Паромнар сырыылара уһаата
Сыана үрдүөн, сырыы тохтуон иннинэ тутуу матырыйаалын таһыы, аһы -үөлү тиэйии бу күннэргэ тэтимнээхтик барар. Өрүс суола сабыллар, быыһык кэмҥэ атыыланар табаар саппааһа саамай тыын суолталаах. "Якутопторг" тэрилтэ навигация сабыллыан иннинэ уу суолунан тириэрдиэхтээх бородууктатын барытын ыытан олорор, итиэннэ Дьокуускайдааҕы ыскылаакка эмиэ паром сырыытын баттаһа саппааһы толорбут.
Виктор Колесов, "Якутоптторг" тэрилтэ Аллараа Бэстээхтээҕи салаатын салайааччыта: «Сабардаммыт Хоту Арктическай улуустарга биһи баазабытыттан 600 т. барда. Социальнай суолталаах бородуукта: саахар, бурдук, рис, курууппа, туһуонка, мас арыыта. Навигациябытын быйыл бүтэрдибит, барыта тиийдэ уонна кыһыҥҥа бэлэмнэнэбит».
Аллараа Бэстээх өрөспүүбүлүкэ хорук сирэ. Манна икки федеральнай айан суолунан уонна тимир суолунан тыын суолталаах ас-үөл, олох-дьаһах бары эйгэтин табаара кэлэр. Холобура, аҥардас тиимир суолунан 1 мөл. 300 т. таһаҕас ааһар. Маныаха билигин тута уу суолугар киллэрэр саҥа схема оҥоһуллар.
Василий Михайлов, Мэҥэ Хаҥалас улууһун бастакы солбуйааччыта: «Вагоннар уоннуу-сүүрбэлии буолан арааран баран тутулла турар тимир суолунан грузовой терминалга киирэн сүөкэнэн бааржаҕа тиэниллэр салгыы Хоту улуустарга таһаллар. Оннук транспортнай схема оҥоһулла турар».
Онтон навигация кэмигэр киин куораты кытары ситимниир 14 паром сылдьар. Быйыл уһун күһүн буолан өрүс баччааҥҥа диэри ыраас. Онон барыллаан быһаарыынан алтынньы бүтүөр диэри паромнар сылдьыахтара.
Мария Дмитриева: «Билигин кыра кээмэйдээх судналарга өрүһүнэн сылдьары алтынньы 9 күнүттэн бобуллан турар. Онтон Аллараа Бэстээх – Дьокуусках хайысханнан паром сырыытыгар хааччахтааһыннар киириэхтэрэ. Ол курдук, бастатан туран сыана үрдээһинигэр итиэннэ ахсааны аччатыыга. Онтон тарыып туһунан этэр буоллахха – 2016 сыллаахха сыана судаарстыбыннай кэмитиэтин олохтообут тарыыбынан барыаҕа».
Тарыып алтынньы 18 күнүттэн үрдүүрэ былааннанар. Эрдэ 16 чыыһылаҕа сыана тахсыа диэн этиллибитэ, ол эрэн халлаан сылаас буолан көһөрүллүннэ. Холобура, ГАЗ массыына бары көрүҥэ 7870 солк. буолуоҕа, онтон таһаҕас тиэйэр улахан масыына 17 тыьыынчаттан 56 тыһ. диэри халбаҥныа. Онтон кыра көлөлөр ыйааһыннарыттан көрөн 1100 саҕалаан 3450 диэри буолуо.
Паромнар сайыҥҥы курдук болдьоммут кэминэн буолбакка, туолбуттарынан айанныахтара. Суол сабыллыытыттан ордук Илин эҥэр улуус дьоно уонна урбаанньыттар оҕустараллар.
Күн-дьыл туругуттан көрөн, өрүскэ паромнар ахсааннарын сыыйа аҕыйатыахтара. Быраактыка көрдөрөрүнэн, алтынньы бүтүүтэ 4 паром устар эбит. Кыдьымах элбээтэҕинэ Жатайынан Мэҥэ Хаҥалас Төхтүрүгэр туоруур буолуохтара. Онтон бу паромнар сэтинньи саҕаланыыта ледокол көмөтүнэн устуохтара.
