Тулагы агротехническай орто оскуолатыгар органическай аһы-үөлү чинчийэллэр

89

Тулагы агротехническай орто оскуолатын 9 "в" кылааһын  үөрэнээччитэ Самира Миронова биология учуутала тугу кэпсиирин болҕомтолоохтук истэр. Оттон күн бүгүн тустаах кылааска саҥа сүүрээн - органика уруога ыытыллан саҕаланна. Бу саҥа киллэриини Тулагы орто оскуолата Өрөспүүбүлүкэ үрдүнэн аан бастакынан ыытан саҕалаата. Сүрүн сыал-сорук - о5олорго экологическай ыраас бородууксуйанан аһааһыны иҥэрии буолар.

Самира Миронова, Тулагы агротехническай орто оскуолатын 9 "в" кылааһын  үөрэнээччитэ: «Уопут оҥорбуппут, ол онно биһи сүөгэй хаачыстыбатын, ууга буккуйан кырахмаллаах ду суох ду диэн, сытын уонна көрүҥүн көрдүбүт».

Билигин промышленность, производство сайда турар кэмигэр. Экология эрэ буолбакка, ас-үөл хаачыстыбата эмиэ намыһах таһымҥа турар. Онон үүнэр келүөнэ оҕолоро өйдөөхтүк, аһыыр астарыгар болҕомтолорун ууралларыгар сыалланар тустаах, Тулагы орто оскуолата Москва куораты кытары ситимнээхтик улэлээн 16 академическай чааһы ылан, оҕолору органическай аска-үөлгэ сыһыарар уруоктары ыытан саҕалаата.

Анна Сметанина, Тулагы агротехническай орто оскуолатын биологияҕа учуутала: «Быйыл биһи оскуолабыт саҥа Арассыыйа үрдүнэн буолар куонкуруска кыттар. Ол куонкуруһу фонд «Органика» ыытар. Бу куонкурус наадалаах дии саныыбын оҕолорго, тоҕо диэтэргэ оҕолор бу куонкуруска кыттаннар саҥа органическай продукцияны хайдах оҥорору билэллэр, хайдах арааһынай ньымалары тутталарын билэллэр.».

Күн бүгүн органическай аһылык, ол эбэтэр туох да атын эттигэ, синтетическай эбилиитэ суох бородууксуйа суох кэриэтэ. Биллэн туран бу доруобуйаҕа олус дьайар. Дьиҥ бэйэбит төрүт аспытыгар - үрүҥ аска, бэйэбит улаатыннаран, иитэн таһаарбыт эппитигэр болҕомтону уурууга бу сана сүүрээн киллэрии уруок төһүү буолуоҕа.

Мария Лугинова, Тулагы агротехническай орто оскуолатын дириэктэри үөрэх чааһыгар солбуйааччы: «Тулагы орто оскуолата агро хайысхалаах буоларбыт быһыытынан, биһиги оҕолору кыра кылаастарыттан ол хайысханнан үлэлэтэбит-үөрэтэбит. Бу быйыл саҥа сүүрээммитинэн буолар органическай бородуксуйаны үөрэтии. Оҕолор бэйэлэрэ үлэлээн-оҥорон таһаарбыт бородуксуйаларын үүннэрэн, иитэн, ас оҥорон, хайдах олоххо туһаныахтарын сөбүн, сөпкө аһааһын туһунан үөрэтии буолар».

Маны таһынан уопсай уерэхтээһин бырагырааматын ааспыттарын кэнниттэн, оҕолор Дойду таһымнаах органика күрэҕэр кыттыыны ылыахтара. Икки бөлөҕүнэн хайдан 5-7 кылаастар уонна 8-9 кылаастар. Куонкурус түмүгүнэн кыайылаах оҕолор үлэлэрэ "Органика азбукатыгар уонна "Органика альманааҕыгар" киириэхтэрэ. Түмүк тахсан, кыайыылахтары кэлэр сыл кулун тутар 24 кунугэр  үөрүүлээх-быһыыга майгыга наҕараадалыахтара.