Опера уонна балет тыйаатыра 48 мөлүйүөҥҥэ өрөмүөннэннэ

Опера уонна балет тыйаатыра бу сылга  регионнар кэккэлэригэр биир бастакынан бэдэрээлнэй субсидийа ылла. Бырагырааманан уопсай көрүллүбүт суумматтан 35 мөлүйүөн 954 тыыһынча тыйаатыр сүрүн уонна оҥорон таһаарар куорпустарын өрөмүөннээһиҥҥэ, оттон хаалбыт 12 мөлүйүөн 728 тыыһынча саҥа тэрилинэн хааччыллыыга көрүлүннэ.

Владислав Лёвочкин, Суорун Омоллоон аатынан опера уонна балет тыйаатырын дириэктэрэ: «Биһиги туруорууларбыт бэлэмнэнэр сирдэрэ өссө сырдык, ыраас буоулохтара. Үлэһиттэрбит өссө өрө көтөҕүллэн үлэлиэхтэрэ».

Балет саалатыгар анал саҥа муоста, саҥа уот-күөс, сиэркилэ турда. Артыыстар дьарыктанар усулуобуйалара өссө тупсан айар үлэлэрэ кытта таһаарыылаах буоларга дылытын тыйаатыр үҥкүүһүтэ үллэстэр.

Сарыал Афанасьев, СӨ норуодунай артыыһа: «Анал балет муостатын оҥордулар, ититии ситимин уларыттар. Биһиэхэ сөптөөх температура олус наадалаах. Онтон анал муоста эргийиилэри оҥорорбутугар уонна сэрэхтээх буолууга табыгастаах буолуо».

Тыйаатыр урукку сылларга кыһынын түннүгүнэн тымныы хаарыйар эбит буоллаҕына, быйыл сайын устата ититии ситимэ бүтүннүү саҥардылынна, оттон түннүк уонна истиэнэ быыстара саҥа матырыйаалынан бүөлэнэн билигин тыйаатыр иһэ сып-сылаас. Хуор саалатыгар 33 сылын үлэлиир Октябрина Птицына бастыкы улахан сиппит-хоппут өрөмүөн бастакытын ыытылынна диэн үөрүүтэ муҥура суох.

Октябрина Птицына, Суорун Омоллоон аатынан опера уонна балет тыйаатырын опернай кэллэктиибин салайааччыта: «Хор коллектива үлэлиир сиригэр хаһан да маннык улахан өрөмүөн буола илигэ. Истинэлэрбит саҥалыы оҥоһуллуннулар, кириэһилэлэр уларыйдылар».

Хуор кэлэктиибэ бүтүннүү өрөмүөн үлэтигэр кыттыстылар. Эргэ ыскамыайкалары таһаартаан, саҥа олоппостору киллэртээн, кырааска сотуутугар кэлэктиип сааһыламмыт үлэтэ улахан көмө буолбутун салайааччылара бэлиэтээтэ.

Тыйаатыр муостата, истиэнэтэ, сырдыгынан хааччыллыыта барыта саҥардыллан, иһэ кэҥээбиккэ дылы буолбут. Оттон түмэл иһэ эмиэ уларыйан үлэһиттэр үөрүүлэрин үксэттэ.

Федот Сергеев, Суорун Омоллоон аатынан опера уонна балет тыйаатырын түмэлин уонна архыыбын сэбиэдиссэйэ: «Түмэлгэ муостатын уларыттылар. Эрдэ муостата ковролин этэ. Ону сэргэ туннүктэри өрөмүөннээтилэр».

Декорация, артыыстар көстүүмнэрэ оҥоһуллан тахсар куорпустара бүтүннүү уларыйда. Иистэнньэҥнэр, дизайнердар, уустар үлэлэрэ таһаарыылахтык барарыгар, көрүдүөр муостатыттан саҕалаан кабинет иһигэр тиийэ уларыйда.  Тыйаатыр саҥа сезонугар үктэнэн, буолаары турар улахан бэстэбээллэргэ бэлэмнэнэргэ уонна кэлбит ыалдьыттары  көрсөргө усулуобуйаламмыттарыттан үөрэллэр.