"Россия - мин историям" историческай парк төрүттэммитэ быйыл 6 сылын бэлиэтиир

Дьокуускай олохтоохторо Никоновтар дьиэ кэргэн кыра уолларын Сашаны илдьэ «Россия - мин историям» мусуойга аһаҕас аан күннэрин сонуннартан билэн, кэлэн көрө сылдьаллар. Дьиэ кэргэн уоппускаларыгар сылдьар буолан иллэҥ кэмнэрин туһалаахтык атаарарга санаммыттар. Түмэл барыта аныгы экраннарынан, проектарынан хааччыллбыта, көмпүүтэр курдук көрүөххэ сөбө киһи болҕомтотун тардар диэн дьиэ кэргэн санаатын үллэстэр.

Николай Никонов, Дьокуускай олохтооҕо: «Интерактивнайа үчүгэй уонна историяны саҥаттан көрдөрөллөр эбит».

Татьяна Никонова, Дьокуускай олохтооҕо: «Оҕобут ойуулук курдук көрөр. Сенсорнай экраннары интириэһиргиир, баттаан көрөр».

«Россия - мин историям» мусуой 6 сыллааҕыта төрүттэммитэ. Бу кэм иһигэр түмэлгэ 500 тыһ. тахса киһи сылдьыбыт, онтон 100 тыһ. тахса оҕо. Уопсайа 200 кэриҥэ быыстапка, 900-тэн тахса араас тэрээһин уонна 6 тыһ. экскурсия тэриллибит. Аһаҕас аан күнүн көрсө түмэлгэ 4 сүрүн быыстапка үлэтин сөргүттэ. Ол курдук Романовтар, Рюриковичтар, 1914 сылтан - 1945 сылга диэри кэм уонна Улуу Кыайыы сылыттан билиҥҥэ диэри кэми ойуулуур-көрдөрөр эскпозициялар тураллар. 

Айсен Габышев, "Россия - мин историям" мусуой методиһа: «Рюриковичи саала Арассыыйа историятын кэпсиир. 862 сылтан 1598 сылга дылы. Ол эрээри хас саала аайы региональнай компонент диэн баар – Саха сирин историятын кэпсиир. Холобур: бастакы саалаҕа – таас үйэ туһунан. Ханнык археологическай культуралар олорбуттарын – неолит уонна палеоазиаттар: юкагирдар, чукчалар тустарынан. Кинилэр хайдах олорбуттарынан, хаһаайыстыбаларын туһунан».

Историческай парк урукку кэмтэн ыла билиҥҥи олох-дьаһах сүрүн түһүмэхтэрин көрдөрөр. Манна бэрт кылгас, сүрүн информация киһиэхэ өйдөнүмтүө көрүҥүнэн, араас хаартыскаларынан, ойууларынан бэриллэр. Холобур, хас биирдии кэрдиис кэмҥэ Саха сирин историята, сүрүн түбэлтэлэрэ, кыыла-сүөлэ ойууланар. Кэлбит киһи манна бэйэтигэр интэриэһинэй иһитиннэрии булуон сөп.

Анатолий Семёнов, "Россия - мин историям" мусуой экскурсовода: «Бу мусуойбут 2017 сыллаахха арыллыбыта, Номнуо 6 сыла буолла. Бу сыллар быһа холоон көрдөххө моллүйүөн аҥаара киһи сылдьыбыт биһи түмэлбитгэр. Мусуойбут элбэх үлэни толордо, дөрүн-дөрүн саҥа быыстапкалар арыллаллар. Холобур, Дьокуускай куораппыт төрөөбүт күнүгэр аналлаах «История в настоящем» диэн, уонна «Якутия – Новороссия» диэн быыстапка».

Мусуой быйыл дойду үөрэҕириитин министиэристибэтин көмөтүнэн саҥа лазернай бырайыактардарынан хааччыллынна. Онон үлэ өссө үрдүк таһымҥа тахсан араас экпозициялары, быыстапкалары туруорууга бэлэм. Түмэл салгыы даҕаны чуолаан үүнэн эрэ көлүөнэни историяны ытыктыыр, инникитин торумунуур киэҥ билиилээх дьон буолалларыгар үлэлэһэр соруктаах.