Сыл саҕаланыаҕыттан Дьокуускайга барыта 3700 суол саахала бэлиэтэннэ.

Жанна Макарова, иниспиэктэрэ: «Суолга халтыраан саҕаланыаҕыттан, эбэтэр бу ый 4-үс күнүттэн 200-тэн тахса суол саахала бэлиэтэннэ. Манна сүрүн өттө тимир көлөлөр харсыһыылара, суолтан туорааһын уонна сатыы дьоннору түннэри көтүү буолар Дьокуускай куораттааҕы суолга-иискэ куттал суох буолуутун хааччыйар инспекция суол бары кыттыылахтарыгар күн-дьыл уларыйыытынан сибээстээн суолга үөскүүр кэмигэр болҕомтолоох уонна сэрэхтээх буолун диэн сэрэтэр».

Халтыраан кэмҥэ тимир көлөнөн сылдьааччылар суолга дистанцияны тутуһан бытааннык сылдьаллара ирдэнэр. Оттон суол үлэтигэр 33 аҥаар туонна отсев уонна 200 куб. өрүс кумаҕа бэлэмнэннэ.