Дьокуускайга норуоттар икки ардыларынааҕы "Үрүҥ хаар алгыһа" поэзия бэстибээлэ ыытылынна
Сахабыт сиригэр араас норуоттар хомоҕой тыллаахтара, уус-уран тыл маастардара мустаннар киин куоратпыт поэзия алыптаах түһүлгэтигэр кубулуйда. "Үрүҥ хаар алгыһа" бэстибээл дойдубут 6 регионуттан уонна Азербайджан, Казахстан, Кыргызстан хоһоонньуттара кэлэн 3 күн устата алтыстылар. Айар үлэ, үөрэх, ситиһии туһунан үөрэнээччилэри, учууталлары кытары кэпсэтэн, айар үлэ умсугууталаах эйгэтигэр умса түстүлэр.
Суруйааччылар биир-биир туран бэйэлэрин тылларынан хоһооннорун ааҕаллар, ырытыһаллар. Казах норуотун биир биллэр поэта Алмат Исадилов Рустам Каженкин хоһооннорун тылбаастаабытын, саха уонна казах култууралара, поэзиялара майгыннаһарын бэлиэтиир.
Алмат Исадилов, Казахстан суруйааччыларын сойууһун чилиэнэ, поэт: «Я бескрайне был рад и очень даже удивлён, потому что это братский нам народ. Казахи и саха братья и корнями вместе. У нас много чего схожего: в языке, и в культуре. Похожий народ».
Бэстибээл 2012 сылтан саҕалаан икки сылга биирдэ буолар. Быйыл 7-с төгүлүн ыытыллан, 12 поэты араас дойдуттан, регионтан түмэ тарта. Бу сыллар тухары бырааттыы, үтүө сыһыан симэлийбэккэ, үтүө түмүктээх үгүс үлэ күн сирин көрдө. Ол курдук Анемподист Иванович Софронов - Алампа "Ыллыым ээ, ыллыым!" хоһоонун 32 араас норуот тылыгар тылбаастааһын буолар.
Наталья Харлампьева, СӨ суруйааччыларын сойууһун бэрэссэдээтэлин бастакы солбуйааччыта, СӨ норуодунай суруйааччыта: «Биллэн турар, биһи гонорар игин төлүүр харчыбыт суох этэ, онно биһи доҕотторбут-атастарбыт бүтүн Аан дойдуну тирийэ көтөн, олору булан биһи бу кинигэни оҥорон таһаарбыппыт. Иннэ гынан, бу бэстибээлгэ ол тылбааска кыттыспыт, тэрийбит дьон кэллилэр».
Поэттар Дьокуускайдааҕы национальнай гимназия үөрэнээччилэрин кытары көрсөн, бэрт сэргэх, истиҥ кэпсэтии таҕыста. Оҕолор сүрүннээн тас дойду литературатын ыйыталаһан, араас норуот суруйааччыларын айымньыларын кытары билистилэр. Ыалдьыттарга эҕэрдэ нүөмэрдэри көрдөрдүлэр. Бэстибээл үтүө түмүктээх буолла. Ол курдук хас да атын дойду, регион суруйааччыларын кытары бииргэ үлэлэһии дуогабара баттанна.
Гаврил Андросов, СӨ суруйааччыларын сойууһун бэрэссэдээтэлэ: «Түһүлгэттэн биһи саҕалаан элбэх улахан бырайыактары оҥордубут. Ол курдук, билигин кэлиҥҥи кэмҥэ Татарстан суруйааччыларын сойууһун кытары ордук күүскэ ыкса үлэлэһэ сылдьабыт. Кинилэри кытта хардарыта атастаһыы бэрээдэгинэн поэзия уонна проза анталогияларын таһаартаан сүрэхтэээбиппит. Саха литературатын күннэрэ Казаньҥа буолбуттара. Татар литературатын күннэрэ Дьокуускайга буолбуттара. Быйылгы сылга кинилэри кытта биир былааммытынан оҕо литературатын анталогиатын оҥорон таһаарыахтаахпыт. Ол үлэтэ саҕаламмыта, оттон биирдиилээн поэттарбыт, прозаиктарбыт кинигэлэрин уонна литератураведтарбыт оттүнэн үлэ-хамнас буола турар».
Бэстибээл поэзия биэчэринэн түмүктэннэ. Манна поэттар бэйэлэрин хоһооннорун уонна тылбаастарын аахтылар.
Айтал Павлов: «Поэттар бэстибээллэрэ икки сылга биирдэ ыытыллар. Быйылгы көрсүһүү үтүө түмүктээх, үрдүк ситиһиилэрдээх ааста. Аны 2025 сылга поэттар 8-с бэстибээлгэ мустуохтара».
