Мобильнай быраастар номнуо иккис сырыыларын хоту уонна Арктика улуустарыгар үлэлииллэр

Билигин икки биригээдэ Дьааҥы уонна Абый улуустарыгар үлэлии сылдьаллар. Абыйга улуус оҕолорун туругун 11 араас исписээлиис көрөр-истэр. Ол курдук манна невролог, лор, эндокринолог, хирург быраастар кырачааннар доруобуйаларын чинчийэллэр. Киин куораттар барбыт биригээдэ улуус хас биирдии нэһилиэгин кэрийэн, оҕону барытын көрөн бүтүөхтэригэр диэри үлэлииллэр. Тутатына узига түһэрэн, ачыкы ырысыаба усуруйан, анаалыс ылан, кардиограммаҕа, холтерга түһэрэн толору көрүүнү оҥороллор. Ордук наадыйыллар тиис бырааһа бу сырыыга тиийэн олохтоохтор үөрүүлэрэ үгүс.

Вера Босикова, педиатр быраас, Абыйга үлэлиир биригээдэ салайааччыта: «Уопсайа 188 оҕону көрдүбүт. Оҕо тииһин бырааһа бу улууска суоҕа биллэр эбит. Кини өҥөтүгэр наадыйар оҕо элбэх эбит. Медосмотр түмүгүнэн 41 оҕо учуотка ылынна, 38 оҕо Дьокуускайга чинчийэн көрүүгэ барарга туһаайыы бэрилиннэ уонна 1 оҕоҕо улуустааҕы киин балыаһаҕа туһаайыы биэрэн стационарга киллэрдибит».

Онтон Дьааҥы улууһугар быраастар биригээдэлэрэ алтынньы саҥатыттан үлэлиир. Номнуо 5 нэһилиэги хабан көрдүлэр.  Бу оройуоҥҥа мобильнай быраастар үһүс сырыылара. Онон сүрүн болҕомто эрдэ көрбүт дьонноругар. эмтэнии хайдах баран иһэрин, анаалыстар көрдөрүүлэрин тэҥнээһин барар.

Татьяна Дьячковская, терапевт быраас, Дьааҥы улууһугар үлэлиир биригээдэ салайааччыта: «Биһиги сүрүн үлэбит сыалынан буолар саас биһи быраастарбыт учуотка ылбыт ыарыһахтарын ыҥыраммыт көрөбүт. Доруобуйаларын туруктарын, хайдах эмптэрин иһэ сылдьалларын, анаалыстаан, ЭКГ түһэрэн чинчийэн көрөбүт».

Хотугу улуустарга сүрүннээн сүрэх, тымыр, ону таһынан эндокриннай систиэмэ, сүһүөх ыарыылара үгүстэр диэн быраастар бэлиэтииллэр. Көрүү түмүгэр ыарыһахтары оройоун эбэтэр өрөспүүбүлүкэ балыыһаларыгар учуокка туруораллар. Онон бу үлэ биир тиһиктээхтик барар. Бырайыак үлэлиэҕиттэн 2,5 тыһ. киһини киин куоракка салгыы көрдөрүнэргэ, диагноһы чопчулатарга анаабыттарыттан 850 киһи кэлэн барбыт.

Мария Дмитриева: «Мобильнай быраастар бырагыраама олоххо киириэ5иттэн, ол эбэтэр бу сыл олунньутуттан уопсайа барыта 13 улууска 30 тыһ. киһини көрдүлэр. Мантан 10 тыһ. оҕо. Манна 34 анал быраастар биригээдэлэрэ үлэлээтэ».

Бу бырайыак номнуо көдьүүстээҕин көрдөрдө. Онон эһиил эмиэ салҕанар. Сылга иккитэ эрэ буолбакка быраастар биригээдэлэрэ хотугу сир дьонун доруобуйатын үстэ көрүөхтэрэ. Итиэннэ инникитин исписэлиистэр ахсааннарын элбэтиэхтэрэ. Маны сэргэ хоту эрэ улуустары буолбакка суола - ииһэ суох нэһилиэктэри хабар сорук турар.

Артем Ксенофонтов, "Мобильнай быраастар" бырайыак салайааччыта: «Арктика эрэ буолбакка, былаан быһыытынан сылдьарга эрэйдээх нэһилиэнньэлээх пууннарга Саха Сирин правительствотын уурааҕынан 122 нэһилиэк киирэн турар. Билигин үлэтэ бара турар. Этэҥҥэ табыллыннаҕына Арктика эрэ буолбакка өссө 122 нэһилиэк киирдэҕинэ үчүгэй буолуо этэ».

Оччоҕуна мобильнай быраастар бырайыак кэҥээн өрөспүүбүлүкэ бүттүүнүн хабыаҕа. Итиэннэ инниктин федеральнай ырысыабынан бэриллэр эмтэри түҥэтэргэ үлэ барар.