Саха сиригэр икки нэһилиэккэ гаас ситимэ тардылынна
Главное
Өлөчөйгө үөрүүлээх түгэн тосхойдо. Олохтоохтор өр кэтэспит баҕа санаалара олоххо киирдэ. Бөһүөлэккэ күөх төлөн уота умайда. Үөрүүлээх тэрээһиҥҥэ олохтоохтор, улуус, нэһилиэк салалтата уонна Сахатранснефтегаз салалтата итиэннэ Ил Дархан куйаар ситимин нөҥүө кыттыыны ыллылар.
Айсен Николаев, СӨ Ил Дархана: «Өлөчөйгө, бөһүөлэктэр икки ардынааҕы газопровод кэлэн эһиил өттүгэр улахан үлэ ыытылланнар, Өлөчөй барыта дьиэлэрэ гааска холбонуохтара диэн биһи эрэллээхпит. Ол иһин ити улахан үөрүүлээх түгэнинэн Өлөчөй уонна Хатылы дьонун-сэргэтин, улуустар олохтоохторун, Сахабыт Сирин дьонун-сэргэтин итиитик-истиҥник эҕэрдэлиирбин көҥүллээн».
Бүтэйдээхтэн Өлөчөйгө диэри бу сайын 9 км. уһуннаах гаас утаҕа, ону тэҥэ сэлиэнньэ иһигэр уопсайа 2 км. уһуннаах ситим тардыллыбыта. Үлэһиттэр сайыҥҥы ыйдарга туһааннаах үлэни барытын оҥорбуттар. Аны бөһүөлэк иһигэр олорор дьиэлэргэ гааһы холбооһун үлэлэрэ хааллылар.
Антон Томский, "Сахатранснефтегаз" АУо гаас ситимин үллэрэр салаатын салайааччыта: «Бүтэйдээхтэн манна дылы кэлэр 9 килэмиэтирдээх бөһүөлэк икки ардынааҕы газопровод гаас ситимнэрин тутуутун бүтэрдибит. Уонна бөһүөлэк иһинээҕи гаас ситимин бастакы уочаратын түмүктээтибит. Ол иһин тутуу кэмэ бүтүүтүн дылы биһи бэйэбит былааннаабыт үлэбитин бүтэрэммит, бүгүн нэһилиэккэ бырааһынньык. Эһиилгэттэн бу нэһилиэккэ котельнай уонна 160-н тахха ыал күөх төлөн гааһыгар холбонуохтара диэн үөрүүлээх бырааһынньык».
Бөһүөлэккэ күөх төлөн ситимигэр 116-н тахса олорор дьиэ холбонуоҕа. Исписэлиистэр кэлэр сылтан уочаратынан дьиэлэргэ гаас ситимин тардан саҕалыахтара. Олохтоохтор туһааннаах матырыйааллары ылынан, холботорго бэлэм олороллор.
Клавдия Фёдорова, Өлөчөй олохтооҕо: «Биһиги төһөлөөх өр кэтэспиппит буолуой бу гаас ситимэ кэлэрин. Онон билигин эдэр ыччаттыын, оҕолордуун, уруулардыын тыалы тыал диэбэккэ, ардаҕы ардах диэбэккэ үөрүүбүтүн ситэ бары кэлэн үөрдүбүт көттүбүт».
Николай Матчитов, Алтан нэһилиэгин баһылыга: «Нэһилиэкпит дьоно-сэргэтэ сүрдээҕин үөрэн турабыт. Эһиил 2024 сылга хас биирдии ыалбытыгар, хас биирдии тэлгэһэҕэ Сахатранснефтегаз гаас ситимин тардан биһиэхэ күөх төлөн уота умайан олохпут тупсан, олох атын таһымыгар тахсыахпыт диэн сүрдээҕин эрэнэбит уонна күүтэбит».
Оттон Мэҥэ Хаҥалас Өлөчөйүн кытта тэҥҥэ Чурапчы бастакы Харбалааҕар күөх төлөн уота умайда. Манна бу сылга 37 дьиэ гааска холбонуоҕа. Туһааннаах тэрилтэҕэ иһитиннэрэллэринэн кэлэр 5 сылга күөх төлөн ситимин өссө 30 нэһилиэнньэлээх пууҥҥа тардыахтара. Оччотугар Саха сиригэр 7 тыһ. тахса олорор дьиэ гааска холбонуоҕа. Манна даҕатан эттэххэ, Саха сирэ социальнай гаастааһын бырагыраамматынан Уһук Илиҥҥэ бастыҥ көрдөрүүлээх. Ол курдук, биэс сыл иһигэр 23 тыһ. тахса олохтоох дьиэтигэр күөх төлөн ситимэ тардыллыбыта.
