Саха сиригэр "Нам" өрөспүүбүлүкэ суолталаах суолун өрөмүөннээн туттардылар

57

Аалай лиэнтэ быһыллан, күөх уот бэриллэн саҥардыы оҥоһуллубут суолунан массыына тигинии айанныыр. Нам улууһун олохтоохторун үөрүүтүгэр 10 километр усталаах, 2 балаһалаах суол саҥардыллан оҥоһуллан, өр сыллар тухары төһөлөөх элбэх суоппар көлөһөнүн тохпут сирэ дьэ, остуол ньуурун курдук көнө суол тэлгэнэн олохтоох дьон үөрүүтэ муҥура суох.

Юрий Слепцов, Нам улууһун баһылыга: «Бу сылга, тохсунньу ый 9 күнүгэр киниэхэ керсүһүүгэ киирэн кэпсэтии буолбутугар – Айсен Сергеевич бу суол наадатын өйдөөн, сыал-сорук туруоран онтон үлэ саҕаланан бу суол түмүктэннэ. Бу суол оҥоһулларын биһи – намнар кэтэспиппит ыраатта. Аспаал суоллаах этибит да туруга куһаҕан этэ».

Үгэс быһыытынан саҥа баараҕай тутууну алгысчыт арыйан, үрдүк айыылартан көрдөһөн, мустубут дьон алгыс ыллылар.

Айтал Павлов: «Нам улууһа олохтоохторо суол өрөмүөнүн күүппүттэрэ ыраатта, ол курдук бу тохсунньу ыйтан саҕалаан 10 км. усталаах 2 балаһалаах суолу толору өрөмүөннээн аспаллаан бүтэрдилэр».

Суолу саҥа буорунан куттулар, 2 бүк аспааллаатылар, ууну аһардар 3 турбаны уурдулар уонна 84 суол бэлиэтин туруордулар. Эбийиэги бэриллибит болдьохтон 1 сыл эрдэ туттардылар. Быйыл уопсайа Нам суолугар 20 км. оҥоһулунна. Өссө даҕаны былаан элбэх.

Анатолий Потапов, СӨ транспорт уонна суол хаһаайыстыбатын миниистирин бастакы солбуйааччы: «Салгыы Нам улууһугар үлэ-хамнас туох барар диир буоллахха – быйыл биһи өссө Нам суолугар 120-130 км. «Уйгу-Быйаҥ» хааччахтаммыт тэрилтэ абыйыагы туттаран турар уонна аҕыйах хонуктааҕыта биһиги «Уйгу-Быйаҥы» кытта өссө биир кантыраагы баттастыбыт. Ол онно 133-153км. ол эбэтэр Түбэ нэһилиэгэр дылы суолу нормативка эппиэттиир гынарга бэлэммит».

Дьокуускай куоракка эмиэ биир бэлиэ түгэн тосхойдо. Ол курдук хапытаалынай өрөмүөн кэннэ Островскай аатынан уулусса арылынна. Уопсай устата 265 миэтирэ буолла, 2 балаһалаах уонна 2 миэтирэ кэтиттээх дьон хаамар сирдэннэ. Уонна саамай сүрүнэ ууну, чалбаҕы аһардар кыахтанна.

Евгений Григорьев, Дьокуускай куорат баһылыга: «Сүрдээх үөрүүлээх. Бу уулусса уһуна 255 м. Ол кудук, бу уулусса оҥорорбутугар уу ыытары оҥорбуппут, саҥаттан тротуар оҥордубут, саҥа парковка оҥордубут уонна канализация ааһар үрдүнэн «зелёнка» хааллардыбыт аспаал алдьамматын курдук гына. Уопсайынан эттэххэ, бу сыл биһиги 30-ча км. суолу оҥордубут, 19 суола быйыл киирдэ уонна аныгыс сылга көһөр абыйыактар бааллар».

Өрөмүөннэммит эбийиэктэри үөрүүлээх быһыыга-майгыга арыйыыны дойдубутугар суол үлэһиттэрин идэлээх бырааһынньыктарыгар анаатылар. Бу күн суолу тутааччылары, өрөмүөннээччилэри, куттала суох айаны хааччыйааччылары чиэстээтилэр.