Оскуолалар дьиэттэн үөрэххэ көһөллөр

Алын сүһүөх учуутала Айталина Ивановна Гаврильева үөрэнээччилэр билиилэрин тургутар. 4 кылаастарга нуучча тылын уруога буола турар. Киин куоракка кэккэ оскуолаларга сорох кылаастар карантиҥҥа бардылар, ол эрэн үөрэх хаамыыта тохтообот. Аныгы технология көмөтүнэн учуутал оҕолору куйаар ситимин нөҥүө үөрэтэр.

Айталина Гаврильева, Дьокуускайдааҕы 3 №-дээх орто оскуола алын сүһүөҕүн учуутала: "Карантин кэмигэр дьиэттэн олорон үөрэнэллэр. Маннык халыып ыарахаттардаах, ол эрэн үөрэх тохтообокко барар. Учи.ру, Сферум платформаларга үөрэнэбит".

Дьокуускайдааҕы 3 №-дээх оскуолаҕа күн бүгүн үс кылаас карантиҥҥа олорор. Бу сүрүннээн алын сүһүөх кылаастар. Ол курдук, үөрэх министиэристибэтин бирикээһинэн кылааска 20% оҕо ыарыйдаҕына дьиэттэн олорон үөрэниигэ көһөллөр.

Людмила Кривошапкина, Дьокуускайдааҕы 3 №-дээх  оскуола социальнай педагога: "Ол бириэмэҕэ кылаас аайы сууйуу-сотуу барар. Онтон учууталлар тэйиччи үөрэхтээһини ыыталлар".

Оттон киин куоракка бу күннэргэ уопсайа 18 оскуолаҕа 31 кылаас карантиҥҥа олорор. Ол эрэн күннэтэ көрдөрүү уларыйа турар. Үөрэх салалтатыгар иһитиннэрэллэринэн үгүс кылаас оҕолоро үтүөрэн оскуолаҕа үөрэххэ төннөн эрэллэр.

Анна Родионова, Дьокуускайдааҕы үөрэх салалтатын уопсай үөрэхтээһиҥҥэ салаатын сүрүннүүр исписэлииһэ: "Кэтээн көрүү түмүгүнэн Дьокуускай куорат оскуолаларыгар уонна уһуйааннарыгар дьаҥнаабыт оҕо ахсаана ааспыт нэдиэлэттэн аччаабыт. Бүгүҥҥү күн туругунан 12 уһуйааҥҥа, ол аата 19 бөлөххө 700 иитиллээччи карантиҥҥа олорор. Ону таһынан 18 оскуолаҕа 31 кылаас оскуолаҕа үөрэҕэ тохтоото".

Оттон ыарыы көрдөрүүтэ намтыырыгар, биллэн турар, эрдэттэн сэрэтии үлэтэ ыытыллара көдьүүстээх. Ол курдук, дьаҥнааһын утары быһыыны туруоруу поликлиникаларга бара турар. Быраастар ОРВИ, грипп утары быһыыны ылар наадалааҕын бэлиэтииллэр. Сүрүннээн оҕо тэрилтэлэрин үлэһиттэрэ булгуччу вакцинацияны ааһыахтаахтар.

Варвара Сивцева, Дьокуускайдааҕы 3 №-дээх поликлиника 3-с терапия салаатын сэбиэдиссэйэ: "Быһыыны туруоруу атырдьах ыйын бүтэһигиттэн саҕаламмыта уонна алтынньы ыйынан түмүктэниэхтээх. Күһүн буолан дьаҥнааһын элбэх, онон бары харыстаныахтаахтар. Ол туһуттан дьон үгүстүк тоҕуоруһар сиригэр сылдьартан туттунуохтарын уонна халыҥнык таҥнар наада".

Онон билигин дьыл кэмэ уларыйар бириэмэтигэр дьаҥнааһын көрдөрүүтэ үрдээбэтин туһугар быраастар быһыыны ылары сүбэлииллэр. Үгүс поликлиникаларга вакцинация бу алтынньы ый бүтүөр диэри ыытыллар. Оттон кэккэ медицинэ тэрилтэлэригэр сэтинньи ыйга диэри салҕаныаҕа.