Дьокуускайга "Айар уустар" диэн креативнай индустрия Чемпионата аан бастакытын ыытыллынна
Мэҥэ-Хаҥалас улууһун Табаҕа нэһилиэгиттэн төрүттээх Дмитрий Зыков «Айар уус» креативнай индустрия коллеһын 3-с кууруһун устудьуона. Дима бу аан бастакытын ыытыллар айар уустар Чемпионаттарыгар Цифровой модельер диэн компетенцияҕа кыттар. Манна киниэхэ биэрбит таҥас эскииһын компьютерга киллэрэн, выкройкатын барытын анал программанан таҥан, иискэ бэлэм гына оҥоруохтаах.
Дмитрий Зыков, "Айар уус" креативнай индустрия коллеһын устудьуона: «Мин дизайн техническай уруһуйунан бу маннык көнө үтүгүннэрэн оҥоруохтаахпын. Эскиз бэчээттэнэн таххар уонна пошивка барар».
Сыыппаранан таҥас быһыытын оҥоруу быдан табыгастаах, бириэмэни, матырыйаалы экономиялыыр диэн этэр. Дима үөрэҕин бүтэрдэҕинэ маннык цифровой модельер буолар былааннаах. Айар уустар креативнай индустрия Чемпионата дизайн уонна ИТ-анимация хайысхаларынан барыта 10 компетенциянан ыытыллар. Уопсайа 50 устудьуон орто үөрэх кыһаларыттан кэлэн күрэхтэһэр. Ювелирдар хамаандаларыгар 5 устудьуон кыттар, кинилэр үрүҥ көмүһүнэн түөскэ кэтэр киэргэл оҥорон таһаарыахтаахтар.
Айсен Атласов, күрэхтэһии "Ювелирное дело" компетенциятын сүрүн эксперэ: «Оҥоһуктара түөскэ кэтэр киэргэл буолар. Бүгүн оҥороллоро бастакы күнэ. Күрэхтэһии уопсайа 3 күн буолар. Биир күннэ 7 чаас, уопсайа 21 чаас. Бүтэһигэр бэлэм оҥоһук таһаараллар».
Хас биирдии компетенция кыттыылаахтара хамаанданан түмүккэ бэлэм оҥоһук, киэргэл, таҥас, биитэр мобильнай сыһыарыы, оонньуу сайт, ойуулук бэлэмниэхтээхтэр. Чемпионакка Саха сирин орто үөрэхтэрин тэрилтэлэриттэн эрэ буолбакка, Ханты-Мансийскай автономнай уокуругуттан үс устудьуон кэлэн эмиэ бэйэлэрин холоннулар.
Любовь Афанасьева, профессиональнай үөрэхтээһин сайдыытын институтун дириэктэрин солбуйааччы: «Темата буоллаҕына саамай чугас, бэйэбитигэр бастыкыбытын оҥорор буоламмыт – ирбэт-тоҥ тематын ыллыбыт. Ол аата ирбэт тоҥҥо аналлаах тугу оҥорон таһаараллар бэйэбитигэр да интириэһинэй. Ону кытары, профориентационнай тэрээһиннэр буолаллар, оскуола оҕолоругар, устудьуоннарга уонна быыстапкалар, маастар-кылаастар эмиэ буолаллар. Барыта бу креативнай индустрия хайысханнан».
Намнааҕы педогогическай колледж технологияҕа преподавателэ Петр Колесов ыччаты маһынан уһанарга, талаҕынан өрөргө уһуйар. Күрэхтэһиигэ ыҥырыылаах ыалдьыт быһыытынан кэлэн баҕалаахтарга талаҕы сатаан өрүүгэ маастар-кылаас көрдөрөр. Талаҕы хаҕын ылан үөрэхтэригэр эгэлгэ араас оҥоһук, иһит-хомуос, тэрил оҥороллор. Хахтаах даҕаны өрүөххэ сөп, талахха кылаабынайа бэлэмнээһин элбэх бириэмэни эрэйэр.
Пётр Колесов, Намнаа5ы педколледж учуутала: «Бу хаҕын ылаарыбыт оргутабыт. Хаҕа оргуйдаҕына эрэ кэлэр. Сайын буоллаҕына хаҕа бэйэтэ кэлэр буолар бириэмэлээх. Оттон кэлбэт бириэмэтигэр оргутабыт».
Чемпионат түмүгүнэн хамаандалар үлэлэрэ тустаах кластерга туруохтара, кытааччылар дипломнарынан наҕараадаланаллар. Тэрээһин талааннаах айар-тутар ыччат кыаҕын арыйыыга, таһымын үрдэтиигэ, цифровой саҥа хайысхалары баһылыырга көмөлөөх буолла.
