Саха сиригэр социальнай бырагыраамманан гаас ситимин тардыы салҕанар
20 сыл устата тимири уһааран кэлбит уопуттаах сварщик Владимир Федоров быйылгы тутуу дьылын түмүктүүр түһүмэҕэр үктэннэ. Күөх төлөнү тардыы эйгэтигэр өр сыллар тухары үлэлээн кэллэ. Аны социальнай гаазтааһын бырагыраамма үлэлиэҕиттэн, үлэтин таһыма, кээмэйэ элбээн, күн-түүн үлэ үөһүгэр сылдьар.
Владимир Фёдоров, "Сахастройгаз" тэрилтэ сварщига: «Турба уурталыы сылдьаллар, сваркалыыбыт. Үлэлээбиппит икки нэдиэлэ буолан эрэр. Бу үлэбитин бүтэрдибит да атын абыйыакка барабыт. Үлэбит элбэх».
Билиҥҥи туругунан "Сахастройгаз" тэрилтэ куорат таһынааҕы баар учаастагар үлэтин түмүктээри бэлэмнэнэр. Аттынааҥҥы сытар күөх төлөн турбаларын кытары сир аннынааҕы үрдүк күүрүүлээх ситими кытары холбоон саҥа тутулла, кэҥии турар түөлбэ дьонун гааһынан хааччыйыахтара.
Айтал Павлов: «Билигин бу Новосельскай уулуссаҕа 300-тэн тахса миэтэрэ хаалла. Бу манна сири 1,2 миэтэрэ хаһаннар икки 90-наах уонна 110-наах полиэтиленовай турбаны угуохатара. Ол кэнниттэн Бу үлэ түмүктэммитин кэннэ бу эргин баар 10-тан тахса ыалга күөх төлөн киириэҕэ».
Бу учаастакка бэһиэ буолан үлэлииллэр. Икки нэдиэлэ устата 900-тэн тахса миэтирэ сири хаһан турбаларын ситимнээтилэр. Үлэлэрин алтынньы ый 25 күнүгэр диэри түмүктүөхтээхтэр.
Айаан Афанасьев, "Сахастройгаз" тэрилтэ дириэктэрэ: «Новосельскай оройуонна уулуссаҕа 1,2 км газопровод уурдубут. 300-тэн тахса миэтэрэ курдук хаалла. Көмөрбүт хаалла уонна биир шкафной 100-тээх, 6 подводящай оҥорорбут хаалла».
Социальнай гаазтааһыҥҥа күөх төлөн киирбит нэһилиэнньэлээх пууннарыгар олорор дьон хапсаллар. Сайабылыанньа биэрэн күөх төлөнү тартаран, холботуохха сөп. Быйыл бырагыраамма олоххо киирбитэ 3 сылыгар барда, өссө да былаан киэҥ.
Фёдор Неустроев, "Сахатранснефтегаз" тэрилтэ гаас ситимин тарҕатар салалтатын оннуттан тутууга салаатын салайааччыта: «Социальнай гаазтааһын өттүнэн үлэ элбэх. Билэргит курдук, былырыҥҥытан саҕалаан Ликвидация дефицита үлэлэрин ыыта сылдьабыт. Покровский тракт уҥа-хаҥас өттүтүгэр былырыын-быйыл үлэлээтибит. Быйылгыттан улахан үлэни Намский тракт 13 км-га ыыта сылдьабыт.».
Социальнай гаазтааһын бырагыраамма 2021 сыллаахтан бүтүн дойду үрдүнэн тэтимнээхтик үлэтин саҕалаабыта. Билиҥҥи туругунан Сахабыт сирэ Уһук-Илиҥҥи уокурукка нэһилиэнньэни күөх төлөҥҥө холбооһуҥҥа бастакы миэстэҕэ, онтон бүтүн Арассыыйа үрдүнэн 13 миэстэҕэ турар. Бырагыраама чэрчитинэн 2030 сылга диэри 15,5 тыһыынча дьиэҕэ босхо күөх төлөн киириэхтээх.
Артём Попов, "Сахатранснефтегаз" тэрилтэ гаас ситимин тарҕатар салалтатын күөх төлөнү холбуур салаатын салайааччытын эбээһинэһин толорооччу: «Быйылгы былааҥҥа биһиэхэ 2100 ыалга гаас киллэриэхтээхпит. Быйыл уопсайа 3400 дуогабар баттастыбыт. Онон 3200 кэриҥэ дьиэҕэ газопровод-ввод тардан турабыт. Билиҥҥи турукка уопсайа 1600 дьиэҕэ гаас киирэн турар. Бэйэбит аналитикабыт көрөн турарынан 2500 тахса дьиэҕэ күөх төлөн киириэхтээх. Уопсайа социальнай газификацияҕа бүгүҥҥү турукка 4,5 тыһ. дьиэ холбонон турар, 220 км. гаас ситимин тардан турабыт».
Бырагыраамма тиһигин быспакка үлэтин салҕыыр, баҕалаах дьон "Сахатранснефтегаз" тэрилтэни кытары сөбүлэҥ түһэрсэн, уһаайбаларыгар диэри босхо күөх төлөн ситимин аҕалыахтарын сөп.
