Ньургун Боотур опера күөх экраҥҥа көстөр буолла

52

Ньургун Боотур опера күөх экраҥҥа көстөр буолла. Өрөспүүбүлүкэ төрүттэммитэ 100 сылыгар аналлаах бөдөҥ туруоруу, билигин аны Опера уонна балет тыйаатырын сыанатыгар буолбакка, тыа сирин дьонугар уһуллан көстөр кыахтанна. Саха сирин бары олохтоохторо операнан дуоһуйалларыгар усулуобуйа олохтонно.

Александр Емельянов, Ньургун Боотур оруолун толорооччу, СӨ норуодунай артыыһа: «Биһиги Сахабыт сирин олохтоохторо, эдэр ыччаттар, оҕолор, ыраах олорор нэһилиэнньэлэр Ойуунускай оператын көрүөхтэрэ диэн олуһун үөрэбит. Тоҕо диэтэххэ кинилэр кыайан театрга кэлбэттэр буоллаҕа, ол иһин бу үчүгэй бырайыак дии  саныыбын».

Опера - киинэ нөҥүө дьоҥҥо чугаһыырын, элбэх киһи көрөрүн, Опера уонна балет тыйаатырын кытта Экстра-синема холбоһуктаах бырайыактара, ситиһэр буолла. Өрөспүүбүлүкэҕэ кыра нэһилиэнньэлээх пуннарга барыта 27 киинэ саалаҕа Ньургун Боотуру көрдөрүөхтэрэ. Онуоха бастакы хардыы Тулагы - Киллэмҥэ оҥоһулунна. Быйыл Тулагыларга куорат күнүгэр Экстра-синема саҥа киинэ проекторын бэлэхтээбитэ.

Александра Харитонова, кулууптар тэриллиилэрин салайааччыта, СӨ култууратын туйгуна: «Куоракка бараннар күннэрин-дьылларын бараабаттар, автобуска айаннаабаттар, харчы төлөөбөттөр. Манна чугастыы олороччулар кэлэллэр, киинэни төлөөтүлэр, көрдүлэр уонна тарҕаһаллар. Олус үчүгэй маннык бырайыак биһи культурабыт киинигэр арыллыбыта. Биһи сэбиэдиссэйбит Максим Пантелеймонович туруорсан арыйтарбыта нэһилиэк олохтоохторугар барыларыгар үөрүүнү аҕалбыта».

Ньургун Боотур күөх экраҥҥа тахсарыгар тыйаатыр артыыстара нэһилиэнньэни кытта көрсөн кэпсэтэллэр. Бырайыак чэрчитинэн, сүрүн оруоллары толорооччулар бэйэлэрин санааларын, төһө бэлэмнэммиттэрин дьоҥҥо-сэргэҕэ тириэрдэллэр. Онон кэлбит дьон киинэ саалаҕа операны көрөн эрэ баран тарҕаспат, хайаан да санаа атастаһан ааһар, ирэ-хоро кэпсэтэр.

Ксения Баишева, Тулагы-Киллэм олохтооҕо: «Саха культурата, Опера уонна балет тыйаатыра бу операны киинэҕэ таһаарбытыттан бу сүдү улахан үлэ буолар. Олохтоох тыа сиригэр олорор нэһилиэнньэҕэ бу куоракка баар Опера тыйаатырын артыыстара толороллорун аргыый аҕай олорон көрөллөрүгэр, истэллэригэр, сыаналыылларыгар улахан суолталаах».

Олоҥхо дойду тэбэр сүрэҕэр Большой уонна Мариинскай тыйаатырдарга толору саалалаах көстүбүтэ. Аны Саха сиригэр толору көрөөччүлээх киинэ саалаларыгар көстөр кыах бэрилиннэ. Сотору кэминэн Ньургун Боотур опера бүтүн Арассыйатааҕы Золотая маска бириэмийэҕэ кыттыаҕа.